ສະພາບໄພ​ພິ​ບັດ (ນໍ້າຖ້ວມ) ທີ່ເກີດຂຶ້ນໃນທົ່ວປະເທດ ນັບແຕ່ເດືອນກໍລະກົດ ຫາ ເດືອນກັນຍາ 2024 ເຮັດໃຫ້ລະບົບຊົນລະປະທານທີ່ນອນໃນ 12 ແຂວງ ເສຍຫາຍ 300 ໂຄງການ, ມູນຄ່າ 592 ຕື້ກວ່າກີບ. ສ່ວນເນື້ອທີ່ການ​ຜະ​ລິດທີ່ນອນໃນຂອບເຂດໂຄງການຊົນລະປະທານຖືກຜົນກະທົບທັງໝົດ 14,826 ເຮັກຕາ ແລະ ເນື້ອທີ່ເສຍຫາຍທັງໝົດ 7,838 ເຮັກຕາ, ກວມເອົາ 55 ເມືອງ.

ທ່ານ ທອງເລີຍ ແສງອານົງຮອງຫົວໜ້າກົມຊົນລະປະທານກະຊວງກະສິກໍາ ແລະ ປ່າໄມ້ ເປີດ​ເຜີຍເມື່ອບໍ່ດົນມານີ້ວ່າ: ລະບົບຊົນລະປະທານໃນ12 ແຂວງທີ່ໄດ້ຮັບຜົນເສຍຫາຍ, ຮ້າຍແຮງກວ່າໝູ່ແມ່ນຢູ່ 3 ແຂວງ ຄື: ນະຄອນຫຼວງວຽງຈັນ ໄດ້ຮັບຜົນກະທົບ 2 ເມືອງ ມີ 15 ໂຄງການ, ເນື້ອທີ່ຖືກກະທົບ 1,676 ກວ່າເຮັກຕາ, ມູນຄ່າເສຍຫາຍເບື້ອງຕົ້ນ 96 ຕື້ກວ່າກີບ, ຮອງລົງມາແມ່ນຢູ່ແຂວງຫຼວງນໍ້າທາ ໄດ້ຮັບຜົນກະທົບ 4 ເມືອງ, ມີ 14 ໂຄງການ, ເນື້ອທີ່ຖືກກະທົບ 5,032 ເຮັກຕາ, ມູນຄ່າເສຍຫາຍເບື້ອງຕົ້ນ 17 ຕື້ກວ່າກີບ, ແລະ ແຂວງຫົວພັນ ໄດ້ຮັບຜົນກະທົບ 2 ເມືອງ, ມີ 5 ໂຄງການ, ເນື້ອທີ່ຖືກກະທົບ 60 ເຮັກຕາ, ມູນຄ່າເສຍຫາຍເບື້ອງຕົ້ນ 5 ຕື້ກວ່າກີບ.

ສ່ວນຢູ່ 9 ແຂວງທີ່ເຫຼືອແມ່ນໄດ້ຮັບຜົນກະທົບເລັກ​ໜ້ອຍ ຫຼື ບໍ່ຮ້າຍແຮງ, ໃນນັ້ນ ລວມມີ: ຜົ້ງສາລີ ກະທົບ 2 ເມືອງ, ມີ 11 ໂຄງການ, ບໍ່ແກ້ວ ກະທົບ 5 ເມືອງ, ມີ 10 ໂຄງການ, ອຸດົມໄຊ ກະທົບ 3 ເມືອງ, ມີ 26 ໂຄງການ, ຫຼວງພະບາງ ກະທົບ 5 ເມືອງ, ມີ 10 ໂຄງການ, ຊຽງຂວາງ ກະທົບ 3 ເມືອງ, ມີ 8 ໂຄງການ, ໄຊຍະບູລີ ກະທົບ 3 ເມືອງ, ມີ 10 ໂຄງການ, ບໍລິຄໍາໄຊ ກະທົບ 3 ເມືອງ, ມີ 22 ໂຄງການ, ຄໍາມ່ວນ ກະທົບ 9 ເມືອງ, ມີ 31 ໂຄງການ ແລະ ເຊກອງ ກະທົບ 2 ເມືອງ, ມີ 10 ໂຄງການ.

ທ່ານ ທອງເລີຍ ແສງອານົງ ໃຫ້ຮູ້ຕື່ມວ່າ: ບັນດາລະບົບຊົນລະປະທານທີ່ເປ່ເພທັງໝົດ ຕ້ອງໄດ້ຮີບຮ້ອນສ້ອມແປງ ໂດຍສະເພາະໂຄງການທີ່ເປັນບຸລິມະສິດຮັບໃຊ້ການຜະລິດລະດູແລ້ງທີ່ຈະມາເຖິງນີ້ ເພື່ອເຮັດໃຫ້ປະຊາຊົນສາມາດທໍາການຜະລິດໄດ້ທັນກັບລະດູການ.

ຂ່າວ-ພາບ: ວ​ສ​ລ