ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 27 ຕຸລາ ຜ່ານມາທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ເດີນທາງຢ້ຽມຢາມ ສະຫະລັດ ອາຣັບ ເອມີເລດ (UAE),ກາຕາ ແລະ ເຂົ້າຮ່ວມກອງປະຊຸມ ຂໍ້ລິເລີ່ມລົງທຶນອະນາຄົດ ຄັ້ງທີ 8 ຢູ່ ອາຣັບບີ ຊາອຸດິດ ໃນລະຫວ່າງວັນທີ 27 ຕຸລາ ຫາ ວັນທີ 1 ພະຈິກ 2024 ຕາມຄຳເຊື້ອເຊີນຂອງທ່ານ ໂມຮາເໝັດ ບິນ ຊາເຍດ ອັລ ນາຍານ ປະທານາທາບໍດີຂອງ UAE, ທ່ານ ຊີກ ໂມຮາເໝັດ ບິນ ອັບດຸລເຮາະມານ ບິນ ຈາຊິມ ອັລ-ທານີ ນາຍົກລັດຖະມົນຕີ ກາຕາ, ທ່ານ ໂມຮາເໝັດ ບິນ ຊາລມານ ນາຍົກລັດຖະມົນຕີ ອາຣັບບີ ຊາອຸດິດ.

ການຢ້ຽມຢາມຄັ້ງນີ້ແມ່ນການຢ້ຽມຢາມຢ່າງເປັນທາງການຂອງ ນາຍົກລັດຖະມົນຕີ ຫວຽດນາມ ຢູ່ UAE ແລະ ກາຕາ ພາຍຫຼັງ 15 ປີ ແລະ ກໍເປັນຄັ້ງທຳອິດທີ່ ນາຍົກລັດຖະມົນຕີ ຫວຽດນາມ ເປັນການນຳຂັ້ນສູງພຽງຜູ້ດຽວ ຂອງ ອາຊີ ກ່າວຄຳເຫັນໃນກອງປະຊຸມ ຂໍ້ລິເລີ່ມລົງທຶນອະນາຄົດ ຄັ້ງທີ 8 ທີ່ຈັດໂດຍ ອາຣັບບີ ຊາອຸດິດ.