ໂດຍ: ບຸນມີແສງທຸມມີ
ການກໍາເນີດຂອງລັດຖະບານສາທາລະນະລັດປະຊາທິປະໄຕ (ວັນທີ 2/9/1945) ແລະ ລັດຖະບານລາວອິດສະຫຼະລະ (ວັນທີ12/10/1945) ເປັນພື້ນຖານໃຫ້ແກ່ຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນລະຫວ່າງສອງຊາດລາວ-ຫວຽດນາມຍົກຂຶ້ນສູ່ລະດັບຮ່ວມສໍາພັນສູ້ຮົບ. ໃນນັ້ນ ທະຫານອາສາສະໝັກ ແລະ ຊ່ຽວຊານຫວຽດນາມເຄື່ອນໄຫວຢູ່ຜືນແຜ່ນດິນລາວເປັນສັນຍາລັກທີ່ງາມສະຫງ່າ, ຄວາມຜູກຜັນທີ່ແໜ້ນແຟ້ນຂອງນໍ້າໃຈສາມັກຄີພິເສດ.
ໃນວັນທີ 30/10/1949 ຄະນະປະຈໍາສູນກາງພັກຄອມມຸຍນິດອິນດູຈີນໄດ້ຕົກລົງ ໃຫ້ບັນດາກໍາລັງທະຫານຂອງຫວຽດນາມສູ້ຮົບ ແລະ ເຮັດວຽກງານຊ່ວຍລາວຈັດຕັ້ງເປັນລະບົບສະເພາະ ແລະ ຖືກໃສ່ຊື່ວ່າທະຫານອາສາສະໝັກ ນັບແຕ່ນັ້ນມາ. ວັນທີ30/10/1949 ໄດ້ຊື່ວ່າເປັນວັນມູນເຊື້ອທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ. ນີ້ແມ່ນຂີດໝາຍປະຫວັດສາດສໍາຄັນ, ສ່ອງແສງໃຫ້ເຫັນບາດກ້າວເຕີບໃຫຍ່ຂະຫຍາຍຕົວຂອງກໍາລັງການທະຫານເທິງສະໜາມຮົບລາວ, ຢັ້ງຢືນໃຫ້ເຫັນແນວທາງ, ທັດສະນະຖືກຕ້ອງຂອງພັກໃນການປະຕິບັດໜ້າທີ່ສາກົນ.
ດ້ວຍນໍ້າໃຈສາກົນກະມາຊີບ, ໂດຍປະຕິບັດຕາມຄໍາສັ່ງສອນຂອງປະທານໂຮ່ຈີມິນທີ່ວ່າ: ຊ່ວຍເພື່ອນໝາຍວ່າແມ່ນຊ່ວຍຕົນເອງ ທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວໄດ້ປະກອບສ່ວນຢ່າງໃຫຍ່ຫຼວງ, ສາມາດເຮັດສໍາເລັດໜ້າທີ່ຢ່າງໂດດເດັ່ນພ້ອມກັບກອງທັບ ແລະ ປະຊາຊົນບັນດາເຜົ່າຂອງລາວຍາດໄດ້ໄຊຊະນະຢ່າງສິ້ນເຊີງໃນສອງໄລຍະຂອງການຕໍ່ຕ້ານພວກລ່າເມືອງຂຶ້ນແບບເກົ່າຂອງຝຣັ່ງ ແລະ ລ່າເມືອງຂຶ້ນແບບໃໝ່ຂອງຈັກກະພັດອາເມລິກາ (1945-1975). ໃນຕະຫຼອດ 39 ປີປະຕິບັດໜ້າທີ່ສາກົນອັນສູງສົ່ງເທິງແຜ່ນດິນລາວ, ທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວໄດ້ພ້ອມກັບ ກໍາລັງປະກອບອາວຸດ ແລະ ປະຊາຊົນລາວ ບັນດາເຜົ່າຍາດໄດ້ໄຊຊະນະທີ່ລືຊື່ ລືຊາ, ປະກອບສ່ວນຢ່າງສົມກຽດໃນພາລະກິດປະຕິວັດທີ່ສະຫງ່າອົງອາດຂອງສອງພັກ, ສອງລັດ, ສອງກອງທັບແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ, ສົມກັບຄໍາຍ້ອງຍໍສັນລະເສີນຂອງການນໍາພັກ, ລັດ ແລະ ປະຊາຊົນລາວໄດ້ມອບໃຫ້ທີ່ວ່າ: ເທິງຜືນແຜ່ນດິນລາວ, ບໍ່ມີບ່ອນໃດທີ່ບໍ່ມີຮອຍຕີນຂອງທະຫານອາສາສະໝັກຫວຽດນາມ, ບໍ່ມີໄຊຊະນະໃດທີ່ບໍ່ມີການເສຍສະຫຼະປະກອບສ່ວນຂອງທະຫານອາສາສະໝັກຫວຽດນາມ.
