ຂ່າວສານຫວຽດນາມລາຍງານວ່າ: ໃນວັນທີ 30 ຕຸລາ ຜ່ານມາກະຊວງການຄ້າ ອາເມຣິກາ ປະກາດຂໍ້ມູນສະແດງໃຫ້ເຫັນວ່າ, ເສດຖະກິດນຳໜ້າຂອງໂລກສືບຕໍ່ເຕີບໂຕຢ່າງໝັ້ນທ່ຽງໃນໄຕມາດທີ 3 ຂອງປີ 2024 ຍ້ອນການບໍລິໂພກ ແລະ ການໃຊ້ຈ່າຍຂອງພາກລັດ.
ຂ່າວລະບຸວ່າ: ບົດລາຍງານດັ່ງກ່າວຖືກນຳອອກມາເຜີຍແຜ່ໃນສະພາບທີ່ບັນຫາເສດຖະກິດ ຍັງເປັນບັນຫາສຳຄັນອັນດັບໜຶ່ງຂອງຜູ້ມີສິດເລືອກຕັ້ງປະທານາທິບໍດີອາເມຣິກາໃນວັນທີ 5 ພະຈິກ ຈະມາເຖິງນີ້.ໂດຍສະເພາະ, ເສດຖະກິດຂອງອາເມຣິກາ ໄດ້ເຕີບໂຕ 2,8% ໃນເດືອນກໍລະກົດ, ເດືອນສິງຫາ, ແລະ ເດືອນກັນຍາ, ຕໍ່າກວ່າ 0,2% ເມື່ອທຽບໃສ່ກັບລະດັບການເພີ່ມຂຶ້ນໃນໄຕມາດ 2, ຄືກັນກັບການຄາດຄະເນທີ່ຜ່ານມາຂອງຕະຫຼາດ.
ກະຊວງການຄ້າ ອາເມຣິກາ ໃຫ້ຮູ້ວ່າ: ການເພີ່ມຂຶ້ນຂອງ GDP ສະແດງໃຫ້ເຫັນເຖິງການເພີ່ມຂຶ້ນຂອງການໃຊ້ຈ່າຍຂອງຜູ້ບໍລິໂພກ, ການສົ່ງອອກ ແລະ ການໃຊ້ຈ່າຍຂອງພາກລັດ. ຢ່າງໃດກໍຕາມ, ການຫຼຸດລົງຂອງການລົງທຶນຂອງສິນຄ້າຄົງຄັງຂອງເອກະຊົນ ແລະຄຽງຄູ່ກັບການຫຼຸດລົງຂະໜາດໃຫຍ່ຂອງການລົງທຶນທີ່ຢູ່ອາໄສເຮັດໃຫ້ການເພີ່ມຂຶ້ນຕໍ່າກວ່າໄຕມາດທີ່ຜ່ານມາ.
ຕາມການຄາດຄະເນຂອງກອງທຶນເງິນຕາສາກົນ (IMF) ເມື່ອບໍ່ດົນມານີ້, ການເຕີບໂຕຂອງເສດຖະກິດ ອາເມຣິກາ ໃນປີນີ້ຈະລື່ນກາຍບັນດາພື້ນຖານເສດຖະກິດອື່ນໆເຊັ່ນ: ເຢຍລະມັນ, ຝຣັ່ງ ແລະ ອັງກິດ.
