ຂ່າວຕ່າງປະເທດລາຍງານ ໃນວັນທີ 30 ຕຸລາ ຜ່ານມາວ່າ: ກໍາປູເຈຍ ຈັດງານສະເຫຼີມສະຫຼອງຄົບຮອບ 20 ປີ ການຂຶ້ນຄອງລາດຂອງພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ພະມະຫາກະສັດກຳປູເຈຍ ພ້ອມທັງຍົກຍ້ອງກຳປູເຈຍເປັນຣາຊະອານາຈັກແຫ່ງສັນຕິພາບ ແລະ ການພັດທະນາເສດຖະກິດ-ສັງຄົມທີ່ວ່ອງໄວຕະຫຼອດສອງທົດສະວັດທີ່ຜ່ານມາ.

ລາຍງານລະບຸວ່າ: ມີການຈັດພະຣາຊະພິທີສະເຫຼີມສະຫຼອງໜ້າພະລາດຊະວັງ ຊຶ່ງມີທ່ານ ຮຸນມາເນັດ ນາຍົກລັດຖະມົນຕີກຳປູເຈຍ ແລະ ຜູ້ນຳປະເທດອື່ນໆ ລວມທັງຜູ້ເຂົ້າຮ່ວມປະມານ 12,000 ຄົນ, ໂດຍ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີກ່າວວ່າ: ປັດຈຸບັນ, ກຳປູເຈຍມີສະ ຖຽນະພາບທາງການເມືອງ ແລະ ຄວາມໝັ້ນຄົງຂອງຊາດ.

ນອກຈາກນັ້ນ, ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີຍັງໄດ້ຊົມເຊີຍທ່ານ ຮຸນມາເນັດ ທີ່ວາງຮາກຖານຍຸດທະສາດຫ້າຫຼ່ຽມ (Pentagon Strategy) ໄລຍະທຳອິດດຳເນີນນະໂຍບາຍຕ່າງໆຕາມວິຖີທາງອັນດີ ແລະມໍລະດົກທາງການເມືອງຂອງ ສົມເດັດອັກຄະມະຫາເສນາບໍດີ ເຕໂຊ ຮຸນແຊນ ອະດີດນາຍົກລັດຖະມົນຕີ ກຳປູເຈຍ.

ກຳປູເຈຍ ຈັດງານສະເຫຼີມສະຫຼອງຄົບຮອບ 20 ປີ ການຂຶ້ນຄອງລາດຂອງພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ເປັນເວລາ 3 ວັນ (ວັນທີ 28-30 ຕຸລາ) ໂດຍມີການຈັດພິທີທາງສາສະໜາ, ການລວມຕົວຂອງມວນຊົນ, ການວາງສະແດງຮູບພາບ ແລະ ຈູດດອກໄມ້ໄຟ ທັງສາມຄືນ.