ວິທະຍຸກະຈາຍສຽງຫວຽດນາມລາຍງານວ່າ: ໃນບົດລາຍງານອັບເດດສະພາບການເສດຖະກິດ ຫວຽດນາມ ສະບັບຫຼ້າສຸດເມື່ອບໍ່ດົນມານີ້, ທະນາຄານ Standard Chartered ຂອງ ອັງກິດ ໄດ້ຍົກລະດັບການຄາດຄະເນການເຕີບໂຕ GDP ປີ 2024 ຂອງ ຫວຽດນາມ ຂຶ້ນລະດັບ 6,8% (ຈາກ 6%) ຍ້ອນການເຕີບໂຕຂອງGDP ໃນໄຕມາດທີ III ລື່ນກາຍລະດັບການການຄາດຄະເນກ່ອນໜ້ານີ້.

ຂ່າວລະບຸວ່າ:ບັນດານັກຊ່ຽວຊານເສດຖະກິດຂອງທະນາຄານດັ່ງກ່າວລະບຸວ່າ,ກຳລັງໜູນການເຕີບໂຕເສດຖະກິດຂອງ ຫວຽດນາມ ເຂັ້ມແຂງພໍສົມຄວນດ້ວຍການປັບປຸງໃນຫຼາຍຂົງເຂດຊຶ່ງລວມມີ: ການນຳເຂົ້າ - ສົ່ງອອກ, ການຂາຍຍ່ອຍ, ອະສັງຫາລິມະຊັບ, ການທ່ອງທ່ຽວ, ການກໍ່ສ້າງ ແລະ ການຜະລິດ. ການຟື້ນຟູດ້ານການຄ້າ ແລະ ການເຄື່ອນໄຫວດຳເນີນທຸລະກິດເພີ່ມຂຶ້ນ ພ້ອມດ້ວຍການລົງທຶນໂດຍກົງຈາກຕ່າງປະເທດ ແມ່ນກຳລັງໜູນຂອງການເຕີບໂຕຕົ້ນຕໍໃນປີ 2025 ແລະ ໃນຕໍ່ໜ້າ. ໃນ 9 ເດືອນຕົ້ນປີ 2024, ຈໍານວນເງິນລົງທຶນໂດຍກົງຈາກຕ່າງປະເທດ (FDI) ເພີ່ມຂຶ້ນ 8% ເມື່ອທຽບໃສ່ໄລຍະດຽວກັນ. ລະດັບການເຕີບໂຕໃນຂົງເຂດການຜະລິດແມ່ນກຳລັງໜູນຕົ້ນຕໍ ຊ່ວຍໃຫ້ເສດຖະກິດ ຫວຽດນາມ ສືບຕໍ່ເປີດກວ້າງ, ດ້ວຍລະດັບການເຕີບໂຕໃນຂົງເຂດສົ່ງອອກບັນລຸ 15% ເມື່ອທຽບໃສ່ໄລຍະດຽວກັນຂອງປີກາຍ.