ວິທະຍຸກະຈາຍສຽງຫວຽດນາມລາຍງານວ່າ: ໃນຕອນຄ່ຳວັນທີ 27 ຕຸລາ ຜ່ານມານີ້, ຖ້ຽວບິນໝາກເລກ VN923 ຂອງບໍລິສັດການບິນແຫ່ງຊາດ ຫວຽດນາມ (Vietnam Airlines) ໄດ້ລົງຈອດຢູ່ສະໜາມບິນສາກົນ ພະນົມເປັນກຳປູເຈຍ ແລະ ເປີດຖ້ຽວບິນໂດຍກົງ ຮ່າໂນ້ຍ - ພະນົມເປັນ ຢ່າງເປັນທາງການ.

ຂ່າວລະບຸວ່າ: Vietnam Airlines ແມ່ນບໍລິສັດການບິນໜຶ່ງດຽວຂອງ ຫວຽດນາມ ທີ່ຂຸດຄົ້ນສາຍການບິນໂດຍກົງ ຮ່າໂນ້ຍ - ພະນົມເປັນ. ເວລາບິນພຽງແຕ່ 1 ຊົ່ວໂມງ 15 ນາທີ. ໃນເມື່ອກ່ອນ, ຜູ້ໂດຍສານຢາກເດີນທາງແຕ່ ຮ່າໂນ້ຍ ໄປ ພະນົມເປັນ ຕ້ອງເສຍເວລາປະມານ 3 ຊົ່ວໂມງ ຍ້ອນຕ້ອງລົງຈອດຢູ່ ວຽງຈັນ (ລາວ) ແລ້ວຈຶ່ງເດີນທາງໄປຕໍ່. ສາຍການບິນໂດຍກົງ ຮ່າໂນ້ຍ - ພະນົມເປັນ ມີ4 ຖ້ຽວ/ອາທິດ, ດ້ວຍເຮືອບິນທັນສະໄໝ Airbus A321.

ເຂົ້າຮ່ວມພິທີເປີດ ມີທ່ານ ເມົາ ຮາວັນນໍລລັດຖະມົນຕີຮັບຜິດຊອບ ຄະນະກຳມະການແຫ່ງລັດ ກ່ຽວກັບການບິນພົນລະເຮືອນ ກຳປູເຈຍ ໄດ້ຢັ້ງຢືນວ່າ: ການເປີດຖ້ຽວບິນໂດຍກົງ ຮ່າໂນ້ຍ - ພະນົມເປັນ ຈະປະກອບສ່ວນປະຕິບັດສຳເລັດການເຊື່ອມຕໍ່ທາງອາກາດ ລະຫວ່າງສອງປະເທດ, ນຳມາເຊິ່ງທາງເລືອກທີ່ດີທີ່ສຸດໃຫ້ແກ່ລູກຄ້າ, ເປັນຕົ້ນແມ່ນບັນດານັກທຸລະກິດ ແລະ ແຂກທ່ອງທ່ຽວຂອງສອງປະເທດກໍຄືສາກົນ.