ສະຖາບັນເຕັກໂນໂລຊີການສື່ສານຂໍ້ມູນຂ່າວສານ(ສຕສ)ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີລົງນາມສັນຍາຮ່ວມມື(MOA)ໂຄງການພັດທະນາຊັບພະຍາກອນມະນຸດ ທາງດ້ານໄອຊີທີ ລະຫວ່າງ ສຕສ ແລະ ບໍລິສັດ ຮຸ່ງອາລຸນ ເຕັກໂນໂລຊີ ຈໍາກັດ (HAL)ໃນວັນທີ 28 ຕຸລານີ້ ທີ່ນະຄອນຫຼວງວຽງຈັນ.ເປັນກຽດຮ່ວມລົງນາມໂດຍທ່ານ ປະດັບໄຊ ໄຊຍະໂຄດຫົວໜ້າສະຖາບັນກະຊວງເຕັກໂນໂລຊີ ແລະ ການສື່ສານ, ທ່ານ ພຸດ ສີສຸພັນອໍານວຍການບໍລິສັດ ຮຸ່ງອາລຸນ ເຕັກໂນໂລຊີ ຈຳກັດ, ເຂົ້າຮ່ວມໂດຍ ທ່ານ ແກ້ວວິສຸກ ໂສລະພົມຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ສີສະຫວັນ ມາຢົງເຊິນປະທານກຸ່ມບໍລິສັດ ຮຸ່ງອາລຸນ ເຕັກໂນໂລຊີ ຈຳກັດ ພ້ອມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງ.

ທ່ານ ປະດັບໄຊ ໄຊຍະໂຄດ ກ່າວວ່າ: ການຮ່ວມມືດັ່ງກ່າວ ເປັນແຜນການຂະຫຍາຍຄູ່ຮ່ວມມືໃນການສ້າງໂຄງການຝຶກອົບຮົມຊັບພະຍາກອນມະນຸດ ທາງດ້ານໄອຊີທີເພື່ອພັດທະນາຊັບພະຍາກອນດ້ານໄອຊີທີ ໃຫ້ກັບພາກລັດ ແລະ ເອກະຊົນ, ເປີດກວ້າງໃຫ້ກັບພະນັກງານ, ນັກສຶກສາ ແລະ ບຸກຄົນທົ່ວໄປທີ່ມີຄວາມສົນໃຈຢາກຍົກລະດັບຄວາມຮູ້ດ້ານໄອຊີທີ, ເພື່ອປະກອບສ່ວນຊຸກຍູ້ແນວທາງການຫັນ ເປັນດີຈີຕອນ ຂອງລັດຖະບານ ແລະ ຄວາມຮຽກຮ້ອງຕ້ອງການຂອງຕະຫຼາດແຮງງານ ທາງດ້ານໄອຊີທີ ຢູ່ ສປປ ລາວ.

ເນື້ອໃນຂອງຮ່າງສັນຍາຮ່ວມມືປະກອບດ້ວຍຫຼາຍດ້ານ ເປັນຕົ້ນແມ່ນເປັນການຮ່ວມມື ເພື່ອຝຶກອົບຮົມບຸກຄະລາກອນທາງດ້ານໄອຊີທີ ໃນຂອບເຂດທົ່ວປະເທດພາຍໃຕ້ຫົວຂໍ້: ຝຶກອົບຮົມຫຼັກສູດການພັດທະນາເວັບໄຊ, ຝຶກອົບຮົມຫຼັກສູດການພັດທະນາແອັບມືຖື, ຝຶກອົບຮົມຫຼັກສູດຄວາມປອດໄພທາງດ້ານເຕັກໂນໂລຊີ, ຝຶກອົບຮົມຫຼັກສູດການນຳໃຊ້ AI, ຝຶກອົບຮົມຫຼັກສູດການວິເຄາະຂໍ້ມູນ, ຝຶກອົບຮົມຫຼັກສູດການບໍລິຫານໂຄງການ, ຝຶກອົບຮົມຫຼັກສູດການອອກແບບ UX & UI ແລະ ຫຼັກສູດການອອກແບບກຣາບຟິກ.

ການຮ່ວມມືໃນຄັ້ງນີ້ ເປັນຂີດໝາຍອັນສໍາຄັນທາງດ້ານການພັດທະນາຊັບພະຍາກອນມະນຸດ ແລະ ສອດຄ່ອງກັບທິດທາງວິໄສທັດແຜນຍຸດທະສາດ ການຫັນເປັນດີຈີຕອນ ຊຶ່ງວຽກງານກໍ່ສ້າງບຸກຄະລາກອນອັນເປັນພື້ນຖານ ແລະ ໃຈກາງຂອງການຫັນປ່ຽນທາງດ້ານເຕັກນິກນະໂຍບາຍ ແລະ ແນວທາງ ໃຫ້ກ້າວໜ້າໃນທ່ວງທ່າທີ່ໝັ້ນຄົງ, ເຂັ້ມແຂງກຸ້ມຕົນເອງ ແລະ ສ້າງແຮງງານລາວຍົກລະດັບຂີດຈໍາກັດໃຫ້ຂຶ້ນສູ່ເວທີສາກົນ.ນອກຈາກນັ້ນ ໃນວາລະ ຍັງໄດ້ມີການເປີດບໍລິສັດຮຸ່ງອາລຸນເຕັກໂນໂລຊີ ຈໍາກັດອີກດ້ວຍ. (ຂ່າວ-ພາບ: ແສງຈັນ)