ຂ່າວຕ່າງປະເທດລາຍງານ ໃນວັນທີ 28 ຕຸລາ ຜ່ານມາວ່າ: ທະນາຄານກາງສິງກະໂປ(MAS) ໄດ້ຄາດຄະເນວ່າ: ລວມຍອດຜະລິດຕະພັນພາຍໃນປະເທດສິງກະໂປ (GDP) ທັງປີ 2024 ແລະ 2025 ຈະຂະຫຍາຍຕົວໃກ້ກັບລະດັບສູງສຸດຂອງກອບໂຕເລກການຄາດຄະເນ 2% -3%.

ໃນບົດລາຍງານເພື່ອທົບທວນທ່າອ່ຽງເສດຖະກິດມະຫາພາກ ຊຶ່ງມີການເຜີຍແຜ່ໃນວັນທີ 28 ຕຸລາ MASລະບຸວ່າ: ການຂະຫຍາຍຕົວຂອງເສດຖະກິດສິງກະໂປ "ເຂັ້ມແຂງຂຶ້ນ" ໃນໄຕມາດທີ 3 ຂອງປີ 2024ຊຶ່ງໄດ້ຮັບແຮງໜູນຈາກການຟື້ນຕົວຂອງຂະແໜງການຜະລິດ. ລວມທັງການຊື້ - ຂາຍ ທີ່ປັບຕົວດີຂຶ້ນໃນຂະແໜງການຜະລິດ ແລະການກັບມາຂອງນັກທ່ອງທ່ຽວຈີນຫຼັງຈາກທີ່ນະໂຍບາຍການຍົກເວັ້ນວີຊາເລີ່ມມີຜົນບັງຄັບໃຊ້ຕັ້ງແຕ່ເດືອນກຸມພາ.

ຂໍ້ມູນເບື້ອງຕົ້ນລະບຸວ່າ: GDP ຂອງສິງກະໂປໄດ້ຂະຫຍາຍຕົວ 4,1% ໃນໄຕມາດທີ 3 ຂອງປີ 2024ເມື່ອທຽບໃສ່ປີຜ່ານມາ. ຫຼັງຈາກທີ່ຂະຫຍາຍຕົວ 2,7% ໃນໄຕມາດ 2 ຂອງປີ 2024.

ຂ່າວລະບຸວ່າ: ເຖິງຢ່າງໃດກໍຕາມ, Mas ມີຄວາມກັງວົນວ່າການຂະຫຍາຍຕົວຂອງເສດຖະກິດສິງກະໂປແມ່ນມີຄວາມສ່ຽງທີ່ຈະອ່ອນແອລົງໃນປີ 2025 ເນື່ອງຈາກຄວາມບໍ່ແນ່ນອນທີ່ເກີດຂຶ້ນທົ່ວໂລກ.

ບົດລາຍງານດັ່ງກ່າວຍັງລະບຸວ່າ: Masໄດ້ຮັກສາໂຕເລກການຄາດຄະເນອັດຕາເງິນເຟີ້ຂັ້ນພື້ນຖານຂອງສິງກະໂປເອົາໄວ້ຢູ່ປະມານ 2% ໃນທ້າຍປີ 2024, ເຖິງແມ່ນວ່າໂຕເລກອັດຕາເງິນເຟີ້ໄດ້ເພີ່ມຂຶ້ນເຖິງ 2,8% ໃນເດືອນກັນຍາ, ຖ້າທຽບໃສ່ປີຜ່ານມາ. ຫຼັງຈາກຫຼຸດລົງລະດັບຕ່ໍາສຸດໃນຮອບ 2 ປີເຄິ່ງທີ່ 2,5% ໃນເດືອນກໍລະກົດ. ສ່ວນໃນປີ 2025 ນັ້ນ, Mas ຄາດຄະເນວ່າອັດຕາເງິນເຟີ້ພື້ນຖານຈະຢູ່ປະມານ 1.5% -2,5%.