ຂ່າວຕ່າງປະເທດລາຍງານ ໃນວັນທີ 27 ຕຸລາ ຜ່ານມາວ່າ: ທ່ານ ເມົາ ຮາວັນນໍລ ລັດຖະມົນຕີປະຈຳສຳນັກງານເລຂາທິການການບິນພົນລະເຮືອນ ລາຍງານວ່າ: ກໍາປູເຈຍຮອງຮັບຜູ້ໂດຍສານເຮືອບິນຫຼາຍກວ່າ 4.5 ລ້ານຄົນ ໃນລະຫວ່າງເດືອນມັງກອນ - ກັນຍາປີ 2024ເພີ່ມຂຶ້ນປະມານ 22% ຈາກ3.7 ລ້ານຄົນໃນໄລຍະດຽວກັນຂອງປີ 2023.

ທ່ານ ເມົາ ຮາວັນນໍລ ກ່າວວ່າ: ສາຍການບິນພາຍໃນປະເທດແລະຕ່າງປະເທດ 31 ແຫ່ງ ໄດ້ໃຫ້ບໍລິການຖ້ຽວບິນຊຶ່ງເຊື່ອມຕໍ່ກຳປູເຈຍ ກັບ 8 ປະເທດໃນອາຊຽນ ລວມເຖິງຈີນ, ສ ເກົາຫຼີ, ອິນເດຍ, ກາຕາ, ສະຫະລັດ ອາຣັບ ເອມິເຣດ ແລະອື່ນໆ.

ທ່ານ ເມົາ ຮາວັນນໍລໄດ້ເປີດເຜີຍໂຕເລກດັ່ງກ່າວໃນໂອກາດເປີດຖ້ຽວບິນໂດຍກົງລະຫວ່າງນະຄອນຫຼວງພະນົມເປັນແລະ ນະຄອນຫຼວງຮ່າໂນ້ຍຂອງຫວຽດນາມ ຊຶ່ງໃຫ້ບໍລິການໂດຍສາຍການບິນຫວຽດນາມແອລາຍ (Vietnam Airlines).

ທ່ານ ສິນ ຈັນສະຣູວຸດ ຜູ້ຊ່ວຍເລຂາທິການແລະໂຄສົກສຳນັກງານເລຂາທິການ ການບິນພົນລະເຮືອນກຳປູເຈຍ ເຊື່ອໝັ້ນວ່າສະໜາມບິນສາກົນສຽມຣາດອັງກໍ ທີ່ລົງທຶນໂດຍຈີນ ຊຶ່ງເປີດບໍລິການຢ່າງເປັນທາງການໃນເດືອນພະຈິກ 2023 ຈະຊ່ວຍດຶງດູດສາຍການບິນແລະຜູ້ໂດຍສານຕ່າງປະເທດເຂົ້າມາຍັງກໍາປູເຈຍເພີ່ມຫຼາຍຂຶ້ນ. ທ່ານກ່າວຕື່ມວ່າ: ພວກເຮົາຫວັງວ່າສະໜາມບິນແຫ່ງນີ້ຈະດຶງດູດສາຍການບິນຕ່າງປະເທດໃໝ່ໆມາໃຫ້ບໍລິການຖ້ຽວບິນສູ່ແຂວງສຽມຣຽບ ຊຶ່ງແມ່ນສະຖານທີ່ຕັ້ງຂອງອຸທິຍານບູຮານຄະດີອັງກໍ ທີ່ຖືກຈັດເປັນມໍລະດົກໂລກໂດຍອົງການ UNESCO.

ທັງນີ້, ທ່ານ ສິນ ຈັນສະຣູວຸດ ກ່າວອີກວ່າ: ສະໜາມບິນສາກົນສຽມຣາດອັງກໍ ຊຶ່ງມີຣັນເວຍາວ 3,600 ແມັດ ເປັນສະໜາມບິນສາກົນລະດັບ 4E (4E) ທີ່ສາມາດຮອງຮັບການລົງຈອດຂອງເຮືອບິນໄດ້ເກືອບທຸກປະເພດຈາກທົ່ວໂລກ.