ກະຊວງອຸດສາຫະກໍາ ແລະ ການຄ້າ (ອຄ) ຮ່ວມກັບ ບໍລິສັດ ລາວສະແຕນດາດ ຈຳກັດ ລົງນາມບົດບັນທຶກຄວາມເຂົ້າໃຈ (MOU) ໂຄງການສຶກສາຄວາມເປັນໄປໄດ້ໃນການຮ່ວມມືວຽກງານກວດກາ ແລະ ຢັ້ງຢືນເຄມີ ກ່ອນນໍາເຂົ້າມາໃນ ສປປ ລາວ ຊຶ່ງຈະຊ່ວຍຊຸກຍູ້ສົ່ງເສີມໃຫ້ຜູ້ດຳເນີນທຸລະກິດກ່ຽວກັບທາດເຄມີ ເອົາໃຈໃສ່ການນຳເຂົ້າເຄມີ ໃຫ້ຖືກຕາມເປົ້າໝາຍ, ມີຄວາມປອດໄພ ແລະສອດຄ່ອງກັບກົດໝາຍ, ລະບຽບການທີ່ຈັດຕັ້ງປະຕິບັດຢູ່ເປັນຕົ້ນ ກົດໝາຍ ວ່າດ້ວຍຄຸ້ມຄອງເຄມີ, ຂໍ້ຕົກລົງ ວ່າດ້ວຍການບໍລິການທີ່ປຶກສາຄວາມປອດໄພກ່ຽວກັບເຄມີ ແລະ ຂໍ້ຕົກລົງວ່າດ້ວຍການຂຶ້ນທະບຽນບັນຊີເຄມີ, ການນຳເຂົ້າ-ສົ່ງອອກ, ສົ່ງຜ່ານເຄມີ.
ພິທີລົງນາມບົດບັນທຶກດັ່ງກ່າວມີຂຶ້ນໃນວັນທີ 4 ພະຈິກຜ່ານມາທີ່ ກະຊວງ ອຄ, ລະຫວ່າງທ່ານບົວວັນວິລະວົງຫົວໜ້າຫ້ອງການກະຊວງ ອຄ ແລະທ່ານອຸທັນໄຕລິດທິປະທານບໍລິສັດ ລາວສະແຕນດາດ ຈຳກັດໂດຍມີທ່ານບຸນເຖິງດວງສະຫວັນຮອງລັດຖະມົນຕີກະຊວງ ອຄ ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານບຸນເຖິງ ດວງສະຫວັນກ່າວວ່າ: ການຮ່ວມມືຄັ້ງນີ້ ແມ່ນສອດຄ່ອງກັບພາລະບົດບາດຂອງກະຊວງອຸດສາຫະກຳແລະການຄ້າໃນການຕິດຕາມກວດກາແລະວິໄຈຄວາມຖືກຕ້ອງຂອງທາດເຄມີທີ່ນຳເຂົ້າ-ສົ່ງອອກຊຶ່ງຈະຊ່ວຍຊຸກຍູ້ສົ່ງເສີມໃຫ້ຜູ້ດຳເນີນທຸລະກິດກ່ຽວກັບທາດເຄມີ ເອົາໃຈໃສ່ນຳເຂົ້າເຄມີໃຫ້ຖືກເປົ້າໝາຍ, ມີຄວາມປອດໄພແລະສອດຄ່ອງກັບກົດໝາຍແລະນິຕິກຳຕ່າງໆ ຂອງ ສປປລາວ.
ໃນໄລຍະຜ່ານມາຂະແໜງອຸດສາຫະກຳແລະການຄ້າບໍ່ໄດ້ແຕ່ງຕັ້ງພະນັກງານໄປປະຈຳຢູ່ດ່ານສາກົນເພື່ອກວດກາເຄມີກ່ອນຈະນຳເຂົ້າມາໃນ ສປປລາວແຕ່ຈະກວດກາພາຍຫຼັງທີ່ນຳເຄມີເຂົ້າມາແລ້ວ, ເນື່ອງຈາກຍັງຂາດເຄື່ອງມືອຸປະກອນ, ພະນັກງານທີ່ມີຄວາມຊຳນານແລະຕ້ອງໄດ້ກຳນົດລາຍການເຄມີທີ່ຈະທຳການກວດກາແລະວິໄຈເປັນອັນສະເພາະຈຶ່ງສາມາດປະຕິບັດໄດ້.
ການຮ່ວມມືຄັ້ງນີ້ ຈະຊ່ວຍໃຫ້ພະນັກງານໃນຂະແໜງ ອຄ ໄດ້ຮັບການຍົກລະດັບຄວາມຮູ້ ຄວາມສາມາດໃນການສຶກສາ, ເກັບກຳແລະວິໄຈຕົວຢ່າງເຄມີເພີ່ມຂຶ້ນໃນອະນາຄົດ, ຫາກວຽກງານດັ່ງກ່າວມີຄວາມເຂັ້ມແຂງ, ຂະແໜງ ອຄ ອາດຈະພິຈາລະນາຄົ້ນຄວ້າແຕ່ງຕັ້ງພະນັກງານໄປປະຈຳຢູ່ດ່ານສາກົນເພື່ອກວດກາເຄມີກ່ອນນຳເຂົ້າມາ ສປປລາວເໝືອນກັບປະເທດອ້ອມຂ້າງຂອງພວກເຮົາ.
ທ່ານອຸທັນໄຕລິດທິກ່າວວ່າ: ເຄມີແຕ່ລະຊະນິດ ລ້ວນແຕ່ມີປະໂຫຍດແລະໂທດໃນລະດັບທີ່ແຕກຕ່າງກັນ, ມັນຂຶ້ນກັບການນຳໃຊ້ ແລະຄຸ້ມຄອງທີ່ຖືກຕ້ອງຕາມຫຼັກການວິຊາການຊຶ່ງຈຸດປະສົງຂອງການຮ່ວມມືໃນຄັ້ງນີ້ ແມ່ນເພື່ອກວດກາຄວາມຖືກຕ້ອງໃນການນຳເຂົ້າເຄມີຢູ່ດ່ານສາກົນ ກ່ອນນຳເຂົ້າມາ ສປປລາວເພື່ອຫຼີກລ່ຽງການນຳເຂົ້າທາດເຄມີທີ່ບໍ່ຖືກຕ້ອງຕາມກົດໝາຍຊຶ່ງພວກເຮົາມີຄວາມພ້ອມດ້ານງົບປະມານ, ເຕັກນິກວິຊາການແລະເຄື່ອງມືໃນການກວດວັດແທກຕ່າງໆ, ການລົງຕິດຕາມກວດກາ, ເກັບກຳຕົວຢ່າງມາວິໄຈ, ສະໜອງອຸປະກອນໃນການຕອບໂຕ້ໃນກໍລະນີເກີດອຸບັດເຫດ, ການແນະນຳແລະຝຶກອົບຮົມກ່ຽວກັບການຄຸ້ມຄອງເຄມີທີ່ຖືກຕ້ອງ.
ຂໍ້ມູນ: ເສດຖະກິດ-ການຄ້າ
