ຂ່າວຕ່າງປະເທດລາຍງານ ໃນວັນທີ 31 ຕຸລາ ຜ່ານມາວ່າ: ແອັດສະປາຍ ກໍາລັງປະສົບບັນຫານໍ້າຖ້ວມຄັ້ງຮ້າຍແຮງທີ່ສຸດໃນຮອບ50 ກວ່າປີ, ໂດຍຈຳນວນຜູ້ເສຍຊີວິດເພີ່ມຂຶ້ນເປັນ 95 ຄົນແລ້ວ ແລະ ຍັງມີຜູ້ສູນຫາຍອີກຫຼາຍສິບຄົນ.

ຂ່າວລະບຸວ່າ: ຝົນທີ່ຕົກລົງມາຢ່າງໜັກເມື່ອວັນທີ 29 ຕຸລາ ຜ່ານມາ ເຮັດໃຫ້ເກີດນໍ້າຖ້ວມກະທັນຫັນ ໃນພາກຕາເວັນອອກຂອງແອັດສະປາຍ, ໂດຍສະເພາະໃນແຄ້ວນບາເລນເຊຍຊຶ່ງໄດ້ຮັບຜົນກະທົບຫຼາຍທີ່ສຸດ ຂົວຫຼາຍສາຍຖືກຕັດຂາດ, ປະຊາຊົນຕ້ອງໜີນ້ຳຂຶ້ນເທິງຫຼັງຄາ ຫຼື ປີນຂຶ້ນເທິງຕົ້ນໄມ້ເພື່ອຖ້າການຊ່ວຍເຫຼືອ.

ທ່ານ ເປໂດຣ ຊານເຊດ ປະທານາທິບໍດີແອັດສະປາຍ ປະກາດໄວ້ອາໄລແກ່ຜູ້ເສຍຊີວິດເປັນເວລາ 3 ວັນ ແລະ ຮຽກຮ້ອງໃຫ້ປະຊາຊົນລະມັດລະວັງ, ພ້ອມທັງໃຫ້ຄຳໝັ້ນສັນຍາວ່າ: ລັດຖະບານຈະຟື້ນຟູຄວາມເສຍຫາຍທັງໝົດໃຫ້ກັບມາສົມບູນ ແລະ ຈະບໍ່ປະຖິ້ມໃຜ.

ທັງນີ້, ເຫດການນໍ້າຖ້ວມທີ່ກຳລັງເກີດຂຶ້ນໃນແອັດສະປາຍ ເຮັດໃຫ້ມີຜູ້ເສຍຊີວິດຢ່າງນ້ອຍ 95 ຄົນ ຖືເປັນອຸທົກກະໄພທີ່ເຮັດໃຫ້ມີຜູ້ເສຍຊີວິດຫຼາຍທີ່ສຸດ ນັບຕັ້ງແຕ່ເຫດການນໍ້າຖວມຄັ້ງໃຫຍ່ໃນປີ 1973 ຊຶ່ງມີຜູ້ເຄາະຮ້າຍເຖິງ 150 ຄົນ ຫຼັງຈາກເກີດອຸທົກກະໄພໃນພາກຕາເວັນອອກສ່ຽງໃຕ້ຂອງປະເທດ.

ລັດຖະບານກ່າວຕື່ມວ່າ: ຈຳນວນຜູ້ເສຍຊີວິດອາດຈະເພີ່ມຂຶ້ນອີກ ເນື່ອງຈາກຍັງມີຜູ້ສູນຫາຍຈຳນວນຫຼາຍ.