ຂາຍກະໂທງ-ໝາກເບັງ ໃນງານບຸນອອກພັນສາປະວໍຣະນາ ໄດ້ຂາຍດີ, ທ່ານ ນາງ ແສງຈັນ ຄໍາພັງທອງ ແມ່ຄ້າຂາຍໝາກເບັງ ຢູ່ແຄມທາງໃຫຍ່ຂ້າງວັນທາດຫຼວງໃຕ້ ເມືອງໄຊເສດຖາ ນະ ຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວໜັງສືພິມ ປະຊາຊົນ ໃນວັນທີ 17 ຕຸລາ ນີ້ວ່າ: ເມື່ອຮອດມື້ຂຶ້ນ 15 ຄໍ່າ ເດືອນ 11 ແມ່ນມື້ບຸນອອກພັນສາປະວໍຣະນາ ແລະ ໃນຕອນຄໍ່າຂອງມື້ນີ້ ກໍຈະມີພິທີລອຍກະໂທງ ຢູ່ສະຖານທີ່ຕ່າງໆຕາມຄວາມເໝາະສົມ ເປັນຕົ້ນຢູ່ແຄມຂອງ ທ່າວັດຈັນ ນະຄອນຫຼວງວຽງຈັນ ຊຶ່ງປະເພນີລອຍກະໂທງ ກໍເປັນໜຶ່ງໃນຮີດຄອງປະເພນີລາວ ທີ່ຈັດຂຶ້ນໃນໂອກາດບຸນອອກພັນສາປະວໍຣະນາ ຊຶ່ງເປັນພິທີທີ່ມີຄວາມໝາຍສໍາຄັນຂອງຊາວພຸດ. ການລອຍກະໂທງ ຕາມຄວາມເຊື່ອຂອງຊາວພຸດທີ່ວ່າ: ເມື່ອຮອດມື້ຂຶ້ນ 15 ຄໍ່າ ເດືອນ 11 ຂອງທຸກໆປີ ຈະຕ້ອງໄດ້ມີພິທີລອຍກະໂທງ ເພື່ອຂໍອະໂຫຊິກໍາ, ສົມມາຄາລະວະ ຈາກແມ່ນໍ້າທີ່ເຮົາໃຊ້, ເຮົາອາບ ແລະ ຂໍພອນນໍ້າແມ່ນໍ້າຄົງຄາຕ່າງໆ ເພື່ອໃຫ້ຕົນເອງ ແລະ ຄົນໃນຄອບຄົວມີສຸຂະພາບທີ່ແຂງແຮງ, ມີຄວາມສຸກໃນການດຳລົງຊີວິດ ແລະ ປັດເປົ່າເອົາສິ່ງທີ່ບໍ່ດີບໍ່ງາມໃຫ້ຖິ້ມໄປ, ໄຫຼ່ໄປກັບກະໂທງ ທີ່ລອຍໄປຕາມແມ່ນໍ້າ ແລະ ອື່ນໆ.

ທ່ານ ນາງ ແສງຈັນ ຄໍາພັງທອງ ຍັງກ່າວຕື່ມວ່າ: ມື້ນີ້ ກໍໄດ້ນໍາເອົາກະໂທງຫຼາຍຂະໜາດມາວາງຂາຍ-ຈໍາໜ່າຍມີທັງຂະໜາດນ້ອຍ, ໃຫຍ່ ຊຶ່ງມີທັງໝົດ 60 ອັນ ໃນຄາລາເລີ່ມຕົ້ນ 20 ພັນກີບ ຫາ 50 ພັນກີບ ເພື່ອໃຫ້ມວນຊົນໄດ້ກາຍໄປ-ມາ ໄດ້ຈັບຈ່າຍ, ເລືອກຊື້ຕາມໃຈມັກ. ໃນນັ້ນ, ຍັງມີບໍລິການຂາຍໝາກເບັງຫຼາຍປະເພດເຊັ່ນ: ໝາກເບັງ 9 ກີບ ມີ 80 ອັນ, 5 ກີບ 100 ອັນ, 3 ກີບ 120 ອັນ. ນອກນັ້ນ, ຍັງຂາຍດອກໄມ້ບູຊາເຊັ່ນ: ຂັນຫ້າ, ດອກໄມ້, ຂາຍທູບທຽນ, ເຂົ້າໜົມ, ໝາກກ້ວຍ ແລະ ອື່ນໆ ຕື່ມອີກ.

ສໍາລັບກະໂທງ ແລະ ໝາກເບັງ ທີ່ນໍາມາວາງຂາຍ-ຈໍາໜ່າຍ ວັດຖຸດິບແມ່ນໄດ້ຊື້ຈາກບ່ອນອື່ນ ເປັນຕົ້ນດອກດາວເຮືອງ, ໃບຕອງ, ຕົ້ນກ້ວຍ. ຈາກນັ້ນ, ເຮົາຈະນໍາວັດຖຸດິບມາປະດິດເອງ, ຫຍິບເອງ ຈຶ່ງຂາຍໃນລາຄາບໍ່ແພງ ຊຶ່ງເຫັນວ່າປີນີ້ໄດ້ຂາຍດີພໍສົມຄວນ.

ແມ່ຄ້າຂາຍໝາກເບັງ ຍັງຝາກເຖິງທຸກຄົນທີ່ໄດ້ກາຍໄປ-ມາທາງໃຫຍ່ ເບື້ອງທາດຫຼວງໃຕ້ ກໍສາມາດມາແວ່ຊື້ກະໂທງ-ໝາກເບັງໄດ້. ສໍາລັບໝາກເບັງ, ດອກໄມ້ບູຊາຕ່າງໆ ບໍ່ພຽງແຕ່ຂາຍໃນໂອກາດງານບຸນຕ່າງໆເທົ່ານັ້ນ, ທຸກວັນສິນໃຫຍ່ 15 ຄໍ່າ ແລະ ສິນ 8 ຄໍ່າກໍຂາຍ ເປັນປະຈໍາ.