ຂ່າວສານຫວຽດນາມລາຍງານວ່າ: ລັດຖະບານອິນໂດເນເຊຍ ໄດ້ໃຫ້ບຸລິມະສິດແກ່ການເຕີບໂຕທາງເສດຖະກິດໃນໄລຍະຍາວຜ່ານຄວາມໝັ້ນຄົງດ້ານພະລັງງານ, ການຫັນເປັນດີຈີຕອນ ແລະ ການພັດທະນາອຸດສາຫະກຳດ້ານຊັບພະຍາກອນທຳມະຊາດ.
ຂ່າວລະບຸວ່າ: ໃນວັນທີ 29 ຕຸລາ ຜ່ານມາທ່ານ ໂທມັສ ຈິວັນໂດໂນ ລັດຖະມົນຕີກະຊວງການເງິນ ອິນໂດເນເຊຍ ກ່າວຄຳເຫັນວ່າ: ສາມຫົວຂໍ້ນີ້ເປັນພື້ນຖານໃຫ້ແກ່ການເຕີບໂຕໃນໄລຍະຍາວ ແລະ ນັ້ນແມ່ນຈຸດທີ່ພວກເຮົາຕ້ອງພິຈາລະນາປັດໄຈຂັບເຄື່ອນໃນການເຕີບໂຕ.
ທ່ານ ໂທມັສ ຈິວັນໂດໂນ ກ່າວຕື່ມວ່າ: ທ່ານ ພຣາໂບໂວ ຊູບຽນໂຕ ປະທານາທິບໍດີ ອິນໂດເນເຊຍ ຈະຂະຫຍາຍຈຸດສຸມດ້ານເສດຖະກິດໄປຍັງຂົງເຂດອື່ນໆ ເພື່ອຮັກສາຄວາມດຶງດູດຂອງອິນໂດເນເຊຍ ໃຫ້ແກ່ບັນດານັກລົງທຶນທົ່ວໂລກ. ກະຊວງການເງິນພວມຄົ້ນຄວ້າບັນດາຂະແໜງການທີ່ເປັນທ່າແຮງໃໝ່ຂອງການເຕີບໂຕ, ໃນນັ້ນມີພື້ນຖານໂຄງລ່າງ, ການທ່ອງທ່ຽວ ແລະ ການຫັນເປັນດີຈີຕອນ.
ກ່ຽວກັບເປົ້າໝາຍການເງິນ, ລັດຖະບານ ອິນໂດເນເຊຍ ຕັ້ງເປົ້າໝາຍຮັກສາການຂາດດຸນງົບປະມານໃຫ້ຕ່ຳກວ່າ 3%, ໃນນັ້ນເປົ້າໝາຍການຂາດດຸນປີໜ້າໄດ້ວາງໄວ້ໃຫ້ຢູ່ໃນລະດັບ 2,53%. ປັດຈຸບັນ, ຄວາມພະຍາຍາມແມ່ນສຸມໃສ່ສ້າງໂອກາດການຈ້າງງານໃຫ້ແກ່ຊາວໜຸ່ມ ແລະ ພັດທະນາກົນໄກການເຕີບໂຕໃໝ່ເພື່ອໜູນຊ່ວຍຄົນຊັ້ນກາງ.
ກະຊວງການເງິນ ອິນໂດເນເຊຍ ຄາດຄະເນວ່າ: ການເຕີບໂຕຂອງເສດຖະກິດຈະບັນລຸ 5,1% ໃນທ້າຍປີ 2024, ຫຼຸດລົງເລັກນ້ອຍກວ່າເປົ້າໝາຍ 5,2% ທີ່ລະບຸໄວ້ໃນງົບປະມານຂອງລັດ 2024, ແຕ່ສູງກວ່າ 5,05% ທີ່ບັນທຶກໄວ້ໃນປີ 2023. ລາຍງານລະບຸວ່າ, ການເຕີບໂຕດ້ານເສດຖະກິດຂອງ ອິນໂດເນເຊຍ ໃນໄຕມາດທີ 2 ຂອງປີ 2024 ບັນລຸ 5,05%.
