ກອງປະຊຸມພົບປະສອງຝ່າຍລະຫວ່າງສານປະຊາຊົນແຂວງໄຊຍະບູລີ ແລະ ສານປະຊາຊົນນະຄອນຫາຍຟ່ອງ ສສ ຫວຽດນາມ ໄດ້ຈັດຂຶ້ນໃນວັນທີ 28 ຕຸລາຜ່ານມາ ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ຊຶ່ງແຂວງໄຊຍະບູລີນໍາໂດຍ ທ່ານ ສົມລິດ ໄຊຈັນທາ ຮອງປະທານສານປະຊາຊົນແຂວງ ພ້ອມດ້ວຍຄະນະ, ນະຄອນຫາຍຟ່ອງ ທ່ານ ຟ້າມດຶກ ຕວຽນ ປະທານສານປະຊາຊົນນະຄອນຫາຍຟ່ອງ ພ້ອມດ້ວຍຄະນະ.

ທ່ານ ສົມລິດ ໄຊຈັນທາ ໄດ້ລາຍງານວ່າ: ສານປະຊາຊົນແຂວງໄຊຍະບູລີ ປະກອບມີ 6 ຄະນະສານຄື: ຄະນະສານແພ່ງ, ຄະນະສານອາຍາ, ຄະນະສານແຮງງານ, ຄະນະສານການຄ້າ, ຄະນະສານຄອບຄົວ ແລະ ຄະນະສານເດັກ. ໃນໄລຍະໜຶ່ງປີຜ່ານມາສານປະຊາຊົນແຂວງໄຊຍະບູລີ ມີຄະດີທັງໝົດ 385 ເລື່ອງ ເປັນຂັ້ນຕົ້ນ 377 ເລື່ອງ, ຂັ້ນອຸທອນ 8 ເລື່ອງ. ໃນນີ້, ເປັນຄະດີອາຍາ 338 ເລື່ອງ, ຄະດີແພ່ງ 21 ເລື່ອງ, ຄະດີຄອບຄົວ 6 ເລື່ອງ, ຄະດີການຄ້າ 8 ເລື່ອງ, ຄະດີເດັກ 12 ເລື່ອງ. ໜຶ່ງປີຜ່ານມາມີຄະດີທັງໝົດ 243 ເລື່ອງ ເປັນຄະດີອາຍາ 95 ເລື່ອງ, ຄະດີແພ່ງ 108 ເລື່ອງ, ຄະດີຄອບຄົວ 26 ເລື່ອງ, ຄະດີແຮງງານ 1 ເລື່ອງ. ຈາກນັ້ນ ທັງສອງຝ່າຍຍັງໄດ້ພ້ອມກັນ ປະກອບຄໍາຄິດຄໍາເຫັນຢ່າງກົງໄປກົງມາເພື່ອໃຫ້ການພົບປະແລກປ່ຽນບົດຮຽນໃນຄັ້ງນີ້ໄດ້ຮັບຜົນຕາມຄາດໝາຍທີ່ວາງໄວ້.

(ຂ່າວ+ພາບ: ຄໍາໝັ້ນ)