ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ພົບກັບທ່ານ ອີກໍ ເຊີເກເຢນໂກ ປະທານສະພາຜູ້ແທນປະຊາຊົນ ສະພາແຫ່ງຊາດ ແຫ່ງ ສ ເບລາຣຸດຊີ ພ້ອມຄະນະ ໃນວັນທີ 19 ຕຸລານີ້ ທີ່ນະຄອນຫຼວງວຽງຈັນ.

ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ທ່ານ ອີກໍ ເຊີເກເຢນໂກ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ທີ່ ສປປ ລາວໄດ້ຮັບກຽດເປັນເຈົ້າພາບໃນຄັ້ງນີ້ ຊຶ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ລາວ-ເບລາຣຸດຊີໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ ທັງເປັນການສະໜັບສະໜູນ ແລະ ໃຫ້ກໍາລັງໃຈແກ່ ສປປ ລາວ ເຮັດສໍາເລັດໜ້າທີ່ພັນທະສາກົນຂອງຕົນ; ພ້ອມທັງຂໍຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດເຖິງທ່ານ ໂຣມັນ ໂກລັອຟເຊັນໂກ້ ນາຍົກລັດຖະມົນຕີແຫ່ງ ສ ເບລາຣຸດຊີ ມາໃນໂອກາດນີ້.

ໂອກາດນີ້, ທ່ານ ອີກໍ ເຊີເກເຢນໂກ ໄດ້ກ່າວສະແດງຄວາມຂອບໃຈເປັນຢ່າງສູງ ຕໍ່ຄວາມເວົ້າອັນຈົບງາມຂອງທ່ານ ສອນໄຊ ສີພັນດອນ ທີ່ມີຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມມາແຕ່ດົນນານ ລະຫວ່າງ 2 ປະເທດ ແລະ ປະຊາຊົນສອງຊາດພວກເຮົາ, ພ້ອມທັງໄດ້ແຈ້ງສະພາບການທີ່ພົ້ນເດັ່ນຂອງປະເທດ ແລະ ສະພາຜູ້ແທນປະຊາຊົນ, ສະພາແຫ່ງຊາດ ສ ເບລາຣຸດຊີ ໃຫ້ໄດ້ຮັບຊາບ.

ສປປ ລາວ ພວກຂ້າພະເຈົ້າ ຫາກໍໍ່ສໍາເລັດການເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດປິ່ນອ້ອມທີ່ກ່ຽວຂ້ອງຢ່າງຈົບງາມ; ປັດຈຸບັນ, ສະພາແຫ່ງຊາດລາວ ໃນນາມເປັນປະທານໄອປາ ພວມຂຸ້ນຂ້ຽວສຸມໃສ່ການເປັນເຈົ້າພາບກອງປະຊຸມໄອປາ ຄັ້ງທີ 45 ແລະ ກອງປະຊຸມປິ່ນອ້ອມອື່ນໆ, ຂ້າພະເຈົ້າ ເຊື່ອໝັ້ນວ່າການເຂົ້າຮ່ວມຂອງທ່ານ ແລະ ຄະນະ ຈະເປັນການປະກອບສ່ວນທີ່ສໍາຄັນເຂົ້າໃນຜົນສໍາເລັດຂອງການດໍາເນີນກອງປະຊຸມດັ່ງກ່າວຕາມຈຸດປະສົງ ແລະ ລະດັບຄາດໝາຍທີ່ວາງໄວ້. ສອງຝ່າຍໄດ້ມີການແລກປ່ຽນຄະນະຜູ້ແທນນໍາກັນ ແລະ ມີການກະກຽມບັນດາຮ່າງສັນຍາການຮ່ວມມືຮ່ວມກັນ ທາງດ້ານການເມືອງ, ເສດຖະກິດ-ການຄ້າ, ການລົງທຶນ, ການສຶກສາ, ສາທາລະນະສຸກ, ວັດທະນະທໍາ, ທ່ອງທ່ຽວ ແລະ ດ້ານອື່ນໆ ແຕ່ເຫັນວ່າບັນດາສັນຍາຮ່ວມມືເຫຼົ່ານັ້ນ ຍັງບໍ່ທັນໄດ້ຮັບການເສີມຂະຫຍາຍໃຫ້ແຕກດອກອອກຜົນເທົ່າທີ່ຄວນ ຍ້ອນການລະບາດຂອງພະຍາດໂຄວິດ- 19.

ໂອກາດນີ້, ທ່ານນາຍົກລັດຖະມົນຕີແຫ່ງ ສປປ ລາວ ໄດ້ອວຍພອນ ທ່ານ ອີກໍ ເຊີເກເຢນໂກ ຈົ່ງປະສົບຜົນສໍາເລັດໃນການເຂົ້າຮ່ວມກອງປະຊຸມໃນຄັ້ງນີ້, ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສປປ ລາວ- ສ ເບລາຣຸດຊີ, ເບລາຣຸດຊີ-ລາວ ແລະ ປະຊາຊົນສອງຊາດລາວ-ເບລາຣຸດຊີ ຈົ່ງສືບຕໍ່ພັດທະນາ ແລະ ຂະຫຍາຍຕົວຍິ່ງໆຂຶ້ນ.

ຂ່າວ: ພູວັນ, ພາບ: ສຳນານ