ສະຫາຍ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບຮອງຫົວໜ້າຄະນະຊີ້ນຳການຝຶກຊ້ອມກອບກູ້ໄພພິບັດຮ່ວມ 3 ກອງທັບລາວ, ຫວຽດນາມ ແລະ ກຳປູເຈຍ ພ້ອມຄະນະ ໄດ້ລົງຕິດຕາມ ແລະ ຮັບຊົມການຝຶກຊ້ອມກອບກູ້ໄພພິບັດ ຝ່າຍດຽວ ຢູ່ ສະໜາມຝຶກຊ້ອມກອບກູ້ໄພພິບັດອ່າງນ້ຳຫຸມ ຫວ່າງບໍ່ດົນມານີ້.

ການຝຶກຊ້ອມທົດລອງຄັ້ງນີ້, ເປັນການຝຶກຊ້ອມເພື່ອກະກຽມຄວາມພ້ອມໃນການເຂົ້າຮ່ວມຝຶກຊ້ອມກອບກູ້ໄພພິບັດຮ່ວມ 3 ກອງທັບ ກໍາປູເຈຍ-ລາວ-ຫວຽດນາມ ທີ່ຈະຈັດຂຶ້ນໃນລະຫວ່າງເດືອນພະຈິກ 2024 ທີ່ປະເທດກໍາປູເຈຍ. ໃນນີ້, ມີການສະແດງສວນສະໜາມ, ການສະແດງຝຶກຊ້ອມກອບກູ້ຊ່ວຍເຫຼືອຜູ້ປະສົບໄພພິບັດ ທາງນ້ຳ ແລະ ທາງບົກ ສົມທົບກັບການສະແດງປະຖົມພະຍາບານຂັ້ນຕົ້ນ ແລະ ຄັດເລືອກໄຈ້ແຍກຜູ້ບາດເຈັບນຳສົ່ງໂຮງໝໍແຕ່ລະຂັ້ນ (ໜັກ, ກາງ, ເບົາ) ຕາມບາດກ້າວການຝຶກຊ້ອມ.

ໂອກາດນີ້, ສະຫາຍ ພົນຕີ ສົມພອນ ມິດຕະພອນ ໄດ້ເນັ້ນໜັກໃຫ້ແຕ່ລະເຫຼົ່າຮົບເອົາໃຈໃສ່ປະສານສົມທົບກັນຢ່າງຕັ້ງໜ້າ ເພື່ອຈັດຕັ້ງປະຕິບັດບັນດາໜ້າວຽກທີ່ຍັງບໍ່ທັນແລ້ວ ໃຫ້ມີຜົນສໍາເລັດຕາມເວລາທີ່ໄດ້ກຳນົດໄວ້ ເພື່ອຈັດຕັ້ງຜັນຂະຫຍາຍເນື້ອໃນການກອບກູ້ໄພພິບັດພາຍໃນປະເທດ ແລະ ເພື່ອກະກຽມເຂົ້າຮ່ວມການຝຶກຊ້ອມຮ່ວມ 3 ກອງທັບ ກໍາປູເຈຍ-ລາວ-ຫວຽດນາມ ທີ່ຈະຈັດຂຶ້ນໃນລະຫວ່າງເດືອນພະຈິກ 2024 ທີ່ປະເທດກໍາປູເຈຍ ເປັນເຈົ້າພາບ ໃຫ້ໄດ້ຮັບໝາກຜົນຢ່າງຈົບງາມ.

(ຂ່າວ-ພາບ: ໜັງສືພິມກອງທັບ)