ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 4 ພະຈິກ ຜ່ານມາຢູ່ນະຄອນຫຼວງຮ່າໂນ້ຍ, ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດ ຫວຽດນາມ ຊຸດທີ XV ໄດ້ປຶກສາຫາລືກ່ຽວກັບ 4 ເນື້ອໃນ, ໃນນັ້ນມີການຕີລາຄາໝາກຜົນຂອງການປະຕິບັດແຜນການພັດທະນາເສດຖະກິດ - ສັງຄົມ ປີ 2024, ຮ່າງແຜນການພັດທະນາເສດຖະກິດ - ສັງຄົມ ປີ 2025.

ຂ່າວລະບຸວ່າ: ຕາມບົດລາຍງານຂອງລັດຖະບານ, ລວມຍອດຜະລິດຕະພັນພາຍໃນ (GDP) ທົ່ວປະເທດຄາດວ່າຈະບັນລຸ 6,8 – 7% ສູງກວ່າເປົ້າໝາຍທີ່ສະພາແຫ່ງຊາດມອບໝາຍໃຫ້ (6 – 6,5%). ໂຄງປະກອບພື້ນຖານເສດຖະກິດມີການຫັນປ່ຽນຢ່າງຕັ້ງໜ້າຕາມທິດພັດທະນາເສດຖະກິດດີຈີຕອນ, ເສດຖະກິດສີຂຽວ. ທ່ານນາງ ຫງວຽນທິອຽນ ສະມາຊິກສະພາແຫ່ງຊາດແຂວງບ່າເຣ້ຍ - ຫວູງເຕົ່າ ໃຫ້ຮູ້ວ່າ: ປີ 2024, ຄາດວ່າໝົດປີຈະບັນລຸ ແລະ ລື່ນກາຍ 14/15 ເປົ້າໝາຍຫຼັກ, ການເຕີບໂຕ GDP ຄາດວ່າຈະບັນລຸ 6,8 – 7%. ກອງທຶນເງິນຕາສາກົນ (IMF) ຄາດຄະເນວ່າ ຫວຽດນາມ ນອນໃນກຸ່ມ 10 ພື້ນຖານເສດຖະກິດມີການຂະຫຍາຍຕົວແຖວໜ້າໂລກ ດ້ວຍລະດັບ 6,4% ໃນໄລຍະ 2024 – 2029. ເພື່ອບັນລຸເປົ້າໝາຍການຂະຫຍາຍຕົວຂອງເສດຖະກິດປີ 2024, 2025, ຂ້າພະເຈົ້າສະເໜີສະພາແຫ່ງຊາດ, ລັດຖະບານມີບັນດາກົນໄກນະໂຍບາຍພິເສດສະເພາະ, ສືບຕໍ່ຊ່ວຍບັນດາທ້ອງຖິ່ນ, ປະຊາຊົນຟື້ນຟູການຫາເງິນລ້ຽງຊີບ, ຮັບປະກັນຄວາມເປັນປົກກະຕິໃນການດຳລົງຊີວິດຂອງປະຊາຊົນ ແລະ ບູລະນະຟື້ນຟູເຂດທີ່ຖືກຜົນກະທົບຈາກໄພທຳມະຊາດ.

ບັນດາສະມາຊິກສະພາແຫ່ງຊາດ ຢັ້ງຢືນວ່າ: ເສດຖະກິດຫວຽດນາມ ມີການຂະຫຍາຍຕົວເປັນປົກກະຕິ ແລະ ເປັນໜ້າຊື່ນຊົມ. ທ່ານ ເຈິ່ນກວັກຕວັນ ສະມາຊິກສະພາແຫ່ງຊາດແຂວງຈ່າວິງ ໃຫ້ຮູ້ວ່າ:ການສົ່ງອອກມີການຂະຫຍາຍຕົວຢ່າງແຂງແຮງ, ການລົງທຶນຈາກຕ່າງປະເທດມີຄວາມຕັ້ງໜ້າ ຊຶ່ງຢັ້ງຢືນຖານະບົດບາດຂອງ ຫວຽດນາມ ແມ່ນສະຖານທີ່ປອດໄພ ແລະ ດຶງດູດໃຈ, ໄພເງິນເຟີ້ໄດ້ຮັບການຄວບຄຸມ, ບັນດານະໂຍບາຍປີການເງິນ ແລະ ເງິນຕາ ໄດ້ປະຕິບັດຢ່າງຄົບຊຸດ ໂດຍໄດ້ຊ່ວຍຮັກສາຄວາມເປັນປົກກະຕິ ແລະ ການພັດທະນາແບບຍືນຍົງ, ປະຕິບັດການຊ່ວຍເຫຼືອສັງຄົມ ໄດ້ເປັນຢ່າງດີ ແລະ ຮັບປະກັນການປ້ອງກັນຊາດ-ປ້ອງກັນຄວາມສະຫງົບ.