ເນື່ອງໃນໂອກາດງານບຸນນະມັດສະການພະທາດຫຼວງວຽງຈັນ ແລະ ວາງສະແດງສິນຄ້າປະຈໍາປີ 2024ເພື່ອເປັນການສ້າງໂອກາດຊຸກຍູ້ສົ່ງເສີມສິນຄ້າໂອດັອບ (ODOP) ຂອງນະຄອນຫຼວງວຽງຈັນ (ນວ) ແລະສິນຄ້າຄອບຄົວຕົວແບບທີ່ຈະກ້າວເປັນສິນຄ້າທີ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ, ບັນດາວິສາຫະກິດຂະໜາດນ້ອຍ-ກາງຈະໄດ້ມາວາງສະແດງ, ຈຳໜ່າຍສິນຄ້າທັງພາຍໃນແລະຕ່າງປະເທດໃຫ້ປະຊາຊົນຊາວ ນວ ແລະແຂກຕ່າງປະເທດໄດ້ເຫັນ, ໄດ້ຊົມໃຊ້ສິນຄ້າພ້ອມທັງເປັນການແລກປ່ຽນບົດຮຽນແລະປະສົບການຕ່າງໆຂອງບັນດາຫົວໜ່ວຍທຸລະກິດດ້ວຍກັນ, ເພື່ອເປັນການສົ່ງເສີມການທ່ອງທ່ຽວປະກອບສ່ວນໃນການຊຸກຍູ້ການຜະລິດພາຍໃນ, ຊົມໃຊ້ສິນຄ້າທີ່ຜະລິດໄດ້ພາຍໃນໃຫ້ກວ້າງຂວາງ, ສ້າງຈິດໃຈຊາດຊົມໃຊ້ຜະລິດຕະພັນພາຍໃນໃຫ້ຫຼາຍຂຶ້ນ.
ທ່ານນາງ ວັນມະນີ ພິມມະສານຫົວໜ້າພະແນກອຸດສາຫະກຳ ແລະ ການຄ້າ ນວ ໄດ້ຖະແຫຼງຂ່າວໃນວັນທີ 5 ພະຈິກຜ່ານມາ ທີ່ພະທາດຫຼວງວຽງຈັນວ່າ: ຄະນະຮັບຜິດຊອບຈັດງານບຸນໄດ້ກຳນົດການຈັດງານວາງສະແດງອອກເປັນ 2 ຈຸດຄື: ຢູ່ເດີ່ນສະໜາມຫຼວງພະທາດຫຼວງຈັດຂຶ້ນໃນລະຫວ່າງວັນທີ11-15 ພະຈິກ2024, ຢູ່ສູນການຄ້າລາວ-ໄອເຕັກຈັດຂຶ້ນໃນວັນທີ 9-17 ພະຈິກ 2024ແລະ ໄດ້ກຳນົດເອົາວັນທີ11 ພະຈິກ2024ເປັນມື້ເປີດງານວາງສະແດງສິນຄ້າຢ່າງເປັນທາງການ ຊຶ່ງເປົ້າໝາຍວາງໄວ້ຮອງຮັບຜູ້ປະກອບການເຂົ້າຮ່ວມງານໃນເດີ່ນສະໜາມຫຼວງພະທາດຫຼວງ.ເຂດສະໜາມຫຼວງ ແລະ ເດີ່ນພະທາດຫຼວງແບ່ງອອກເປັນ6 ຜູ້ຈັດສັນ ຕາມແຜນຜັງທີ່ໄດ້ຮັບຮອງ ແລະ ບູດວາງສະແດງສິນຄ້າໂອດັອບ, ຄອບຄົວຕົວແບບ, ສິນຄ້າອຸດສາຫະກໍາ, ສິນຄ້າການບໍລິການທີ່ມີຮູບແບບທັນສະໄໝ, ມີບູດວາງສະແດງປະຫວັດຄວາມເປັນມາຂອງພະທາດຫຼວງ, ວາງສະແດງທາງດ້ານວັດທະນະທໍາເປັນຈຸດເດັ່ນຂອງງານ.(ຢູ່ໃນຈຸດເດີ່ນສະໜາມຫຼວງ; ສໍາລັບຈຸດອື່ນໆ ກໍມີກິດຈະກໍາການຄ້າຂາຍສິນຄ້າ, ການບໍລິການອາຫານ, ການລະຫຼິ້ນສໍາລັບເດັກ ແລະ ກິດຈະກໍາອື່ນໆ ທີ່ລະບຽບການຊົ່ວຄາວບໍ່ໄດ້ຫວງຫ້າມ).ສະເພາະຮອບນອກຂອງສະໜາມຫຼວງມອບໃຫ້ບ້ານ ແລະ ເມືອງເປັນຜູ້ຈັດສັນບູດ ແລະ ກິດຈະກໍາ.
