ວິທະຍຸກະຈາຍສຽງຫວຽດນາມລາຍງານວ່າ: ການເພີ່ມທະວີການເຊື່ອມຕໍ່ບັນດາຂົງເຂດດຳເນີນທຸລະກິດ, ການຄ້າ ແລະ ການລົງທຶນ ຜ່ານຂັ້ນຕອນການບໍລິການການຂົນສົ່ງ (logistics) ຖືວ່າແມ່ນກົນໄກສຳຄັນຊ່ວຍຄຸ້ມຄອງການໃຊ້ຈ່າຍໃນການດຳເນີນທຸລະກິດໃນສະພາບການທີ່ມີການປ່ຽນແປງກ່ຽວກັບການແກ່ງແຍ້ງແລະ ພູມສາດການເມືອງ. ນີ້ແມ່ນຂໍ້ສັງເກດທີ່ໄດ້ຮັບການແບ່ງປັນຢູ່ກອງປະຊຸມສຳມະນາ “ຊຸກຍູ້ການເຊື່ອມຕໍ່ logistics ລະຫວ່າງ ໄທ ແລະ ຫວຽດນາມ” ທີ່ໄດ້ດຳເນີນໃນວັນທີ 29 ຕຸລາ ຜ່ານມາຢູ່ນະຄອນຫຼວງບາງກອກ ປະເທດໄທ.

ທ່ານ ຟ້າມວຽດຮຸງ ເອກອັກຄະລັດຖະທູດ ຫວຽດນາມ ປະຈຳ ໄທ ເນັ້ນໜັກວ່າ: ນີ້ແມ່ນເວທີປາໄສທີ່ມີປະສິດທິຜົນຊ່ວຍເພີ່ມທະວີການຮ່ວມມືໃນຂົງເຂດການບໍລິການການຂົນສົ່ງ (logistics) ລະຫວ່າງ ຫວຽດນາມ ແລະ ໄທ. ລັດຖະບານ ຫວຽດນາມ ກຳນົດ logistics ແມ່ນໜຶ່ງໃນບັນດາຂະແໜງການບໍລິການສຳຄັນ. ຕາມແຜນການໂດຍນາຍົກລັດຖະມົນຕີອະນຸມັດຜ່ານ, ຂະແໜງການບໍລິການ logistics ຫວຽດນາມ ສູ້ຊົນຮອດປີ 2025 ຈະບັນລຸ 6 ເປົ້າໝາຍໃຫຍ່, ອັດຕາການປະກອບສ່ວນຂອງການບໍລິການ logistics ເຂົ້າ GDP ບັນລຸ 5% - 6%. ໄທແມ່ນປະເທດທີ່ມີບົດຮຽນປະສົບການຫຼາຍຢ່າງໃນການພັດທະນາຂະແໜງການບໍລິການ logistics ໃນພາກພື້ນ. ເພາະສະນັ້ນ, ຄວາມສາມາດບົ່ມຊ້ອນໃນການຮ່ວມມືໃນຂະແໜງການບໍລິການ logistics ລະຫວ່າງວິສາຫະກິດຂອງສອງປະເທດໃນປັດຈຸບັນແມ່ນມີຄວາມສາມາດບົ່ມຊ້ອນຫຼາຍຢ່າງ, ດ້ວຍພື້ນຖານໂຄງລ່າງຄື: ສາງ, ໂຮງງານ, ຂົວໃຫ້ກຳປັ່ນທຽບທ່າ, ການໝູນໃຊ້ເຕັກໂນໂລຊີ, ເຄື່ອງຈັກ ແລະ ວັດຖຸອຸປະກອນທີ່ທັນສະໄໝ.