ກອງປະຊຸມກຳມາທິການເສດຖະກິດໄດ້ຈັດຂຶ້ນໃນຕອນເຊົ້າວັນທີ 20 ຕຸລານີ້ ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ລີເບິ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ແຫ່ງ ສປປລາວ; ມີສະມາຊິກລັດຖະສະພາ ຈາກບັນດາປະເທດສະມາຊິກອາຊຽນເຂົ້າຮ່ວມ.

ກອງປະຊຸມຄັ້ງນີ້, ໄດ້ຈັດຂຶ້ນໃນລະຫວ່າງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ໄອປາ (AIPA) ຄັ້ງທີ 45; ຊຶ່ງບັນດາກຳມາທິການເສດຖະກິດ ກໍຄືຜູ້ເຂົ້າຮ່ວມໄດ້ຮ່ວມກັນຄົ້ນຄວ້າ, ປຶກສາຫາລື ແລະ ພິຈາລະນາຮ່າງມະຕິຈຳນວນ 8 ສະບັບ ໃນຂົງເຂດວຽກງານເສດຖະກິດຄື: ຮ່າງມະຕິວ່າດ້ວຍການເສີມສ້າງຄວາມສາມາດໃນການຮັບມືໄຊເບີ້ ຜ່ານການຮ່ວມມືຂອງລັດຖະສະພາອາຊຽນກ້າວໄປສູ່ເສດຖະກິດດີຈີຕອນທີ່ປອດໄພ ແລະ ມີຊີວິດຊີວາ; ຮ່າງມະຕິວ່າດ້ວຍບົດບາດຂອງລັດຖະສະພາໃນການສະໜັບສະໜູນ ການປະຕິບັດຄໍາແນະນໍາຂອງອາຊຽນ ໃນການສົ່ງເສີມການລົງທຶນຢ່າງມີຄວາມຮັບຜິດຊອບໃນຂະແໜງການກະສິກຳ, ອາຫານ ແລະ ປ່າໄມ້; ຮ່າງມະຕິວ່າດ້ວຍບົດບາດຂອງລັດຖະສະພາໃນການສົ່ງເສີມການລະດົມທຶນ ເພື່ອພັດທະນາການເຊື່ອມຈອດພື້ນຖານໂຄງລ່າງຂອງພາກພື້ນ ແນໃສ່ບັນລຸແຜນແມ່ບົດການເຊື່ອມຈອດອາຊຽນໃນປີ 2025 ແລະ ໃນຕໍ່ໜ້າ; ຮ່າງມະຕິວ່າດ້ວຍບົດບາດລັດຖະສະພາໃນການຊຸກຍູ້ການເຊື່ອມໂຍງທາງດ້ານເຕັກໂນໂລຊີດີຈີຕອນອາຊຽນ ກ້າວໄປສູ່ການບັນລຸແຜນແມ່ບົດວ່າດ້ວຍການເຊື່ອມຈອດອາຊຽນ 2025 ແລະ ໃນຕໍ່ໜ້າ.

ພ້ອມນີ້, ກໍມີຮ່າງມະຕິວ່າດ້ວຍການເສີມຂະຫຍາຍ ສ້າງລະບົບການຄ້າກາກບອນຂອງອາຊຽນ ເພື່ອເຕີບໂຕແບບຍືນຍົງ ແລະ ຄວາມສົມດູນທາງດ້ານສິ່ງແວດລ້ອມໃຫ້ເປັນອັນໜຶ່ງອັນດຽວກັນ; ຮ່າງມະຕິວ່າດ້ວຍການໝູນໃຊ້ທ່າແຮງທາງດ້ານການທ່ອງທ່ຽວເຂົ້າໃນການຟື້ນຟູເສດຖະກິດຂອງອາຊຽນໃຫ້ມີຄວາມຍືນຍົງ; ຮ່າງມະຕິວ່າດ້ວຍການຍົກລະດັບຂີດຄວາມສາມາດຂອງສະຖາບັນ ເພື່ອເຊື່ອມຈອດດ້ານການຂົນສົ່ງ, ການບິນ ແລະ ທ່າເຮືອທາງທະເລຢູ່ໃນພາກພື້ນອາຊຽນ; ຮ່າງມະຕິວ່າດ້ວຍການສ້າງຕັ້ງສູນຄົ້ນຄວ້າປັນຍາປະດິດຂອງອາຊຽນ.

(ຂ່າວ-ພາບ: ສຸກສະຫວັນ)