ທ່ານ ອີກໍ ເຊີເກເຢນໂກ ປະທານ ສະພາຜູ້ແທນປະຊາຊົນ ສະພາແຫ່ງຊາດ ສ ເບລາຣຸດຊີ ວາງກະຕ່າດອກໄມ້ ຢູ່ຫໍພິພິຕະພັນ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວບັນດາເຜົ່າ ໃນວັນທີ 19 ຕຸລາ 2024 ເນື່ອງໃນໂອກາດ ທີ່ຄະນະຜູ້ແທນດັ່ງກ່າວ ມາຢ້ຽມຢາມ ແລະ ເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງ ຊາດອາຊຽນ ຄັ້ງທີ 45 ທີ່ນະຄອນຫຼວງວຽງຈັນ.

ການເຂົ້າວາງກະຕ່າດອກໄມ້ຄັ້ງນີ້ ເພື່ອສະແດງຄວາມເຄົາລົບຮັກ, ກະຕັນຍູຮູ້ບຸນຄຸນ ຈາລຶກຄຸນງາມຄວາມດີຂອງປະທານ ໄກສອນ ພົມວິຫານ ທີ່ໄດ້ອຸທິດຕະຫຼອດຊີວິດ ເພື່ອຜົນປະໂຫຍດສ່ວນລວມຂອງຊາດ, ທ່ານ ໄດ້ສຸມສະຕິປັນຍາເຂົ້າໃນການນໍາພາຂະບວນການຕໍ່ສູ້ຕ້ານການຮຸກຮານຂອງພວກຕ່າງດ້າວ ຈົນສາມາດຍາດໄດ້ຮັບໄຊຊະນະ ແລະ ນໍາເອົາຄວາມຢູ່ເຢັນເປັນສຸກມາສູ່ປະຊາຊົນ. ປະທານ ໄກສອນ ພົມວິຫານ ແມ່ນນັກຮັກຊາດຜູ້ຍິ່ງໃຫຍ່, ເປັນນັກປະຕິວັດຜູ້ດີເລີດ ເປັນຜູ້ນໍາສູງສຸດຂອງການປະຕິວັດທີ່ມີຄວາມປີຊາສາມາດ, ມີຄວາມສະຫຼາດຫຼັກແຫຼມ, ມີໄຫວພິບອັນແຫຼມຄົມ, ມີນໍ້າໃຈ ຕໍ່ສູ້ເດັດດ່ຽວໜຽວແໜ້ນ, ນໍາພາສ້າງຕັ້ງ, ຖະນຸບຳລຸງ, ສ້າງສາ ແລະ ພັດທະນາ ປະເທດຊາດໃຫ້ຮຸ່ງເຮືອງສີວິໄລ, ສ້າງປະຖົມປັດໄຈ ກ້າວຂຶ້ນສັງຄົມນິຍົມຢ່າງໜັກແໜ້ນ.

ການວາງກະຕ່າດອກໄມ້ຄັ້ງນີ້ ເພື່ອສະແດງຄວາມເຄົາລົບຮັກ, ຈົດຈໍາບຸນຄຸນອັນໃຫຍ່ຫຼວງ ແລະ ສືບຕໍ່ເສີມຂະຫຍາຍແນວຄິດ ຂອງປະທານໄກສອນ ພົມວິຫານ ທີ່ແສນເຄົາລົບຮັກ, ກໍຄືມູນເຊື້ອຄວາມສາມັກຄີອັນດີງາມຂອງ ສປປ ລາວ ແລະ ສ ເບລາຣຸດຊີ ໃຫ້ໝັ້ນຄົງທະນົງແກ່ນຕະຫຼອດໄປ.

ຂ່າວ: ຍຸພິນທອງ

ພາບ: ຂັນໄຊ