ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 22 ຕຸລາ ຜ່ານມາ, ຢູ່ທຳນຽບປະທານປະເທດ ນະຄອນຫຼວງຮ່າໂນ້ຍ, ຫ້ອງວ່າການປະທານປະເທດ ຫວຽດນາມ ໄດ້ຈັດພິທີມອບ - ຮັບໜ້າທີ່ ປະທານປະເທດຫວຽດນາມ ຜູ້ເກົ່າ-ຜູ້ໃໝ່ ລະຫວ່າງ ທ່ານ ໂຕເລິມ ແລະ ທ່ານ ເລືອງເກື່ອງ. ເຂົ້າຮ່ວມພິທີ, ມີທ່ານ ຟ້າມມິງຈິງ ນາຍົກລັດຖະມົນຕີ, ທ່ານ ເຈິ່ນແທັງເໝິ້ນ ປະທານສະພາແຫ່ງຊາດ ຫວຽດນາມ.

ຂ່າວລະບຸວ່າ: ກ່າວຄຳເຫັນໃນພິທີ, ທ່ານ ໂຕເລິມ ປະທານປະເທດຜູ້ເກົ່າ ເຊື່ອໝັ້ນວ່າ: ທ່ານ ເລືອງເກື່ອງ ປະທານປະເທດຜູ້ໃໝ່ ຈະປະຕິບັດໜ້າຂອງຕົນຢ່າງວ່ອງໄວ, ທັນການ, ມີການຊີ້ນຳຢ່າງໃກ້ຊິດ, ປະສິດທິຜົນ. ນຳພາປະຊາຊົນປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກຢ່າງມີໄຊ, ນຳປະເທດຊາດກ້າວເຂົ້າສູ່ສັງກາດໃໝ່ທີ່ສົດໃສ, ສະຫງ່າອົງອາດ, ປະກອບສ່ວນເຂົ້າໃນການສ້າງສາ ແລະ ປົກປັກຮັກສາປະເທດ ຫວຽດນາມ ສັງຄົມນິຍົມ.

ໃນພິທີ, ທ່ານ ເລືອງເກື່ອງ ຢືນຢັນວ່າ: ຈະເສີມຂະຫຍາຍມູນເຊື້ອອັນສະຫງ່າລາສີຂອງຫ້ອງວ່າການປະທານປະເທດ ໃນຕະຫຼອດໄລຍະແຫ່ງການສ້າງສາ ແລະ ເຕີບໃຫຍ່ ມາເປັນເວລາ 75 ປີ, ສືບຕໍ່ຜົນສຳເລັດ ແລະ ຄຳຊີ້ນຳຂອງທ່ານ ໂຕເລິມ, ຂ້າພະເຈົ້າ ປາຖະໜາວ່າ: ບັນດາການນໍາ, ພະນັກງານ, ລັດຖະກອນ, ຜູ້ອອກແຮງງານຂອງຫ້ອງວ່າການປະທານປະເທດ ສືບຕໍ່ສາມັກຄີ, ເປັນເອກະພາບ. ເສີມຂະຫຍາຍນ້ຳໃຈຄວາມຮັບຜິດຊອບ, ຄວາມສຸດຈິດສຸດໃຈ, ດຸໝັ່ນ, ເປັນເຈົ້າການ, ປະດິດຄິດສ້າງ, ຍູ້ແຮງການແຂ່ງຂັນ, ສ້າງອົງຄະນະພັກ ແລະ ອົງການໃຫ້ປອດໃສ, ໝັ້ນຄົງເຂັ້ມແຂງ ຢ່າງຮອບດ້ານ, ປະຕິບັດທຸກໜ້າທີ່ເປັນຢ່າງດີ.