ຈົດຈໍາການອຸທິດ, ເສຍສະຫຼະ ແລະ ຊ່ວຍເຫຼືອອັນໃຫຍ່ຫຼວງຂອງທະຫານອາສາສະໝັກ ແລະ ຊ່ຽວຊານທະຫານຫວຽດນາມຢູ່ລາວ, ໃນບົດຄໍາເຫັນຂໍ່ານັບຊົມເຊີຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ IV ຂອງພັກແຮງງານຫວຽດນາມ (ປີ1976) ເລຂາທິການໃຫຍ່ໄກສອນພົມວິຫານໄດ້ຢັ້ງຢືນວ່າ: “ທຸກຜົນສໍາເລັດຂອງການປະຕິວັດລາວລ້ວນແຕ່ມີການປະກອບສ່ວນໂດຍກົງຂອງການປະຕິວັດຫວຽດນາມ. ທະຫານອາສາສະໝັກ ແລະ ຊ່ຽວຊານການທະຫານຫວຽດນາມມີສິດເອກອ້າງຍ້ອນການປະກອບສ່ວນເລືອດເນື້ອເຂົ້າໃນໄຊຊະນະຂອງກອງທັບ ແລະ ປະຊາຊົນລາວຕະຫຼອດເສັ້ນທາງອັນຍາວໄກເປັນຫຼາຍສິບປີຕໍ່ສູ້ ແລະ ເຮັດວຽກງານເທິງຜືນແຜ່ນດິນປະເທດລ້ານຊ້າງວິລະຊົນ, ເຮັດສໍາເລັດໜ້າທີ່ຢ່າງດີເລີດ. ສໍາຄັນທີ່ສຸດໃນວັນທີ 30/4/1976 ກົມການເມືອງໄດ້ອອກມະຕິເລກທີ 251/NQ/TW ກ່ຽວກັບການເພີ່ມທະວີຄວາມສາມັກຄີ, ຊ່ວຍເຫຼືອ ແລະ ຮ່ວມມືກັບການປະຕິວັດລາວໃນໄລຍະໃໝ່. ມະຕິໄດ້ຊີ້ແຈງ ເພີ່ມທະວີຄວາມສາມັກຄີ, ຊ່ວຍເຫຼືອ ແລະ ຮ່ວມມືກັບລາວແມ່ນໜຶ່ງໃນບັນດາໜ້າທີ່ສາກົນຈັດເຂົ້າລໍາດັບຕົ້ນຂອງພັກ ແລະ ປະຊາຊົນຫວຽດນາມໃນສະພາບການປັດຈຸບັນ. ພັກ, ລັດ, ກອງທັບປະຊາຊົນລາວ ແລະ ພັກ, ລັດກອງທັບປະຊາຊົນຫວຽດນາມໄດ້ມອບຫຼາຍລາງວັນອັນປະເສີດສູງສົ່ງໃຫ້ທະຫານອາສາສະໝັກ ແລະ ຊ່ຽວຊານຫວຽດນາມ. ອຸທິດ, ຄວາມເສຍສະຫຼະອັນໃຫຍ່ຫຼວງຂອງທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ.
ໃນຊຸມປີຕໍ່ໜ້າ ຕໍ່ພາລະກິດກໍ່ສ້າງ ແລະ ປົກປັກຮັກສາຂອງສອງປະເທດ, ແນ່ໃສ່ເສີມຂະຫຍາຍໝາກຜົນອັນໃຫຍ່ຫຼວງໃນສາຍພົວພັນພິເສດ ແລະ ມູນເຊື້ອຮັກຊາດ; ລັດທິວິລະຊົນປະຕິວັດຂອງສອງຊາດຫວຽດນາມ-ລາວ, ມູນເຊື້ອສະຫງ່າງາມຂອງທະຫານອາສາສະໝັກ ແລະ ຊ່ຽວຊານຫວຽດນາມຢູ່ລາວ. ດັ່ງນັ້ນ, ລາວ-ຫວຽດນາມ ສືບຕໍ່ເພີ່ມທະວີ ແລະ ເສີມຂະຫຍາຍມູນເຊື້ອທີ່ປະເສີດ ຂອງສອງປະເທດ, ພິເສດແມ່ນບົດຮຽນແຕ່ລະບວນວິວັດເຄື່ອນໄຫວຂອງທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວມີຄວາມໝາຍສຸດທີ່ສໍາຄັນໃນການສືບຕໍ່ກໍ່ສ້າງປັບປຸງນໍ້າໃຈ ສາມັກຄີສູ້ຮົບພິເສດລະຫວ່າງປະຊາຊົນສອງປະເທດ. ເພື່ອເອກອ້າງທະນົງໃຈໃຫ້ປະຊາຊົນຫວຽດນາມ ແລະ ປະຊາຊົນລາວຮຸ້ນຕ່າງໆ ໂດຍສະເພາະແມ່ນຄົນຮຸ່ນໜຸ່ມ, ເພື່ອສືບຕໍ່ຖະນຸບໍາລຸງເພີ່ມພູນຄູນສ້າງສາຍພົວພັນພິເສດຂຶ້ນສູ່ລະດັບສູງໃໝ່ສົມທົບກັບການອຸທິດ, ເສຍສະຫຼະຂອງຮຸນຄົນກ່ອນ, ຮຸ່ນອ້າຍ, ຮຸ່ນນ້ອງທີ່ໄດ້ລົ້ມຫາຍຕາຍຈາກເພື່ອພາລະກິດເອກະລາດອິດສະຫຼະພາບຂອງສອງຊາດ ລາວ ແລະ ຫວຽດນາມ.
ໂດຍ: ບຸນມີແສງທຸມມີ
