ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 28 ຕຸລາ ຜ່ານມາຢູ່ນະຄອນຫຼວງຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ເຂົ້າຮ່ວມ ແລະ ກ່າວຄຳເຫັນໃນພິທີສະເຫຼີມສະຫຼອງ 75 ປີແຫ່ງວັນມູນເຊື້ອຂອງຄະນະພົວພັນຕ່າງປະເທດສູນກາງພັກ ຫວຽດນາມ (1 ພະຈິກ 1949 – 1 ພະຈິກ 2024).

ຂ່າວລະບຸວ່າ, ທ່ານ ໂຕເລິມ ກ່າວຄຳເຫັນໃນພິທີສະເຫຼີມສະຫຼອງວ່າ: ໂລກພວມຢູ່ໃນໄລຍະປ່ຽນແປງທີ່ມີລັກສະນະຍຸກສະໄໝ, ສະພາບແວດລ້ອມແຫ່ງຄວາມໝັ້ນຄົງສາກົນ ນັບມື້ນັບມີການຜັນແປທີ່ສັບສົນ, ມີຄວາມເຄັ່ງຕຶງ.ສະພາບການໃນປັດຈຸບັນວາງອອກຄວາມຮຽກຮ້ອງຕ້ອງການໃໝ່ຢູ່ລະດັບສູງຕໍ່ການກຳນົດ ແລະ ຈັດຕັ້ງປະຕິບັດແນວທາງການຕ່າງປະເທດຂອງພັກໃນໄລຍະໃໝ່ ແລະ ນີ້ກໍແມ່ນໜ້າທີ່ໆມີກຽດອັນສະຫງ່າຂອງຄະນະພົວພັນຕ່າງປະເທດສູນກາງພັກ. ບົນຈິດໃຈນັ້ນ, ທ່ານເລຂາທິການໃຫຍ່ໄດ້ເຈາະຈີ້ມ5 ບັນຫາ ເພື່ອໃຫ້ຄະນະພົວພັນຕ່າງປະເທດສູນກາງພັກ ສຸມໃສ່ຜັນຂະຫຍາຍປະຕິບັດໃນໄລຍະຈະມາເຖິງ, ໃນນັ້ນຕ້ອງປະຕິບັດເປັນຢ່າງດີວຽກງານເປັນເສນາທິການກຳນົດແນວທາງການຕ່າງປະເທດ ຂອງພັກ ໃນໄລຍະໃໝ່, ປະກອບສ່ວນປະຕິບັດບັນດາເປົ້າໝາຍຍຸດທະສາດ 100 ປີຢ່າງໄຊ ພາຍໃຕ້ການຊີ້ນຳ-ນຳພາຂອງພັກ (1930 - 2030), 100 ປີແຫ່ງວັນສະຖາປະນາ ປະເທດສາທາລະນະລັດ ປະຊາທິປະໄຕ ຫວຽດນາມ, ປັດຈຸບັນແມ່ນ ປະເທດ ສາທາລະນະລັດ ສັງຄົມນິຍົມ ຫວຽດນາມ (1945-2045).

ທ່ານ ເນັ້ນໜັກວ່າ: ຕ້ອງກຳນົດທິດເພື່ອເສີມຂະຫຍາຍກຳລັງພາຍໃນຢ່າງແຂງແຮງ, ຍາດແຍ່ງທຸກໂອກາດ, ຄວາມສະດວກຢ່າງສຸດຂີດ ເພື່ອຍູ້ໃຫ້ທຸກຄວາມສ່ຽງ, ສິ່ງທ້າທາຍຖອຍໄປ, ເປີດກວ້າງເຂດຄົງຕົວ, ເພີ່ມແຫຼ່ງກຳລັງ ໃຫ້ແກ່ການສ້າງສາ ແລະ ປົກປັກຮັກສາປະເທດຊາດ, ພັດທະນາປະເທດຊາດໃນສະພາບການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ; ສ້າງການບຸກບືນ, ເພີ່ມທະວີການປະກອບສ່ວນ ແລະ ຄວາມຮັບຜິດຊອບ ຂອງ ຫວຽດນາມ ບົນພື້ນຖານການເມືອງໂລກ, ເສດຖະກິດທົ່ວໂລກ, ອະລິຍະທຳຂອງມວນມະນຸດ ແລະ ຂະບວນການປະຕິວັດໂລກ.