ກອງປະຊຸມຄົບຄະນະວາລະທີ 1 ຂອງກອງປະຊຸມໃຫຍ່ ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 45 (AIPA-45) ໄດ້ຈັດຂຶ້ນ ໃນວັນທີ 19 ຕຸລາ 2024 ທີ່ຫໍປະຊຸມແຫ່ງຊາດ, ໂດຍມີ ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດ ແຫ່ງ ສປປ ລາວ, ປະທານ AIPA ຄັ້ງທີ 45, ມີບັນດາປະທານລັດຖະສະພາ, ຫົວໜ້າຄະນະຜູ້ແທນລັດຖະສະພາສະມາຊິກໄອປາ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ສູນທອນ ໄຊຍະຈັກ, ຮອງປະທານສະພາແຫ່ງຊາດ ແຫ່ງ ສປປ ລາວ ໄດ້ຕີລາຄາສູງ ຕໍ່ຄວາມພະຍາຍາມລວມຂອງອາຊຽນ ໃນໄລຍະຜ່ານມາ ທີ່ໄດ້ສຸມໃສ່ຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ການຈັດຕັ້ງປະຕິບັດ ແຜນແມ່ບົດ ພາຍໃຕ້ 3 ເສົາຄໍ້າປະຊາຄົມອາຊຽນ, ແຜນແມ່ບົດວ່າດ້ວຍການເຊື່ອມຈອດອາຊຽນ ແລະ ແຜນປະຕິບັດງານວ່າດ້ວຍການເຊື່ອມໂຍງພາກພື້ນ ລວມທັງການເສີມຂະຫຍາຍການພົວພັນຮ່ວມມື ລະຫວ່າງອາຊຽນກັບຄູ່ຮ່ວມມືພາຍນອກ ໂດຍຜ່ານບັນດາກົນໄກທີ່ອາຊຽນເປັນຜູ້ນໍາພາ, ຄຽງຄູ່ກັບການຮັດແໜ້ນຄວາມເປັນເອກະພາບ ແລະ ຄວາມເປັນແກນກາງຂອງອາຊຽນ ໃນໂຄງສ້າງພາກພື້ນທີ່ພວມຜັນແປໄປ.

ທ່ານ ຮອງປະທານສະພາແຫ່ງຊາດ ສປປ ລາວ ຍັງໄດ້ສະແດງຄວາມຊົມເຊີຍ ຄວາມພະຍາຍາມລວມຂອງອາຊຽນ ໃນການສ້າງວິໄສທັດປະຊາຄົມອາຊຽນ 2045 ແລະ ການສ້າງແຜນຍຸດທະສາດຕ່າງໆ ແນໃສ່ສ້າງປະຊາຄົມອາຊຽນ ທີ່ເຂັ້ມແຂງ, ມີນະວັດຕະກຳ, ຄ່ອງແຄ້ວ ແລະ ມີປະຊາຊົນເປັນແກນກາງ ໃນອານາຄົດ ເພື່ອໃຫ້ຜູ້ນໍາຮັບຮອງເອົາໃນປີ 2025. ເພື່ອສືບຕໍ່ ເຮັດໃຫ້ອາຊຽນ ກາຍເປັນປະຊາຄົມ ແຫ່ງ ການເຊື່ອມໂຍງ-ເຊື່ອມຈອດ ຢ່າງຮອບ ດ້ານໃນຕໍ່ໜ້າ, ກອງປະຊຸມສະມັດຊາໃຫຍ່ໄອປາ ຄັ້ງທີ 45 ນີ້ ຈຶ່ງໄດ້ຈັດຂຶ້ນພາຍໃຕ້ຫົວຂໍ້: “ບົດບາດຂອງລັດຖະສະພາ ໃນການຊຸກຍູ້ການເຊື່ອມຈອດ ແລະ ການຈະເລີນເຕີບໂຕແບບກວມລວມ ຂອງອາຊຽນ” ເຫັນວ່າ ຄຳຂວັນດັ່ງກ່າວແມ່ນສອດຄ່ອງກັບທ່າອ່ຽງຂອງພາກພື້ນ ກໍຄືການຮັດແໜ້ນ ການເຊື່ອມໂຍງ ແລະ ເຊື່ອມຈອດທາງດ້ານເສດຖະກິດພາຍໃນພາກພື້ນ ໃຫ້ຫຼາຍຂຶ້ນ ເປັນຕົ້ນແມ່ນການຂົນສົ່ງ, ໂທລະຄົມມະນາຄົມ, ການຫັນເປັນດີຈິຕອນ, ພະລັງງານ, ສົ່ງເສີມການໄປມາຫາສູ່ຂອງປະຊາຊົນ, ອໍານວຍຄວາມສະດວກດ້ານການຄ້າ, ການລົງທຶນ, ການທ່ອງທ່ຽວ, ການຜະລິດ, ການບໍລິການ ແລະ ການສະໜອງແບບຕ່ອງໂສ້ການຜະລິດໃຫ້ມີຄວາມໂລ່ງລຽນ, ສ້າງພື້ນຖານໂຄງລ່າງດ້ານເສດຖະກິດ ໃຫ້ມີຄວາມເຂັ້ມແຂງ, ກວມລວມ, ຍືນຍົງ, ຮັດແຄບຄວາມແຕກໂຕນທາງການພັດທະນາໃນປະເທດອາຊຽນ ແລະ ສາມາດສະກັດກັ້ນ, ແກ້ໄຂວິກິດການ ແລະ ສິ່ງທ້າທາຍຕ່າງໆ ທີ່ອາດຈະເກີດຂຶ້ນໃນອະນາຄົດ. ພ້ອມດຽວກັນນີ້, ຄຳຂວັນດັ່ງກ່າວ ຍັງສອດຄ່ອງກັບນະໂຍບາຍແຫ່ງຊາດ ກໍຄື ຄວາມພະຍາຍາມຂອງ ສປປ ລາວ ທີ່ຈະຫັນປະເທດທີ່ບໍ່ມີຊາຍເເດນຕິດກັບທະເລ ໃຫ້ມີການເຊື່ອມໂຍງ ແລະ ເຊື່ອມຈອດກັບບັນດາປະເທດສະມາຊິກອາຊຽນຫຼາຍຂຶ້ນ ແລະ ກ້າວໄປສູ່ການເຊື່ອມໂຍງ-ເຊື່ອມຈອດກັບນອກພາກພື້ນ.

ໃນຂະບວນການສ້າງປະຊາຄົມອາຊຽນ ໃຫ້ມີຄວາມເຂັ້ມແຂງນັ້ນ, ໄອປາມີຄວາມຈໍາເປັນທີ່ຈະຕ້ອງໄດ້ເພີ່ມທະວີການຮ່ວມມືນໍາກັນ ໂດຍຜ່ານການເຊື່ອມໂຍງ-ເຊື່ອມຈອດ ແລະ ການເຕີບໂຕແບບກວມລວມ, ນໍາໃຊ້ດີຈີຕອນແບບກວມລວມ ເຂົ້າໃນການສ້າງຄວາມເຂັ້ມແຂງໃຫ້ແກ່ປະຊາຊາດໃນພາກພື້ນ, ສົ່ງເສີມການມີສ່ວນຮ່ວມຂອງປະຊາຊົນ ໃນການຮັກສາສັນຕິພາບ, ສະຖຽນລະພາບ ແລະ ການພັດທະນາ, ສົ່ງເສີມການລະດົມທຶນ ເພື່ອພັດທະນາການເຊື່ອມຈອດດ້ານພື້ນຖານໂຄງລ່າງ, ສົ່ງເສີມການເຊື່ອມໂຍງດ້ານເຕັກໂນໂລຊີດິຈິຕອນ ແລະ ດ້ານອື່ນໆ, ປະກອບສ່ວນສ້າງປະຊາຄົມອາຊຽນທີ່ປອດໄພ, ເຂັ້ມແຂງ ແລະ ກວມລວມ ແນ່ໃສ່ຮັບປະກັນການປົກປັກຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ, ພ້ອມທັງຮັບປະກັນໃຫ້ສາມາດບັນລຸໄດ້ຕາມແຜນແມ່ບົດປະຊາຄົມອາຊຽນ 2025 ແລະ ຕໍ່ໜ້າ.

