ງານມະຫະກຳສີມືຫັດຖະກຳລາວໄດ້ສ້າງໂອກາດໃຫ້ບັນດານາຍຊ່າງຫັດຖະກຳ,ຜູ້ປະກອບການດ້ານຫັດຖະກຳ ໄດ້ເຂົ້າເຖິງການຕະຫຼາດ ແລະ ມີໂອກາດພົບປະແລກປ່ຽນບົດຮຽນ,ປະສົບການທາງດ້ານການຜະລິດ, ປະສົບການກ່ຽວກັບເຕັກນິກການວາງສະແດງ ແລະ ການຂາຍ.

ທ່ານ ນາງ ສຸວິດາ ປະເສີດ ປະທານສະມາຄົມຫັດຖະກຳລາວໃຫ້ຮູ້ວ່າ:“ງານມະຫະກຳສີມືຫັດ ຖະກຳລາວ ແມ່ນມີຄວາມໝາຍ-ມີຄວາມສໍາຄັນຍິ່ງ ສໍາລັບສະມາຊິກສະມາຄົມຫັດຖະກຳ,ຊາວຊ່າງ, ຜູ້ປະກອບການດ້ານຫັດຖະກຳ ແລະ ຊາວລາວທຸກຖ້ວນໜ້າ,ນອກຈາກເປັນການສ້າງກາລະໂອກາດໃຫ້ບັນດາຊາວຊ່າງຫັດຖະກຳທຸກ ທ້ອງຖິ່ນ ເຂດແຂວງໃນທົ່ວປະເທດ ແລະ ຜູ້ປະກອບການດ້ານຫັດຖະກຳ ໄດ້ເຂົ້າເຖິງການຕະຫຼາດຍັງເປັນບ່ອນວາງສະແດງ ແລະ ຈຳໜ່າຍຜະລິດຕະພັນຫັດຖະກຳຂອງຕົນ,ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ປະສົບການກ່ຽວກັບເຕັກນິກການວາງສະແດງ,ການຂາຍ ແລະ ອື່ນໆ

ສຳລັບງານມະຫະກຳສີມືຫັດຖະກຳລາວ ຄັ້ງທີ 23 ປະຈຳປີ 2024 ຈັດຂຶ້ນພາຍໃຕ້ຄຳຂວັນທີ່ ວ່າ:ສີໄມ້ລາຍມືຄືອຸທິຍານແຫ່ງການທ່ອງທ່ຽວ“ເຊື່ອມໂຍງມໍລະດົກຜ້າແພພື້ນເມືອງອາຊຽນ” ຊຶ່ງພາຍໃນງານດັັ່ງກ່າວໄດ້ສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົມ ທ່ຽວຊື້ ໄດ້ພົບ ໄດ້ເຫັນ ຄວາມຫຼາກຫຼາຍຂອງເຄື່ອງຫັດຖະກຳລາວ,ສ້າງຄວາມປະທັບໃຈ ແລະ ຫຼົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກຳລາວເຮົາ,ເພື່ອເຕົ້າໂຮມຄວາມສາມັກຄີ ບັນດາຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດ ພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກຳ ທີ່ມີລັກສະນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນທ່າແຮງທາງດ້ານຫັດຖະກຳຢູ່ທຸກທ້ອງຖິ່ນ ປະກອບສ່ວນເຂົ້າໃນການສ້າງລາຍຮັບ ແລະ ພັດທະນາຊີວິດການເປັນຢູ່ຂອງທ້ອງຖິ່ນໃຫ້ນັບມື້ດີຂຶ້ນ,ເພື່ອໃຫ້ບັນດາຊາວຊ່າງ ແລະ ຜູ້ປະກອບການດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດ (ຫຼືມີບ່ອນຂາຍ) ຜະລິດຕະພັນຫັດຖະກຳຂອງຕົນ ພ້ອມທັງໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ການວາງສະແດງ ແລະ ການຂາຍ,ເພື່ອສະໜັບສະໜູນນະໂຍບາຍຂອງລັດຖະບານໃນການແກ້ໄຂຄວາມທຸກຍາກໃຫ້ ປະຊາຊົນ, ເພື່ອສ້າງສາຍສຳພັນກັບບັນດາປະເທດສະມາຊິກອາຊຽນດ້ານສິລະປະຫັດຖະກຳອີກດ້ວຍ

