ກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45, ໄດ້ລົງເລິກຄົ້ນຄວ້າປຶກສາຫາລື, ພິຈາລະນາ ແລະ ຮັບຮອງເອົາຮ່າງມະຕິ ທັງໝົດ 37 ສະບັບ. ໃນນີ້, ຂົງເຂດການເມືອງ, ເສດຖະກິດ, ສັງຄົມມີ 5, ວຽກງານເພດຍິງ, ຊາວໜຸ່ມ ແລະ ວຽກງານຈັດຕັ້ງພາຍໃນໄອປາ. ນອກນັ້ນ, ມີກອງປະຊຸມຕ່າງໆທັງໝົດ 11 ກອງປະຊຸມ.

ກອງປະຊຸມໄອປາ ຄັ້ງທີ 45, ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ, ພາຍຫຼັງດໍາເນີນມາເປັນເວລາ 4 ມື້ (18-21 ຕຸລາ 2024) ໄດ້ປິດລົງດ້ວຍຜົນສໍາເລັດອັນຈົບງາມ ໃນວັນທີ 21 ຕຸລາ, ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ດ້ວຍຄໍາຂວັນ; “ບົດບາດຂອງລັດ ຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມ ລວມຂອງອາຊຽນ’’. ກອງປະຊຸມຄັ້ງນີ້, ມີຄະນະຜູ້ແທນບັນດາປະທານຈາກລັດຖະສະພາສະມາຊິກໄອປາ 8 ປະເທດ ລວມທັງໝົດປະມານ 600 ທ່ານ ເຂົ້າຮ່ວມ. ບັນດາປະທານລັດຖະສະພາ ແລະ ຫົວໜ້າຄະນະຜູ້ແທນແຕ່ລະປະເທດ ໄດ້ປະກອບຄໍາຄິດເຫັນ ພາຍໃຕ້ກອບຫົວຂໍ້ກອງປະຊຸມ ໂດຍຍົກໃຫ້ເຫັນສະພາບການຂອງໂລກ, ພາກພື້ນ ຊຶ່ງມີທັງກາລະໂອກາດ ແລະ ສິ່ງທ້າທາຍ. ພ້ອມກັນນີ້, ກໍໄດ້ຢໍ້າຄືນຄວາມໝາຍໝັ້ນຂອງຜູ້ນໍາລັດຖະສະພາສະມາຊິກໄອປາ ທີ່ຈະຕ້ອງເພີ່ມທະວີບົດບາດລັດຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕ ແບບກວມລວມ ຂອງອາຊຽນ.

ກອງປະຊຸມສະມັດຊາໃຫຍ່ໄອປາ ຄັ້ງທີ 45, ຍັງມີກອງປະຊຸມຕ່າງໆທັງໝົດ 11 ກອງປະຊຸມຄື: 1. ກອງປະຊຸມຄະນະບໍລິຫານງານໄອປາ; 2. ກອງປະຊຸມກຳມາທິການການເມືອງ; 3. ກອງປະຊຸມກຳມາທິການເສດຖະກິດ; 4. ກອງປະຊຸມກຳມາທິການວຽກງານສັງຄົມ; 5. ກອງປະຊຸມກຳມາທິການວຽກງານຈັດຕັ້ງພາຍໃນ; 6. ກອງປະຊຸມກຳມາທິການສະມາຊິກສະພາເພດຍິງ; 7. ກອງປະຊຸມສະມາຊິກລັດ ຖະສະພາໜຸ່ມໄອປາ; 8. ກອງປະຊຸມກຳມາທິການຖະແຫຼງການຮ່ວມ; 9. ກອງປະຊຸມພົບປະ ລະຫວ່າງກອງເລຂາໄອປາ ແລະ ກອງເລຂາອາຊຽນ; 10. ກອງປະຊຸມພົບປະກັບລັດຖະສະພາສັງເກດການ; 11. ກອງປະຊຸມເວທີຜູ້ນຳການເມືອງເພດຍິງ. ກອງປະຊຸມກຳມາທິການປະຈຳຕ່າງໆຂອງໄອປາ ໄດ້ລົງເລິກຄົ້ນຄວ້າປຶກສາຫາລື, ພິຈາລະນາ ແລະ ຮັບຮອງເອົາຮ່າງມະຕິ ທັງໝົດ 37 ສະບັບ. ໃນນີ້, ຂົງເຂດວຽກງານການເມືອງ 4 ສະບັບ, ຂົງເຂດວຽກງານເສດຖະກິດ 8 ສະບັບ, ຂົງເຂດວຽກງານສັງຄົມ 5 ສະບັບ, ວຽກງານເພດຍິງ 2 ສະບັບ, ວຽກງານຊາວໜຸ່ມ 3 ສະບັບ ແລະ ວຽກງານຈັດຕັ້ງພາຍໃນໄອປາ 15 ສະບັບ. ພ້ອມນີ້, ບັນດາຫົວໜ້າຄະນະຜູ້ແທນສະມາຊິກລັດຖະສະພາໄອປາ ກໍໄດ້ລົງນາມໃນຖະແຫຼງ ການຮ່ວມ ກອງປະຊຸມສະມັດຊາໃຫຍ່ໄອປາ ຄັ້ງທີ 45 ແລະ ໄດ້ຮັບຮອງເອົາປະເທດມາເລເຊຍ ເປັນເຈົ້າພາບ ຈັດກອງປະຊຸມສະມັດຊາໃຫຍ່ໄອປາ ຄັ້ງທີ 46 ໃນປີ 2025.