ພ້ອມດຽວກັນນັ້ນ, ລັດຖະສະພາສະມາຊິກໄອປາ ຕ້ອງໃຫ້ຄວາມສຳຄັນຕໍ່ການຄຸ້ມຄອງລັດ-ຄຸ້ມຄອງສັງຄົມ ດ້ວຍລະບຽບກົດໝາຍ, ສືບຕໍ່ປັບປຸງຂອບກົດໝາຍ ແລະ ນະໂຍບາຍ ໃຫ້ມີຄວາມສອດຄ່ອງພາຍໃນປະເທດສະມາຊິກອາຊຽນ, ຊຸກຍູ້ການໃຫ້ສັດຕະຍາບັນແກ່ສັນຍາ ແລະ ສົນທິສັນຍາ ໃນກອບການຮ່ວມມືດ້ານຕ່າງໆຂອງອາຊຽນ, ຕິດຕາມກວດກາການຈັດຕັ້ງປະຕິບັດນິຕິກຳທີ່ກ່ຽວຂ້ອງ ໃນຂົງເຂດວຽກງານຕ່າງໆຂອງອາຊຽນ ລວມທັງກົດບັດອາຊຽນ ໃຫ້ມີປະສິດທິພາບ ແລະ ມີປະສິດທິຜົນ ເພື່ອນໍາເອົາຜົນປະໂຫຍດສູງສຸດ ມາສູ່ປະຊາຊົນຢ່າງທົ່ວເຖິງ. ພວກເຮົາຕ້ອງສືບຕໍ່ຊຸກຍູ້ ແລະ ຮັດແໜ້ນການຮ່ວມມື ກັບຄູ່ຮ່ວມມືພາຍນອກຂອງອາຊຽນ ເພື່ອປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄືການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາ ໃນພາກພື້ນ ກໍຄືໃນໂລກ. ສປປ ລາວ ໄດ້ເອົາໃຈໃສ່ຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດທັງ 3 ເສົາຄໍ້າປະຊາຄົມອາຊຽນ ລວມທັງແຜນວຽກຂໍ້ລິເລີ່ມ ເພື່ອການເຊື່ອມໂຍງອາຊຽນ ແລະ ແຜນແມ່ບົດເພື່ອການເຊື່ອມຈອດອາຊຽນ 2025 ດ້ວຍການພັດທະນາພື້ນຖານໂຄງລ່າງທີ່ຈຳເປັນໃຫ້ແກ່ການເຊື່ອມຈອດເຂົ້າສູ່ແລວທາງເສດຖະກິດຂອງປະເທດຕ່າງໆ ເຊັ່ນ: ການສ້າງເສັ້ນທາງລົດໄຟຄວາມໄວສູງ; ສ້າງເສັ້ນທາງດ່ວນຢູ່ພາຍໃນປະເທດ ແລະ ກັບປະເທດໃກ້ຄຽງ; ປັບປຸງ, ບູລະນະສ້ອມແປງທາງຫຼວງ ແລະ ສ້າງລະບົບສາຍສົ່ງໄຟຟ້າ ເພື່ອອຳນວຍຄວາມສະດວກໃຫ້ແກ່ການຂົນສົ່ງ, ການຄ້າ, ການລົງທຶນ ແລະ ການທ່ອງທ່ຽວ ກໍຄືການພັດທະນາເສດຖະກິດ-ສັງຄົມ ພາຍໃນປະເທດ ໃຫ້ສາມາດເຊື່ອມຈອດກັບບັນດາປະເທດໃກ້ຄຽງ ກໍຄືປະເທດອາຊຽນ ແລະ ເຊື່ອມໂຍງລະຫວ່າງອາຊຽນກັບພາກພື້ນອື່ນ ໃຫ້ນັບມື້ນັບດີຂຶ້ນເລື້ອຍໆ. ພ້ອມທັງມີຄວາມເຊື່ອໝັ້ນວ່າ ລັດຖະສະພາສະມາຊິກໄອປາ ຈະສືບຕໍ່ເພີ່ມທະວີຍົກສູງກົນໄກການຮ່ວມມືເຊິ່ງກັນ ແລະ ກັນ ໃນການສ້າງຄວາມກົມກຽວທາງດ້ານກົດໝາຍ ເພື່ອອຳນວຍຄວາມສະດວກໃຫ້ແກ່ການເຊື່ອມໂຍງ-ເຊື່ອມຈອດຂອງອາຊຽນ ໃຫ້ກາຍເປັນຮູບປະທຳຫຼາຍຂຶ້ນ; ຊຸກຍູ້ລັດຖະບານ ໃຫ້ຍົກສູງ ວິທີການ ແລະ ກົນໄກການພົວພັນຮ່ວມມືທີ່ເໝາະສົມ ກັບພາຍນອກ ເພື່ອສົ່ງເສີມການລົງທຶນດ້ານການກໍ່ສ້າງພື້ນຖານໂຄງລ່າງອາຊຽນ ທີ່ອຳນວຍຄວາມສະດວກໃຫ້ແກ່ ການຂົນສົ່ງ, ການຄ້າ, ການລົງທຶນ, ອຸດສາຫະກຳການທ່ອງທ່ຽວ ແລະ ອື່ນໆ ເພື່ອບັນລຸໄດ້ຕາມວິໄສທັດປະຊາຄົມອາຊຽນ 2025 ແລະ ເປົ້າໝາຍການພັດທະນາແບບຍືນຍົງ 2030 ຕາມທີ່ອົງການສະຫະປະຊາຊາດໄດ້ກຳນົດໄວ້.

ຂ່າວ: ຍຸພິນທອງ, ຮູບ: ສຸກສະຫວັນ