ປີນີ້ຄາດວ່າຈະມີຈໍານວນຫ້ອງວາງສະແດງ ແລະ ຈໍາໜ່າຍສິນຄ້າ 1,625ຫ້ອງ, ສະເພາະເດີ່ນສະໜາມຫຼວງພະທາດຫຼວງ. ສຳລັບການວາງສະແດງຢູ່ສູນການຄ້າລາວ-ໄອເຕັກ(ຕຶກເກົ່າ)ພື້ນທີ່ວາງສະແດງສິນຄ້າດ້ານໃນຕຶກແມ່ນຂາຍສິນຄ້າປະເພດບໍລິສັດຂາອອກ-ຂາເຂົ້າ, ສິນຄ້າທົ່ວໄປ, ສິນຄ້າໄອທີ, ສິນຄ້າ ໂອດັອບ ແລະ SME, ສິນຄ້າ ເຟີນີເຈີ້, ສິນຄ້າຂອງບັນດາປະເທດອາຊຽນ, ການໂຊລົດຈັກ ແລະ ລົດໃຫຍ່ ສາມາດຮອງຮັບໄດ້ 381 ບູດ. ໃນນີ້ປະກອບມີໂຊນອາຫານ, ໂຊນຂອງບັນດາປະເທດອາຊຽນ ຊຶ່ງພື້ນທີ່ດ້ານນອກຂອງອາຄານລານຈອດລົດດ້ານໜ້າສູນການຄ້າລາວ-ໄອເຕັກ ໄດ້ມີກິດຈະກໍາລະຫຼິ້ນຕ່າງໆ ເພື່ອເປັນສີສັນຂອງງານພ້ອມທັງຈະມີການຕົບແຕ່ງປະຕູໂຂງເຂົ້າງານແລະກໍານົດຈຸດຖ່າຍຮູບພາຍໃນງານ.
ທາງດ້ານລາຄາຄ່າເຊົ່າສະຖານທີ່ຢູ່ເດີ່ນສະໜາມຫຼວງ (ຂະໜາດຂອງຫ້ອງແມ່ນ3x4ແມັດ), ສໍາລັບຜະລິດຕະພັນສິນຄ້າໂອດັອບ3,500,000 ກີບ/ຫ້ອງແລະ ຄ່າຂີ້ເຫຍື້ອໃນ 5 ວັນເປັນເງິນ 150,000 ກີບ, ສໍາລັບຜະລິດຕະພັນສິນຄ້າຂອງຄອບຄົວຕົວແບບແລະສິນຄ້າພາຍໃນທົ່ວໄປທີ່ຜະລິດແລະມາຈໍາໜ່າຍດ້ວຍຕົນເອງລາຄາ 6,000,000 ກີບ/ຫ້ອງແລະ ຄ່າຂີ້ເຫຍື້ອໃນ 5 ວັນ ເປັນເງິນ400,000 ກີບ.ສໍາລັບສິນຄ້າທົ່ວໄປຂາຍ
ໃນງານລາຄາ 7,000,000-15,000,000ກີບ/ຫ້ອງແລະ ຄ່າຂີ້ເຫຍື້ອໃນ 5 ວັນເປັນເງິນ 400,000 ກີບ, ການນຳໃຊ້ກະແສໄຟຟ້າແມ່ນຂຶ້ນກັບການນຳໃຊ້ອຸປະກອນຕົວຈິງ (ອີງຕາມກົດລະບຽບຂອງບໍລິສັດໄຟຟ້າລາວ) ຊຶ່ງເຈົ້າຂອງຫົວໜ່ວຍທຸລະກິດຈະຕ້ອງໄດ້ຮັບຜິດຊອບຈ່າຍເອງ, ສະເພາະບູດທີ່ໄດ້ຕົບແຕ່ງແມ່ນຜູ້ປະກອບການທຸລະກິດຕົບແຕ່ງເອງໃຫ້ມີຄວາມຈົບງາມ.
