ໜ່ວຍຮາກຖານຊາວໜຸ່ມອົງການກາແດງ ແຂວງສາລະວັນ ໄດ້ສຳເລັດກອງປະຊຸມໃຫຍ່ ຄັ້ງທີ III ເມື່ອໃນວັນທີ 29 ຕຸລາຜ່ານມາ, ໂດຍການເປັນປະທານຂອງ ສະຫາຍ ສີປະເສີດ ຈະເລີນສຸກ ເລຂາໜ່ວຍຮາກຖານຊາວໜຸ່ມອົງການກາແດງແຂວງ, ໃຫ້ກຽດເຂົ້າຮ່ວມຂອງສະຫາຍ ນາງ ອ່ອນສາ ຄໍາໄພວັນ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ດາວັນ ພວງຈໍາປາ ຮອງເລຂາໜ່ວຍພັກ ວ່າການຫົວໜ້າອົງການກາແດງແຂວງ, ມີບັນດາແຂກຖືກເຊີນຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.

ສະຫາຍ ລັດສະດາ ກຸນນະວົງ ຮອງເລຂາໜ່ວຍຮາກຖານຊາວໜຸ່ມ ໄດ້ຜ່ານຮ່າງບົດລາຍງານການເມືອງ ວ່າ: ໄລຍະ 5 ປີຜ່ານມາ ໜ່ວຍຮາກຖານຊາວໜຸ່ມ ຖືສໍາຄັນໃນການສຶກສາອົບຮົມການເມືອງ-ແນວຄິດ ເປັນກົກ, ຖືເອົາການເຊື່ອມຊຶມບັນດາມະຕິ, ຄຳສັ່ງ, ວັນສຳຄັນຕ່າງໆຂອງພັກ, ຂອງຊາດ ໃຫ້ກັບສະມາຊິກຊາວໜຸ່ມ ເຮັດໃຫ້ມີແນວຄິດອຸ່ນອ່ຽງທຸ່ນທ່ຽງ, ເຊື່ອໝັ້ນຕໍ່ແນວທາງການນໍາພາຂອງພັກ, ການປັບປຸງການຈັດຕັ້ງ ແລະ ຂະຫຍາຍສະມາຊິກຊາວໜຸ່ມ, ທັງໄດ້ຕິດຕາມກໍ່ສ້າງເພື່ອຂະຫຍາຍເຂົ້າອົງການຈັດຕັ້ງພັກ, ດ້ານວຽກງານຂະບວນການ ກໍໄດ້ຕັ້ງໜ້າຈັດຕັ້ງປະຕິບັດ ໂດຍສະເພາະຊາວໜຸ່ມຕະລຸມບອນ ໄດ້ໃຫ້ການຊ່ວຍເຫຼືອສັງຄົມ ເຊັ່ນ: ແຈກຢາຍນ້ຳໃຫ້ແຮງງານລາວ ໄລຍະພະຍາດໂຄວິດ-19 ແຜ່ລະບາດ. ດ້ານວຽກງານວິຊາສະເພາະ ກໍໄດ້ເປັນເຈົ້າການໃນການເຄື່ອນໄຫວຕາມພາລະບົດບາດ, ໜ້າທີ່ ເປັນຕົ້ນ: ການເຄື່ອນໄຫວສົ່ງເສີມການບໍລິຈາກເລືອດ, ຂົນຂວາຍແຫຼ່ງທຶນ-ຊ່ວຍເຫຼືອບັນເທົ່າທຸກ ເປັນຕົ້ນ: ຢູ່ເມືອງສະໜາມໄຊ ແຂວງອັດຕະປື, ຢູ່ເມືອງສະໝ້ວຍ ຮ່ວມກັບກາແດງລາວ, ລົງມອບເຄື່ອງຊ່ວຍເຫຼືອບັນເທົາທຸກໃຫ້ກັບຄອບຄົວທີ່ຖືກໄຟໄໝ້ເຮືອນ, ລົມພະຍຸພັດ ຈໍານວນ 8 ເມືອງ, ມີ 92 ບ້ານ, 181 ຄອບຄົວ. ນອກນັ້ນ ກໍໄດ້ສົມທົບກັບອົງການກາແດງລາວ ເຄື່ອນໄຫວເກັບກຳຂໍ້ມູນ ແລະ ມອບເຄື່ອງຊ່ວຍເຫຼືອຄອບຄົວທີ່ຖືກໄພນໍ້າຖ້ວມ 3 ເມືອງ, 20 ບ້ານ, ມີ 1,273 ຄອບຄົວ, ມີ 9,684 ຄົນ. ຕິດຕາມທະນາຄານງົວບ້ານອາແດງ, ໂກຕາຍ ທີ່ເປັນທຶນສົ່ງເສີມຊ່ວຍເຫຼືອປະຊາຊົນ ແລະ ໄດ້ເຄື່ອນໄຫວວຽກງານປີ່ນອ້ອມອື່ນໆ. ຈາກນັ້ນ, ກໍ່ໄດ້ມີການຜ່ານບົດສໍາຫຼວດ ແລະ ກ່າວລາໜ້າທີ່ຂອງຄະນະຊຸດເກົ່າ, ຜ່ານມາດຖານເງື່ອນໄຂຂອງຜູ້ສະໝັກຊຸດໃໝ່ ຊຶ່ງມີຜູ້ສະໝັກ 5 ສະຫາຍ, ຍິງ 3 ສະຫາຍ, ເລຶອກເອົາ 2 ສະຫາຍ. ກອງປະຊຸມຄັ້ງປະຖົມມະລຶກເລືອກເອົາ ສະຫາຍ ສີປະເສີດ ຈະເລີນສຸກ ເປັນເລຂາໜ່ວຍຮາກຖານຊາວໜຸ່ມ, ສະຫາຍ ລັດສະດາ ກຸນນະວົງ ເປັນຮອງ ທັງເປັນປະທານກວດກາໜ່ວຍຊາວໜຸ່ມ.

(ຂ່າວ: ວິໄລວອນ ສິດທິໄຊ)