ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 31 ຕຸລາ ຜ່ານມາຢູ່ ໂດຮາ (Doha)ກາຕາ, ໃນການເຄື່ອນໄຫວຢ້ຽມຢາມ ກາຕາ ຢ່າງເປັນທາງການ ຂອງທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ຕາມຄຳເຊື້ອເຊີນຂອງທ່ານ ຊີກ ໂມຮາເໝັດ ບິນ ອັບດຸລເຣາະມານ ບິນ ຈາຊິມ ອັລ-ທານີ ນາຍົກລັດຖະມົນຕີ ກາຕາ. ພາຍຫຼັງກອງປະຊຸມສົນທະນາ ທ່ານ ຊີກ ໂມຮາເໝັດ ບິນ ອັບດຸລເຣາະມານ ບິນ ຈາຊິມ ອັລ-ທານີ ແລະ ທ່ານ ຟ້າມມິງຈິງ ກໍໄດ້ເປັນສັກຂີພິຍານພິທີລົງນາມໃນເອກະສານຮ່ວມມືຫຼາຍສະບັບລະຫວ່າງສອງປະເທດ.

ຂ່າວລະບຸວ່າ: ເອກະສານຮ່ວມມືສະບັບຕ່າງໆ ໂດຍບັນດາກະຊວງ, ຂະແໜງການ, ອົງການສອງປະເທດໄດ້ລົງນາມໃນຄັ້ງນີ້ລວມມີ: ອະນຸສັນຍາລະຫວ່າງລັດຖະບານ ກາຕາ ແລະ ລັດຖະບານ ຫວຽດນາມ ວ່າດ້ວຍການປັບປຸງສັນຍາກ່ຽວກັບການຂົນສົ່ງສິນຄ້າທາງການບິນ ທີ່ໄດ້ລົງນາມໃນວັນທີ 8 ມີນາ 2009. ບົດບັນທຶກວ່າດ້ວຍການຮ່ວມມືໃນຂົງເຂດກິລາລະຫວ່າງລັດຖະບານ ຫວຽດນາມ ແລະ ລັດຖະບານ ກາຕາ. ບົດບັນທຶກຊ່ວຍຈຳວ່າດ້ວຍການຮ່ວມມືໃນຂົງເຂດກົດໝາຍລະຫວ່າງກະຊວງຍຸຕິທຳ ຫວຽດນາມ ແລະ ກະຊວງຍຸຕິທຳ ກາຕາ. ບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສະຖາບັນການຕ່າງປະເທດກະຊວງການຕ່າງປະເທດ ຫວຽດນາມ ແລະ ສະຖາບັນການຕ່າງປະເທດກະຊວງການຕ່າງປະເທດ ກາຕາ. ບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງບໍລິສັດໃຫຍ່ ລົງທຶນດ້ວຍທຶນຂອງລັດ ຫວຽດນາມ (SCIC) ແລະ ອົງການລົງທຶນ ກາຕາ ກ່ຽວກັບການຮ່ວມມືລົງທຶນ.