ດ້ານລາຄາຄ່າເຊົ່າສະຖານທີ່ຢູ່ສູນການຄ້າລາວ-ໄອເຕັກ (ຂະໜາດຂອງຫ້ອງແມ່ນ 3x3 ແມັດ), ດ້ານໃນອາຄານສິນຄ້າທົ່ວໄປລາຄາ 6,000,000 - 15,000,000 ກີບ/ຫ້ອງ (ປະກອບມີດອກໄຟ 40 ວັດຈໍານວນ 2 ດອກ, ໂຕະ 1 ໜ່ວຍ, ຕັ່ງ 2 ໜ່ວຍ);ສຳລັບສິນຄ້າໜຶ່ງເມືອງ ໜຶ່ງຜະລິດຕະພັນໂອດັອບ (ຍົກເວັ້ນຜະລິດຕະພັນໄມ້) ທີ່ເຂົ້າຮ່ວມງານແມ່ນ 3,500,000 ກີບ/ຫ້ອງ, ດ້ານນອກອາຄານລາຄາ 1,500,000 - 15,000,000 ກີບ/ຫ້ອງ (ອໍານວຍຄວາມສະດວກດ້ານແສງສະຫວ່າງ), ສໍາລັບການວາງສະແດງຂອງບັນດານະຄອນຕ່າງປະເທດຈະໄດ້ແຈ້ງສະເພາະ, ຄ້າຂາຍຍ່ອຍດ້ານນອກ 100.000 ກີບ/ມື້, ສຳລັບລາຄາຄ່າບໍລິການຝາກລົດແລະບໍລິການອື່ນໆ, ຄ່າຝາກລົດ: ກໍານົດລາຄາໃຫ້ຜູ້ມອບເໝົາຫຼືປະມູນເກັບຄ່າບໍລິການຄື:ລົດໃຫຍ່ 30,000ກີບ/ຄັນ/ຄັ້ງ,ລົດຕຸກໆ15,000ກີບ/ຄັນ/ຄັ້ງ, ລົດຈັກ10.000ກີບ/ຄັນ/ຄັ້ງ, ຄ່າບໍລິການຫ້ອງນ້ຳ: ກໍານົດໃຫ້ຜູ້ມອບເໝົາຫຼືປະມູນເກັບຄ່າບໍລິການ 5,000ກີບ/ຄັ້ງ/ຄົນ; ສໍາລັບຄະນະກຳມະການ, ແຂກທີ່ຖືກເຊີນແລະໜ່ວຍງານຮັບຜິດຊອບການຈັດງານບໍ່ໃຫ້ເກັບຄ່າບໍລິການ, ການເກັບປີ້ຕະຫຼາດ: ຂາຍອາຫານຍ່ອຍ(ຕຳສົ້ມ, ຂາຍໄຂ່, ໝາກໄມ້,ລູກຊີ້ນ,ປາມຶກ...)50.000ກີບ/ມື້ແລະ ຄ່າຂີ້ເຫຍື້ອ30.000 ກີບ/ມື້, ຂາຍເຂົ້າຫຼາມ, ປີ້ງໄກ່ 50.000ກີບ/ມື້ແລະ ຄ່າຂີ້ເຫຍື້ອ30.000 ກີບ/ມື້, ຂາຍເຄື່ອງຮັບໃຊ້ທົ່ວໄປ50.000ກີບ/ມື້ແລະ ຄ່າຂີ້ເຫຍື້ອ30.000 ກີບ/ມື້.ຄ່າບັດຕິດລົດ ຂົນເຄື່ອງເຂົ້າຮ້ານຂາຍເຄື່ອງ 20.000/ບັດ, ບັດຜູ້ປະກອບການ 10.000 ກີບ/ບັດ.(ໃຫ້ລົດເຂົ້າຂົນເຄື່ອງໃນເດີ່ນແຕ່ເວລາ5:00 ໂມງ- 9:00ໂມງເຊົ້າ),ຄ່າບໍລິການປີ້ເຂົ້າຊົມເຮືອນຊົງລາວ 10.000 ກີບ/ຄົນ/ຄັ້ງ,ຄ່າອະນຸຍາດເຄື່ອງຂະຫຍາຍສຽງ 5,000,000 ກີບ.
ດັ່ງນັ້ນ, ຂໍເຊີນຊວນຜູ້ປະກອບການຊາວຄ້າຂາຍ ແລະ ມວນຊົນເຂົ້າຈັບຈອງສະຖານທີ່ທັງ 2 ຈຸດ ແລະເຊີນທ່ຽວຊົມງານວາງສະແດງ ແລະ ຂາຍສິນຄ້າປີ 2024 ໃນຄັ້ງນີ້ຢ່າງເບີກບານມ່ວນຊື່ນ ພ້ອມກັນເປັນເຈົ້າພາບທີ່ດີເພື່ອດຶງດູດການທ່ອງທ່ຽວລາວ ຂໍໃຫ້ທຸກພາກສ່ວນປຸ້ມລຸມຊ່ວຍກັນເຮັດໃຫ້ງານບຸນໃນຄັ້ງນີ້ປະສົບຜົນສໍາເລັດຢ່າງຈົບງາມ.
ຂ່າວ-ພາບ: ພູວັນ+ວັນເພັງ
