ຂ່າວສານຫວຽດນາມລາຍງານວ່າ: ໃນວັນທີ 2 ພະຈິກ ຜ່ານມາທ່ານນາງ ເດຊີລູ ເລອອນ ລັດຖະມົນຕີກະຊວງການຄ້າຕ່າງປະເທດ ແລະ ການທ່ອງທ່ຽວ ຂອງເປຣູ ໃຫ້ຮູ້ວ່າ: ເປຣູ ຄາດຄະເນການແລກປ່ຽນການຄ້າກັບ 20 ພື້ນຖານເສດຖະກິດໃນເວທີປາໄສຮ່ວມມືເສດຖະກິດອາຊີ - ປາຊີຟິກ (APEC) ຈະລື່ນກາຍ 80 ຕື້ໂດລາ ໃນປີນີ້.

ຂ່າວລະບຸວ່າ: ໃນການ​ໃຫ້​ສຳພາດ​ກັບສື່ມວນຊົນກ່ອນ​ກອງ​ປະຊຸມ​ສຸດ​ຍອດ APEC ທີ່ຈະດຳ​ເນີນ​​ໃນວັນ​ທີ 10-16 ພະຈິກ ນີ້ ຢູ່ ນະຄອນຫຼວງລີມາ, ທ່ານ​ນາງ ເດຊີລູ ເລອອນ ​ໃຫ້​ຮູ້​ວ່າ: ວົງ​ເງິນ​ການ​ຄ້າ​ລະຫວ່າງ ​ເປຣູ ​ແລະ ບັນດາພື້ນຖານເສດຖະກິດAPEC ​ໃນ​ປີ 2024 ຈະ​ເພີ່ມ​ຂຶ້ນ​ເກືອບ 6% ​ເມື່ອ​ທຽບ​ໃສ່​ກັບ​ປີ 2023, ດ້ວຍຈຳນວນ 75,548 ຕື້ໂດລາ. ທ່ານຍັງໄດ້ຕີລາຄາຜົນດີຂອງການເປັນເຈົ້າພາບຈັດກອງປະຊຸມປະຈຳປີຂອງ APEC ໃນຄັ້ງນີ້.ໂດຍ​ອ້າງ​ເຖິງ​ການ​ເຊື່ອມ​ໂຍງ​ດ້ານ​ການ​ຄ້າ, ​ໃນ​ອາທິດ​ທີ່​ກອງ​ປະຊຸມ​ສຸດ​ຍອດ APEC, ທ່ານ​ນາງ ເດຊີລູ ເລອອນ ​ໃຫ້​ຮູ້​ວ່າ: ​ເປຣູ ຈະ​ລົງ​ນາມ​ໃນ​ຂໍ້ຕົກລົງເພື່ອເພີ່ມປະສິດທິພາບໃນ​ສັນຍາ​ການ​ຄ້າ​ເສລີ (FTA) ກັບ​ຈີນ ​ແລະ ສັນຍາ​ການ​ຄ້າ​ກັບ​ຮົງ​ກົງ (ຈີນ).

ຕາມ​ສະຖິຕິ​ຂອງ​ເປຣູ, ນັບ​ແຕ່​ປີ 1998, ການ​ຄ້າ​ລະຫວ່າງ​ປະ​ເທດ​ອາ​ເມ​ຣິ​ກາ​ໃຕ້​ ​ກັບ​ ພື້ນຖານ​ເສດຖະກິດ APEC ບັນລຸ​ລະດັບ​ເຕີບ​ໂຕ​ສະ​ເລ່ຍ 12%/ປີ ​ແລະ ​ໃນ​ໄລຍະ 2000-2021, ການ​ຄ້າ​ຂອງ​ເປຣູ ກັບ ​ບັນດາ​ພື້ນຖານ​ເສດຖະກິດ APEC ​ນີ້​ ໄດ້​ເພີ່ມ​ຂຶ້ນ​ກວ່າ 8 ​ເທົ່າ, ຈາກ 8 ຕື້ໂດລາ ເປັນ 67 ຕື້ໂດລາ.