ງານມະຫະກຳສີມືຫັດຖະກຳລາວປີນີ້ໄດ້ມີການວາງສະແດງ-ຂາຍສິນຄ້າຫັດຖະກຳຂອງຫຼາຍພາກສ່ວນ ແຜ່ນແພ (ຜ້າໄໝ,ຜ້າຝ້າຍ),ພາກສ່ວນ ເຄື່ອງປະດັບ (ເງິນ,ຄໍາ,ແກ້ວປະເສີດ), ພາກສ່ວນ ເຄື່ອງຈັກສານ (ຫວາຍ-ໄມ້ປ່ອງ), ພາກສ່ວນ ຜະລິດຕະພັນວັດທະນະທໍາ (ເຄື່ອງປັ້ນດິນເຜົາ, ໄມ້ແກະສະຫຼັກ, ເຄື່ອງດົນຕີ ພື້ນເມືອງ ແລະ ອື່ນໆ, ພາກສ່ວນ ເຟີນີເຈີ, ພາກສ່ວນ ອາຫານສໍາເລັດຮູບພື້ນເມືອງ, ສະໜຸນໄພ ແລະ ອື່ນໆລວມທັງໝົດ243 ຮ້ານ, ພາກສ່ວນຮ່ວມວາງສະແດງມີຊາວຊ່າງຫັດຖະກຳລາວຈາກບັນດາແຂວງຕ່າງໆ, ກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ, ໂຄງການ USAID-CBI, Mottainaiproject.HABI: THE PHILIPPINE TEXTILE COUNCIL INC.

ໃນນັ້ນ:ພາຍໃນງານຍັງໄດ້ສ້າງໂອກາດໃຫ້ບັນດາຜູ້ມາທ່ຽວໄດ້ເຂົ້າຮ່ວມກິດຈະກຳຕ່າງໆເປັນຕົ້ນການສຳມະນາຫົວຂໍ້: ປັບປຸງເຕັກນິກການຕໍ່າຜ້າຝ້າຍ,ເຜີຍແຜ່ການນໍາໃຊ້ກາໝາຍຫັດຖະກຳແຫ່ງຊາດ,ຫົວຂໍ້: ສົ່ງເສີມການເຂົ້າເຖິງຕະຫຼາດເອີຣົບ(ໂຄງການ USAID-CBI)ກິດຈະກຳ ປະກວດການແຂ່ງຂັນຜະລິດຕະພັນດີເດັ່ນ,ການປະກວດ"ສິລະປະລາຍນາກ ແລະ ລວດລາຍດອກໄມ້ປະຈຳທ້ອງຖິ້ມ" ແລະ ອື່ນໆ, ພ້ອມນີ້ງານມະຫະກຳສີມືຫັດຖະກຳລາວຄັ້ງນີ້ເພື່ອແນໃສ່ໃຫ້ເປັນງານສີມືທີ່ຕໍ່ຍອດຈາກປູ່ຍ່າຕາຍາຍໃຫ້ຍືນຍົງຄຽງຄູ່ຢູ່ກັບສັງຄົມລາວ ແລະ ໃຫ້ກາຍເປັນແຫຼ່ງການສຶກສາຮຽນຮູ້,ເປັນແຫຼ່ງຂໍ້ມູນ,ຊ່ວຍອໍານວຍໃຫ້ແກ່ນັກຮຽນ,ນັກສຶກສາ,ນັກທຸລະກິດ,ນັກການຕະຫຼາດໃຫ້ເປັນບ່ອນຊອກຫາວິຊາການສີມືຫັດຖະກຳ ແລະ ເປັນບ່ອນສ້າງວຽກເຮັດງານທໍາຕື່ມອີກ.