ທ່ານ ໂຄອິຊິມິ ຊິໂຕະມຸເອກອັກຄະຣາຊະທູດຍີ່ປຸ່ນ ໄດ້ເປັນເຈົ້າພາບຈັດງານລ້ຽງ ຮັບຮອງພົບປະສັງສັນ ແລະ ຕ້ອນຮັບຄະນະສໍາຫຼວດການລົງທຶນດ້ານການຫຼຸດຜ່ອນອາຍພິດເຮືອນແກ້ວ ໃນວັນທີ 30 ຕຸລານີ້ທີ່ ເຮືອນພັກທູດຍີ່ປຸ່ນຊຶ່ງພາລະກິດສໍາຫຼວດດັ່ງກ່າວໄດ້ຮັບການສະໜັບສະໜູນຈາກອົງການສົ່ງເສີມການຄ້າຍີ່ປຸ່ນ ປະຈໍານະຄອນຫຼວງວຽງຈັນ (JETRO).ເປັນກຽດເຂົ້າຮ່ວມ, ໂດຍ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານນາງ ບຸນຄໍາ ວໍລະຈິດ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ແຂກຖືກເຊີນ ຈາກພາກລັດ-ເອກະຊົນ.

ລັດຖະບານລາວ ໄດ້ຮີບເລັ່ງຄວາມພະຍາຍາມໃນການຫຼຸດຜ່ອນອາຍພິດເຮືອນແກ້ວ ໃນໄລຍະຫຼາຍປີຜ່ານມາ ແລະ ກໍາລັງເນັ້ນໜັກໃສ່ການສົ່ງເສີມການລົງທຶນ ໃນຂົງເຂດການຫຼຸດຜ່ອນອາຍພິດເຮືອນແກ້ວ ລວມໄປເຖິງການພັດທະນາກົດໝາຍ ແລະ ລະບຽບການທີ່ກ່ຽວຂ້ອງ ສໍາລັບການບໍລິຫານຈັດການເຄຣດິດກາກບອນ ໃນປີ 2024. ຈໍານວນບໍລິສັດຂອງຍີ່ປຸ່ນ ທີ່ກໍາລັງຊອກຫາໂອກາດທາງທຸລະກິດ ໂດຍນໍາໃຊ້ທ່າແຮງຈຸດແຂງຂອງ ສປປລາວ ໃນດ້ານພະລັງງານສີຂຽວ ເພື່ອການປະກອບສ່ວນບັນລຸເປົ້າໝາຍການພັດທະນາແບບຍືນຍົງ (SDGs)ກໍາລັງເພີ່ມຂຶ້ນເລື່ອຍໆ. ລັດຖະບານ ຍີ່ປຸ່ນ ໄດ້ໃຫ້ບຸລິມະສິດຄວາມສໍາຄັນຕໍ່ກັບຄວາມພະຍາຍາມໃນການຫຼຸດຜ່ອນອາຍພິດເຮືອນແກ້ວດັ່ງກ່າວ ຊຶ່ງເຫັນໄດ້ດັ່ງທີ່ ທ່ານ ອິຊິບະ ຊິເງະຣຸນາຍົກລັດຖະມົນຕີຍີ່ປຸ່ນ ໄດ້ກ່າວໃນກອງປະຊຸມສຸດຍອດນາຍົກລັດຖະມົນຕີ ຍີ່ປຸ່ນ-ລາວ ໃນວັນທີ 11 ຕຸລາທີ່ຜ່ານມາ ໃນໂອກາດເດີນທາງຢ້ຽມຢາມ ສປປ ລາວ ເພື່ອເຂົ້າຮ່ວມກອງປະຊຸມສຸດຍອດອາຊຽນ ແລະ ກອງປະຊຸມປິ່ນອ້ອມ.

ອົງການ JETRO ໄດ້ຈັດພາລະກິດສໍາຫຼວດເພື່ອສົ່ງເສີມການລົງທຶນ ໃຫ້ແກ່ບໍລິສັດຍີ່ປຸ່ນ ທີ່ເຂົ້າຮ່ວມ ແລະ ກໍາລັງພິຈາລະນາການຂະຫຍາຍທຸລະກິດ ມາຍັງ ສປປ ລາວ ໃນຂົງເຂດການຫຼຸດຜ່ອນອາຍພິດເຮືອນແກ້ວ ແລະ ພ້ອມທັງມີເປົ້າໝາຍເນັ້ນໜັກໃສ່ການສ້າງສາຍພົວພັນ ລະຫວ່າງ ບໍລິສັດເອກະຊົນ ແລະ ໜ່ວຍງານພາກລັດ. ໃນໂອກາດນີ້, ສະຖານເອກອັກຄະຣາຊະທູດຍີ່ປຸ່ນ ໄດ້ຈັດງານລ້ຽງຮັບຮອງສັງສັນ ໂດຍເຊື້ອເຊີນບັນດາບໍລິສັດຍີ່ປຸ່ນ ທີ່ເຂົ້າຮ່ວມພາລະກິດດັ່ງກ່າວ, ພະນັກງານຈາກຂະແໜງງານກ່ຽວຂ້ອງຂອງລັດຖະບານລາວ ແລະ ບັນດາບໍລິສັດຕ່າງໆຂອງລາວ ເປັນຕົ້ນແມ່ນຈາກຂົງເຂດກະສິກຳ, ປ່າໄມ້, ຊັບພະຍາກອນ, ພະລັງງານແລະ ຂົງເຂດການຜະລິດ. ນີ້ແມ່ນພາລະກິດສົ່ງເສີມການລົງທຶນ ຄັ້ງທີ 5 ທີ່ອົງການ JETRO ຈັດໃນ ສປປ ລາວພາຍຫຼັງການແຜ່ລະບາດຂອງພະຍາດໂຄດິດ-19 ຜ່ອນຄາຍລົງ.

(ຂ່າວ: ສະຖານທູດຍີ່ປຸ່ນ, ພາບ: ແສງຈັນ)