ຂ່າວສານຫວຽດນາມລາຍງານເມື່ອບໍ່ດົນມານີ້, ກະຊວງນ້ຳມັນ ຂອງ ອີຣັກ ໄດ້ຖະແຫຼງການໃຫ້ຮູ້ວ່າ: ອີຣັກ ໄດ້ຫຼຸດການຜະລິດນ້ຳມັນ ແລະ ຫຼຸດການສົ່ງອອກນ້ຳມັນດິບລົງເຫຼືອ 3,3 ລ້ານບາເຣນຕໍ່ມື້, ອີງຕາມຂໍ້ຕົກລົງທີ່ຈະຫຼຸດການຜະລິດນ້ຳມັນຂອງກຸ່ມປະເທດຜູ້ສົ່ງອອກນ້ຳມັນ ແລະ ປະເທດຄູ່ຮ່ວມມື (OPEC+).
ຂ່າວລະບຸວ່າ: ຕາມຂໍ້ມູນທາງການ, ປະລິມານການສົ່ງອອກນ້ຳມັນຂອງ ອີຣັກ ໃນຕົ້ນປີນີ້ແມ່ນປະມານ 3,43 ລ້ານບາເຣນ.ໃນຖະແຫຼງການກ່າວວ່າ: ການປັບຫຼຸດດັ່ງກ່າວຈະສືບຕໍ່ດຳເນີນໃນບໍ່ເທົ່າໃດເດືອນຂ້າງໜ້າ ເພື່ອຮັບປະກັນໃຫ້ຜະລິດຕະພັນຢູ່ໃນໂຄຕ້າທີ່ອົງການ OPEC+ ໄດ້ກຳນົດໄວ້ ແລະ ເພື່ອໃຫ້ສົມດຸນການເກີນໂຄຕ້າໃນເດືອນກ່ອນໆ.
ຖະແຫຼງການດັ່ງກ່າວໄດ້ເນັ້ນໜັກເຖິງການຫຼຸດການຜະລິດ ແລະ ການສົ່ງອອກເພື່ອຮອງຮັບຄວາມສົມດຸນ ແລະ ສະຖຽນລະພາບໃນຕະຫຼາດນ້ຳມັນດິບທົ່ວໂລກ.
ເສດຖະກິດຂອງອີຣັກແມ່ນຂຶ້ນກັບການສົ່ງອອກນ້ໍາມັນດິບ ຊຶ່ງກວມເອົາປະມານ 90% ຂອງລາຍຮັບຂອງປະເທດ.
