ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ແຫ່ງ ສປປ ລາວ ໄດ້ພົບປະກັບທ່ານ ມອນເດີ ບູເດນ (Monder Bouden) ຮອງປະທານສະພາຜູ້ແທນປະຊາຊົນແຫ່ງຊາດ ແຫ່ງອານເຊຣີໃນວັນທີ 19 ຕຸລາຜ່ານມາ ທີ່ນະຄອນຫຼວງວຽງຈັນ.

ໂອກາດດັ່ງກ່າວ ທ່ານ ຄຳໃບ ດຳລັັດ ໄດ້ຕີລາຄາສູງຕໍ່ການເດີນທາງມາເຂົ້າຮ່ວມກອງປະຊຸມ ໄອປາ (AIPA) ຄັ້ງທີ 45 ທີ່ນະຄອນຫຼວງວຽງຈັນຂອງທ່ານ ມອນເດີ ບູເດນ ແລະ ຄະນະ ຊຶ່ງເປັນການໃຫ້ກໍາລັງໃຈ ແລະ ສະໜັບສະໜູນການປະຕິບັດພັນທະສາກົນຂອງສະພາແຫ່ງຊາດລາວ ໂດຍຈະສືບຕໍ່ໃນການເປັນປະທານໄອປາ (AIPA) ກໍ່ຄືເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ AIPA ຄັ້ງທີ 45 ໃນຄັ້ງນີ້ໃຫ້ສໍາເລັດຜົນຢ່າງຈົບງາມ ທັງເປັນການປະກອບ ສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດໃຫ້ນັບມື້ນັບຂະຫຍາຍຕົວ ແລະ ເປັນຮູບປະທໍາຍິ່ງໆຂຶ້ນ.

ສະພາແຫ່ງຊາດລາວ ແລະ ສະພາປະຊາຊົນແຫ່ງຊາດອານເຊຣີ ໄດ້ມີການແລກປ່ຽນສານຊົມ ເຊີຍ, ສານອວຍພອນໃນໂອກາດວັນສຳຄັນຕ່າງໆຂອງ 2 ປະເທດ, ສອງຝ່າຍຮ່ວມມື, ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນເວທີໄອປາ (ສະມັດຊາໃຫຍ່ລັດຖະສະພາອາຊຽນ), ອາເຊັບ (ການຮ່ວມມືລະຫວ່າງລັດຖະສະພາອາຊຽນ ແລະ ເອີຣົບ), ໄອພີຢູ (ສະມັດຊາສະຫະພາບລັດຖະສະພາໂລກ) (AIPA, ASEP, IPU) ແລະ ອົງການ ອື່ນໆ. ສຳລັບການພົວພັນຮ່ວມມືລະຫວ່າງສອງສະພາແຫ່ງຊາດໃນຕໍ່ໜ້າ. ສືບຕໍ່ແລກປ່ຽນການຢ້ຽມ ຢາມຂອງຄະນະຜູ້ແທນຂັ້ນສູງ, ກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາຂອງສອງປະເທດ, ຮ່ວມກັນຈັດກອງປະຊຸມສໍາມະນາ, ທັດສະນະສຶກສາ ແລະ ຈັດກອງປະຊຸມແບບເຊິ່ງໜ້າ ແລະ ຜ່ານລະບົບເອເລັກໂຕຣນິກນຳກັນ, ສືບຕໍ່ແລກປ່ຽນຄໍາເຫັນ, ຮ່ວມມື, ຊ່ວຍເຫຼືອ ແລະ ສະໜັບສະໜູນເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.

ຂ່າວ: ສຳນານ, ຮູບ: ສຸກສະຫວັນ