ຂ່າວຕ່າງປະເທດລາຍງານ ໃນວັນທີ 4 ພະຈິກ ຜ່ານມາວ່າ: 8 ປະເທດສະມາຊິກຂອງກຸ່ມຜູ້ຜະລິດນໍ້າມັນ ໂອເປັກພລັສ (OPEC+) ປະກາດຂະຫຍາຍເວລາຫຼຸດການຜະລິດນ້ຳມັນໂດຍສະໝັກໃຈເພີ່ມອີກ 1 ເດືອນ, ໂດຍຈະເລື່ອນເວລາຫຼຸດການຜະລິດນ້ຳມັນອອກໄປຈົນເຖິງທ້າຍເດືອນທັນວາ ເພື່ອຮັບມືກັບລາຄານ້ຳມັນທີ່ອ່ອນຕົວລົງຢ່າງຕໍ່ເນື່ອງ.

ປະເທດສະມາຊິກໂອເປັກພລັສ ປະກອບດ້ວຍອົງການກຸ່ມປະເທດຜູ້ສົ່ງອອກນ້ຳມັນ (OPEC) ແລະ ພັນທະມິດ,ໂດຍ 8 ປະເທດທີ່ມີສ່ວນຮ່ວມໃນການປັບຫຼຸດການຜະລິດນ້ຳມັນດັ່ງກ່າວມີ ຊາອຸດິດ ອາຣັບບີ, ຣັດເຊຍ, ອີຣັກ, ສະຫະລັດ ອາຣັບ ເອມິເຣດ, ກູເວດ,ກາຊັກສະຖານ,ອານເຊຣີ ແລະ ໂອມານ.

ລາຍ​ງານລະບຸວ່າ: ໂອເປັກ ຢືນຢັນວ່າກຸ່ມ​ປະ​ເທດ​ດັ່ງກ່າວຕົກລົງ​ຂະ​ຫຍາຍ​ເວ​ລາ​ປັບການຜະລິດໂດຍ​ສະ​ໝັກ​ໃຈ​ໃນ​ລະ​ດັບ 2.2 ລ້ານ​ບາ​ເຣນ​ຕໍ່​ວັນ ຊຶ່ງມີ​ຂຶ້ນ​ຕັ້ງແຕ່​ເດືອນ​ພະ​ຈິກ 2023 ໄປຈົນເຖິງທ້າຍເດືອນທັນວາ 2024.ກຸ່ມປະເທດດັ່ງກ່າວຍັງເນັ້ນຢ້ຳເຖິງຄວາມມຸ່ງໝັ້ນທີ່ຈະເຮັດໃຫ້ເປົ້າໝາຍການຜະລິດຂອງຕົນມີຄວາມສອດຄ່ອງກັນ ແລະ ຈະຊົດເຊີຍການຜະລິດທີ່ຫຼາຍເກີນຄວາມຕ້ອງການພາຍໃນເດືອນກັນຍາ 2025.

ຂໍ້ຕົກຄັ້ງນີ້ ເປັນໄປຕາມການເຄື່ອນໄຫວຄັ້ງລ້າສຸດໃນເດືອນກັນຍາ ຜ່ານມາ, ເມື່ອທັງ 8 ປະເທດປະກາດຂະຫຍາຍເວລາຫຼຸດການຜະລິດໂດຍສະໝັກໃຈອອກໄປອີກ 2 ເດືອນ ຊຶ່ງແຕ່ກ່ອນກຳນົດສິ້ນສຸດໃນທ້າຍເດືອນກັນຍາ ຜ່ານມາ.

ທັງນີ້, ລາຄານ້ຳມັນມີທ່າອ່ຽງຫຼຸດລົງຢ່າງຄ່ອຍເປັນຄ່ອຍໄປໃນໄລຍະອາທິດລ້າສຸດ ທ່າມກາງຄວາມເປັນຫ່ວງກ່ຽວກັບການສະໜອງທີ່ອາດຈະຫຼຸດລົງ.