ທ່ານ ຄຳແພງ ວິລະພັນ ປະທານກໍາມາທິການກົດໝາຍສະພາແຫ່ງຊາດລາວພົບປະກັບທ່ານ ຊົວ ຣາມິສ ໂອກລູ ຊູກູຣອບ (Zaur Ramiz Oglu SHUKUROV) ສະມາຊິກລັດຖະສະພາແຫ່ງສາທາ ລະນະລັດ ອາຊັກໄບຊານ ພ້ອມຄະນະໃນວັນທີ 19 ຕຸລາຜ່ານມາ ທີ່ນະຄອນຫຼວງວຽງຈັນ ໃນໂອກາດເຂົ້າຮ່ວມກອງປະຊຸມໄອປາ (AIPA) ຄັ້ງທີ 45 ທີ່ ສປປ ລາວ ເປັນເຈົ້າພາບ.

ທ່ານປະທານກໍາມາທິການກົດໝາຍສະພາແຫ່ງຊາດລາວ ໄດ້ກ່າວວ່າ: ການພົບປະ ຄັ້ງນີ້ຈະເປັນໂອກາດອັນດີໃຫ້ພວກເຮົາໄດ້ປຶກສາຫາລື ເພື່ອຊຸກຍູ້ເພີ່ມທະວີການພົວພັນກໍຄືສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ອາຊັກໄບຊັນ ກໍຄື ສອງອົງການນິຕິບັນຍັດຂອງສອງປະເທດໃຫ້ນັບມື້ນັບຂະຫຍາຍຍິ່ງໆຕົວຂຶ້ນ.

ສປປ ລາວ ແລະ ອາຊັກໄບຊານ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 22 ພຶດສະພາ 1995. ນັບແຕ່ນັ້ນເປັນຕົ້ນມາ, ສອງປະເທດໄດ້ເພີ່ມພູນຄູນສ້າງສາຍພົວ ພັນມິດຕະພາບ ແລະ ການຮ່ວມມືອັນດີງາມນໍາກັນ ແລະ ໄດ້ຮັບການພັດທະນາດີຂຶ້ນເປັນກ້າວໆ ໄປສູ່ຂົງເຂດການຮ່ວມມືທາງດ້ານການເມືອງ-ຄວາມໝັ້ນຄົງ, ການຕ່າງປະເທດ, ການພັດທະນາຊັບພະຍາກອນມະນຸດ, ສອງຝ່າຍ ຍັງໄດ້ສ້າງຕັ້ງສະມາຄົມມິດຕະພາບນໍາກັນໃນເດືອນກຸມພາ 2022. ພິເສດໄດ້ເຊັນສັນຍາຍົກເວັ້ນວີຊ່າສະເພາະຜູ້ຖືໜັງສືຜ່ານແດນທາງການທູດໃນປີ 2017, ເຊັນບົດບັນທຶກການປຶກສາຫາລືລະຫວ່າງສອງກະຊວງການຕ່າງປະເທດລາວ-ອາຊັກໄບຊານໃນປີ 2017 ແລະ ບົດບັນທຶກການຮ່ວມມືລະຫວ່າງພັກປະຊາຊົນ ປະຕິວັດລາວ ແລະ ພັກອາຊັກໄບຊານໃນປີ 2018; ພ້ອມນີ້ທ່ານຍັງໄດ້ລາຍງານກ່ຽວກັບສະພາບການພົ້ນເດັ່ນຂອງ ສປປ ລາວໃນ 6 ເດືອນຕົ້ນປີ 2024 ເສດຖະກິດສືບຕໍ່ຂະຫຍາຍຕົວ ລວມຍອດຜະລິດຕະພັນພາຍໃນ (GDP) ສາມາດບັນລຸໄດ້ໃນລະດັບ 4.7%, ປັດຈຸບັນ, ສປປ ລາວ ກຳລັງດຳເນີນການປັບປຸງລັດຖະທຳມະໜູນ ສະບັບປີ 2015 ຄາດວ່າຈະໄດ້ຮັບການພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ IX ໃນຕົ້ນປີ 2025 ທີ່ຈະມາເຖິງນີ້, ສະພາແຫ່ງຊາດລາວ ແລະ ລັດຖະສະພາອາຊັກໄບຊານໄດ້ມີການພົວພັນ ແລະ ຮ່ວມມືທີ່ດີນໍາກັນ ເຖິງແມ່ນວ່າຍັງບໍ່ທັນມີການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນຳກັນເທົ່າທີ່ຄວນ ແຕ່ກໍໄດ້ມີການແລກປ່ຽນຂໍ້ມູນຂ່າວສານ, ສົ່ງສານອວຍພອນ, ສານຊົມເຊີຍໃນໂອກາດວັນສຳຄັນຕ່າງໆ ແລະ ມີການພົບປະນໍາກັນໃນໂອກາດກອງປະຊຸມລັດຖະສະພາລະດັບພາກພື້ນ ແລະ ສາກົນ ແລະ ໄດ້ມີຄໍາເຫັນສະເໜີບາງທິດທາງແຜນການ ການພົວພັນ ແລະ ຮ່ວມມື ໃນຕໍ່ໜ້າລະຫວ່າງສອງອົງການນິຕິບັນຍັດດັ່ງນີ້: ສະເໜີໃຫ້ສອງອົງການນິຕິບັນຍັດພວກເຮົາມີການແລກປ່ຽນຄະນະຜູ້ແທນນຳກັນ ທີ່ຕິດພັນກັບການແລກປ່ຽນປະສົບການທີ່ດີໃນການປະຕິບັດພາລະບົດບາດຂອງອົງການນິຕິບັນຍັດ ແລະ ບັນຫາອື່ນໆທີ່ມີຄວາມສົນໃຈຮ່ວມກັນ; ສະເໜີຊຸກຍູ້ໃຫ້ມີການແລກປ່ຽນໄປມາຫາສູ່ລະຫວ່າງປະຊາຊົນດ້ວຍກັນ, ໂຄສະ ນາເຜີຍແຜ່ຂໍ້ມູນຂ່າວສານ ແລະ ທ່າແຮງຂອງສອງປະເທດ ແລະ ສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນໃນເວທີລັດຖະສະພາພາກພື້ນ ແລະ ສາກົນ. ຂ່າວ: ຍຸພິນທອງ

ພາບ: ສຸກສະຫວັນ