ໃນພິທີປິດກອງປະຊຸມ, ທ່ານ ໄຊສົມພອນ ພົມວິຫານ ກ່າວວ່າ: ສປປ ລາວ ມີຄວາມຍິນດີ ແລະ ພາກພູມໃຈ ທີ່ໄດ້ຮັບກຽດເປັນເຈົ້າພາບ ແລະ ປະທານກອງປະຊຸມ ໄອປາ ຄັ້ງທີ 45. ພວກເຮົາ ໄດ້ປຶກສາຫາລື ແລະ ຕົກລົງຫຼາຍຫົວຂໍ້ສໍາຄັນ ຕາມພາລະບົດບາດຂອງຕົນ ເພື່ອເປັນການສົ່ງເສີມ ແລະ ຮັດເເໜ້ນການຮ່ວມມືໃນຂະແໜງການນິຕິບັນຍັດ ກໍຄືເພື່ອປະກອບສ່ວນເຂົ້າໃນຂະບວນການສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ນຳເອົາຜົນປະໂຫຍດມາສູ່ປະຊາຊົນ, ທັງເປັນການປະກອບສ່ວນເຂົ້າໃນພາລະກິດລວມແຫ່ງການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກຂອງພາກພື້ນ. ບັນດາຍັດຕິທີ່ໄອປາໄດ້ຮັບຮອງເອົາໃນກອງປະຊຸມຄັ້ງນີ້ ກວມເອົາຂົງເຂດການເມືອງ, ເສດຖະກິດ, ສັງຄົມ, ແມ່ຍິງ, ຊາວໜຸ່ມ, ວຽກງານພາຍໃນ, ກອງປະຊຸມລະຫວ່າງອາຊຽນ ແລະ ໄອປາ ຊຶ່ງຈະເປັນເອກະສານພື້ນຖານສຳຄັນໃນການຜັນຂະຫຍາຍຄຳຂວັນສຳລັບການເປັນປະທານໄອປາ ຄັ້ງທີ 45 ຂອງ ສປປ ລາວ ໃນປີ 2024. ນອກຈາກນີ້, ໄດ້ມີກອງປະຊຸມຮ່ວມລະຫວ່າງ ໄອປາ ກັບ ລັດຖະສະພາປະເທດສັງເກດການ ເພື່ອເພີ່ມທະວີການຮ່ວມມື, ​ການສະ​ໜັບ​ສະ​ໜູນ, ແກ້​ໄຂ​ບັນຫາທີ່ເກີດຂຶ້ນ ແນໃສ່​ຮັບປະກັນການ​ເຊື່ອມຈອດ ​​​ແລະ ການ​ເຕີບໂຕແບບກວມລວມ.

ທ່ານ ໄຊສົມພອນ ພົມວິຫານ ກ່າວຕື່ມວ່າ: ເພື່ອເຮັດໃຫ້ຜົນຂອງກອງປະຊຸມໄອປາ ຄັ້ງນີ້ ໄດ້ຮັບການຈັດຕັ້ງຜັນຂະຫຍາຍໃຫ້ເປັນຮູບປະທຳ, ຂໍຮຽກຮ້ອງບັນດາສະມາຊິກລັດຖະສະພາລະຫວ່າງຊາດອາຊຽນ, ລັດຖະສະພາປະເທດສັງເກດການ ແລະ ຄູ່ຮ່ວມພັດທະນາໄອປາ ນຳເອົາເນື້ອໃນຈິດໃຈສຳຄັນຂອງບັນດາມະຕິຕ່າງໆ ກໍຄືຂໍ້ຕົກລົງຂອງກອງປະຊຸມ ໄປເຜີຍແຜ່ ແລະ ເຊື່ອມສານເຂົ້າໃນວຽກງານຂອງຕົນ​ ໃຫ້ປະກົດຜົນເປັນຈິງ, ສາມາດປະເມີນໄດ້ ແລະ ມີການລາຍງານຢ່າງເປັນລະບົບ. ນີ້ກໍເພື່ອຍົກສູງບົດບາດຂອງໄອປາ ໃນການຊຸກຍູ້ສົ່ງເສີມ​ການ​ຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ການສົ່ງເສີມປະຊາຄົມອາຊຽນ ໃຫ້ເຂັ້ມແຂງ ແລະ ເຮັດໃຫ້ເສດຖະກິດອາຊຽນ ມີຄວາມເຂັ້ມແຂງ, ເປີດກວ້າງ, ປະຊາຄົມມີຄວາມສາມັກຄີປອງດອງ, ມີການພັດທະນາທີ່ເທົ່າທຽມກັນ, ຊີວິດການເປັນຢູ່ຂອງປະຊາຊົນດີຂຶ້ນ ແລະ ພ້ອມກັນກ້າວໄປຂ້າງໜ້າ.

ໃນໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ໃຫ້ກຽດມອບທຸງໄອປາ ໃຫ້ແກ່ປະເທດມາເລເຊຍ ເປັນເຈົ້າພາບ ກອງປະຊຸມສະມັດຊາໃຫຍ່ໄອປາ ຄັ້ງທີ 46 ໃນປີ 2025 ເຊື່ອໝັ້ນວ່າ: ພາຍໃຕ້ການເປັນປະທານໄອປາ ຂອງມາເລເຊຍ ພວກເຮົາຈະປະສົບຜົນສຳເລັດໃໝ່ໃຫຍ່ຫຼວງກວ່າເກົ່າ.

ໂດຍ: ສີວັນ