ພະແນກສຶກສາທິການ ແລະ ກິລາ ແຂວງສາລະວັນ ຮ່ວມກັບ ສະມາຄົມເຢຍລະມັນ-ລາວ ເພື່ອການພັດທະນາ ໄດ້ຈັດພິທີເຊັນບົດບັນທຶກຄວາມເຂົ້າໃຈ ໂຄງການສົ່ງເສີມຜູ້ປະກອບການຂັ້ນບັານ ໂດຍຜ່ານການຝຶກອົບຮົມວິຊາຊີບຂັ້ນພື້ນຖານ ໄລຍະ II ໃນວັວັນທີ 29 ຕຸລາຜ່ານມາ, ທີ່ສະໂມສອນແຂວງສາລະວັນ ໂດຍມີຕາງໜ້າຈາກະຊວງການຕ່າງປະເທດ ພ້ອມດ້ວຍ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂຄງການສົ່ງເສີມຜູ້ປະກອບການຂັ້ນບັານ ໂດຍຜ່ານການຝຶກອົບຮົມວິຊາຊີບຂັ້ນພື້ນຖານໄລຍະທີ II ຈະໄດ້ຈັດຕັ້ງປະຕິບັດຢູ່ບັນດາບ້ານເປົ້າໝາຍຂອງເມືອງ ສາລະວັນ ແລະ ເມືອງຕະໂອ້ຍ ທີ່ສືບຕໍ່ຈາກໄລຍະທີ I ໄດ້ຈັດຕັ້ງປະປະຕິບັດຢູ່ບັນດາບ້ານເປົ້າໝາຍຂອງເມືອງ ຕະໂອ້ຍ ແລະ ເມືອງຕຸ້ມລານ. ຊຶ່ງໄດ້ຮັບການສະໜັບສະໜູນຈາກ ມຸນນິທິສະມິດ ແລະ ສະມາຄົມເຢຍລະມັນ-ລາວ ເພື່ອການພັດທະນາ ມີມູນຄ່າ 4 ຕື້ກວ່າກີບ, ໄລຍະຈັດຕັ້ງປະຕິບັດ ແມ່ນຮອດວັນທີ 30 ກັນຍາ 2027, ໂຄງການມີຈຸດປະສົງ ເພື່ອແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແນ່ໃສປະກອບສ່ວນເຂົ້າໃນການ ພັດທະນາເສດຖະກິດ-ສັງຄົມຂອງລັດຖະບານ ສປປ ລາວ ໂດຍສະເພາະແມ່ນແຂວງສາລະວັນ. ໃນນັ້ນ, ແມ່ນໄດ້ຖືເອົາການປັບປຸງຄຸນນະພາບການສຶກສາ, ສົ່ງເສີມວິຊາຊີບ ແລະ ສະໜອງອາຄານຮຽນເປັນບູລິມະສິດໜຶ່ງ ໃນການປັບປຸງສິ່ງອຳນວຍຄວາມສະດວກພາຍໃນໂຮງຮຽນ ທັງເປັນການປັບປຸງສະພາບແວດລ້ອມ ພາຍໃນໂຮງຮຽນໃຫ້ສວຍງາມ ເປັນມິດແກ່ຜູ້ຮຽນ ແລະ ຜູ້ສອນດີຂຶ້ນເທື່ອລະກ້າວ. ສໍາລັບກິດຈະກໍາຫຼັກທີ່ຈັດຕັ້ງປະຕິບັດມີຄື: ສ້າງຄວາມອາດສາມາດໃຫ້ແກ່ແມ່ຍິງໃນບ້ານເປົ້າໝາຍ; ກໍ່ສ້າງ ແລະ ສ້ອມແປງໂຮງຮຽນ, ຫ້ອງປະຊຸມບ້ານ, ລະບົບນໍ້າ, ຫ້ອງນໍ້າ ແລະ ສະໜອງອຸປະກອນ-ແນວພັນ.

ຮ່ວມລົງນາມໃນສັນຍາ ໂດຍ ທ່ານ ສຸນີ ນາມມະບົວລີ ວ່າການຫົວໜ້າພະແນກ ສຶກສາທິການ ແລະກິລາ ແຂວງສາລະວັນ ແລະ ທ່ານ ນາງ ເພັດສະລິນ ຈັນທະຜາສຸກ ຜູ້ອຳນວຍການ ສະມາຄົມເຢຍລະມັນ-ລາວ ເພື່ອການພັດທະນາ.

(ພາບ-ຂ່າວ: ລັດຕະນາ ແສງສຸວັນ)