ຂ່າວຕ່າງປະເທດລາຍງານ ໃນວັນທີ 20 ຕຸລາ ຜ່ານມາວ່າ: ເຈົ້າໜ້າທີ່ຕຳຫຼວດສິງກະໂປ ໄດ້ດຳເນີນການສືບສວນສອບສວນຜູ້ຕ້ອງສົງໄສກະທໍາຄວາມຜິດຖານຫຼອກລວງຈໍານວນ 292 ຄົນ ທີ່ຖືກຈັບລະຫວ່າງການປະຕິບັດການບັງຄັບໃຊ້ກົດໝາຍ ໃນວັນທີ 4-17 ຕຸລາ ຜ່ານມາ.

ລາຍງານລະບຸວ່າ: ຜູ້ຕ້ອງສົງໄສເຫຼົ່ານີ້ກ່ຽວຂ້ອງກັບກໍລະນີຫຼອກລວງການຈ້າງງານ, ຫຼອກລວງເປັນໝູ່, ຫຼອກລວງໃຫ້ຮັກ, ຫຼອກລວງໃຫ້ລົງທຶນ, ຫຼອກລວງດ້ານອີຄອມເມີຊ ແລະຫຼອກລວງເປັນຜູ້ຊື້ປອມເກືອບ 1,300 ຄະດີຊຶ່ງເຮັດໃຫ້ມີຜູ້ເສຍຫາຍສູນເສຍເງິນຫຼາຍກວ່າ 10.3 ລ້ານສິງກະໂປ.

ທັງນີ້, ຜູ້ຕ້ອງສົງໄສເຫຼົ່ານີ້ຢູ່ພາຍໃຕ້ການສືບສວນສອບສວນຄວາມຜິດຖານສໍ້ໂກງ, ຟອກເງິນ ຫຼື ໃຫ້ບໍລິການຊຳລະເງິນໂດຍບໍ່ໄດ້ຮັບອະນຸຍາດ.