ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ໃນວາລະປຶກສາຫາລືຂັ້ນສູງ ກອງປະຊຸມສະມັດຊາໃຫຍ່ສະຫະປະຊາຊາດຊຸດທີ 78 ຢູ່ນະຄອນ ນິວຢອກ ປະເທດອາເມຣິກາ. ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ກ່າວບົດກ່າວປາໄສ ຫົວຂໍ້: “ພ້ອມກັນພະຍາຍາມເພື່ອປັບປຸງຄວາມໄວ້ເນື້ອເຊື່ອໃຈ, ສະແດງໃຫ້ເຫັນຄວາມຈິງໃຈ, ເພີ່ມທະວີຄວາມສາມັກຄີ, ຊຸກຍູ້ການຮ່ວມມື 2 ຝ່າຍ, ຫຼາຍຝ່າຍ, ຮັບມືກັບບັນດາສິ່ງທ້າທາຍທົ່ວໂລກຢ່າງມີປະສິດທິຜົນ, ທົ່ວປວງຊົນ, ຊຸກຍູ້ການພັດທະນາແບບຍືນຍົງ, ຖືປະຊາຊົນເປັນໃຈກາງ, ເປັນເຈົ້າກຳ, ແມ່ນເປົ້າໝາຍ, ແມ່ນກຳລັງຊຸກຍູ້ ແລະ ແມ່ນແຫຼ່ງກຳລັງຂອງການພັດທະນາ”.

ຂ່າວລະບຸວ່າ: ໃນບົດກ່າວປາໄສ, ທ່ານ ຟ້າມມິງຈິງ ໄດ້ເນັ້ນໜັກເຖິງການປັບປຸງ, ເພີ່ມທະວີບົດບາດຂອງສະຫະປະຊາຊາດ ແລະ ການເຂົ້າຮ່ວມຢ່າງຕັ້ງໜ້າຂອງທຸກໆປະເທດ ພ້ອມກັນຮ່ວມແຮງຮ່ວມໃຈແກ້ໄຂຄວາມຫຍຸ້ງຍາກ, ຜ່ານຜ່າສິ່ງທ້າທາຍ, ຊຸກຍູ້ສັນຕິພາບ, ການຮ່ວມມື ແລະ ການພັດທະນາຢ່າງວັດທະນາຖາວອນໃນທົ່ວໂລກ. ເພື່ອຮັບມືກັບບັນດາສິ່ງທ້າທາຍທົ່ວໂລກ ຕ້ອງມີບັນດາມາດຕະການແກ້ໄຂ; ພ້ອມກັນນັ້ນ, ບັນດາບັນຫາດັ່ງກ່າວກໍໄດ້ສົ່ງຜົນກະທົບເຖິງທຸກໆປະເທດ, ສະນັ້ນ ຕ້ອງມີວິທີສຳຜັດທົ່ວປວງຊົນ, ສັງລວມ, ຮອບດ້ານ ແລະ ກວມລວມ. ຖືເອົາຄວາມຈິງໃຈ, ປັບປຸງຄວາມໄວ້ເນື້ອເຊື່ອໃຈຍຸດທະສາດເປັນປະຖົມປັດໄຈ, ຍົກລະດັບຄວາມຮັບຜິດຊອບຂອງບັນດາປະເທດເປັນພື້ນຖານ. ຄວາມຮັບຜິດຊອບແມ່ນການປະຕິບັດຕາມບັນດາຄຳໝັ້ນສັນຍາສາກົນ, ກົດໝາຍສາກົນ ແລະ ກົດບັດສະຫະປະຊາຊາດ. ໃນນັ້ນ, ບັນດາປະເທດໃຫຍ່ໄດ້ເຮັດບົດບາດສຳຄັນ, ນຳໜ້າໃນການເພີ່ມພູນຄູນສ້າງຄວາມໄວ້ເນື້ອເຊື່ອໃຈ, ແຜ່ຂະຫຍາຍຄວາມຈິງໃຈ ແລະ ນ້ຳໃຈຄວາມຮັບຜິດຊອບ, ພ້ອມທັງໃຫ້ຄຳໝັ້ນສັນຍາຢ່າງແຮງ, ຊ່ວຍເຫຼືອຢ່າງຮອບດ້ານໃຫ້ແກ່ການພັດທະນາທົ່ວໂລກໃຫ້ຫຼາຍກວ່າເກົ່າອີກ.