ກອງປະຊຸມວິທະຍາສາດລະດັບສາກົນ ຄັ້ງທີ 2 ປີ 2024 ໄດ້ຈັດຂຶ້ນໃນວັນທີ 6 ພະຈິກນີ້ ທີ່ມະຫາວິທະຍາໄລແຫ່ງຊາດ (ມຊ) ໂດຍການເປັນປະທານຂອງທ່ານ ສຸຣິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ມີທ່ານ ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີນັກຄົ້ນຄວ້າ ຈາກມະຫາວິທະຍາໄລແຫ່ງຊາດລາວ-ໄທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້, ນັກຄົ້ນຄວ້າ ແລະ ນັກວິໄຈຂອງ ມຊ ໄດ້ນໍາສະເໜີຜົນງານ 10 ເລື່ອງ, ຈາກປະເທດໄທ 50 ເລື່ອງ ລວມບົດນໍາສະເໜີ 60 ບົດ. ໃນນີ້, ມີ Keynote 3 ທ່ານຈາກປະເທດໄທຄື: ມະຫາວິທະຍາໄລມະຫິດົນ, ມະຫາວິທະຍາໄລມະຫາຈຸລາ, ສະຖາບັນ Science Technology and Innovation Policy Institute (STIPI)ແລະ ຈາກປະເທດລາວ 1 ທ່ານ.

ກອງປະຊຸມໃນຄັ້ງນີ້ຈັດຂຶ້ນເພື່ອເຜີຍແຜ່ຜົນງານທາງວິຊາການ, ຜົນການຄົ້ນຄວ້າທາງວິທະຍາສາດ ແລະ ເປີດໂອກາດໃຫ້ແກ່ນັກສຶກສາທັງລະດັບປະລິນຍາໂທ ແລະ ປະລິນຍາເອກໄດ້ນໍາສະເໜີຜົນການຄົ້ນຄວ້າຂອງຕົນເປີດເວທີການແລກປ່ຽນທາງວິຊາການລະຫວ່າງປະເທດ, ພາກພື້ນ ແລະ ສາກົນ. ສໍາລັບກອງປະຊຸມໄດ້ຈັດຂຶ້ນຄັ້ງນີ້ເປັນຄັ້ງທີ 2, ຄັ້ງທີ 1ໄດ້ຈັດແບບອອນລາຍໃນປີ 2023.ມາປີນີ້ກໍເປັນອີກປີໜຶ່ງທີ່ເຫັນວ່າມີບັນຍາກາດຫຼາຍຍ້ອນມີຫຼາຍມະຫາວິທະຍາໄລຈາກປະເທດເພື່ອນບ້ານກໍຄືຣາຊະອານາຈັກໄທເຂົ້າຮ່ວມ,ກອງປະຊຸມຄັ້ງນີ້ເຕັມໄປດ້ວຍຄວາມໝາຍ-ຄວາມສໍາຄັນທາງວິທະຍາສາດທີ່ເປີດໂອກາດໃຫ້ຫຼາຍພາກສ່ວນທັງພາຍໃນ ແລະ ຕ່າງປະເທດໄດ້ມີການເຜີຍແຜ່ຜົນງານຂອງຕົນເອງໃຫ້ສັງຄົມໄດ້ຮັບຮູ້ ແລະ ນໍາໄປໃຊ້ໃຫ້ເກີດປະໂຫຍດສູງສຸດ.

ໂອກາດນີ້, ທ່ານ ສຸຣິອຸດົງ ສູນດາລາ ໄດ້ໃຫ້ກຽດໂອ້ລົມເນັ້ນໜັກ 4 ບັນຫາສໍາຄັນວ່າ: 1.ວຽກງານວິທະຍາສາດແມ່ນມີຄວາມສໍາຄັນ ແລະ ຕິດພັນກັບທຸກຂະແໜງການ. ສະນັ້ນ, ຈົ່ງມີສະຕິຮ່ວມກັນຄົ້ນຄວ້າປະດິດຄິດສ້າງສິ່ງໃໝ່ ແລະ ຕ້ອງມີຈັນຍາບັນ-ຈັນຍາທຳຕໍ່ອາຊີບນັກຄົ້ນຄວ້າຢ່າງເຂັ້ມງວດ;2. ໃຫ້ບັນດານັກຄົ້ນຄວ້າຈົ່ງຮັບຮູ້ວ່າພວກທ່ານແມ່ນຜູ້ຄິດຄົ້ນນະວັດຕະກໍາມາໃຫ້ປະເທດຊາດ. ສະນັ້ນ, ຈົ່ງສຸມໃສ່ຄົ້ນຄວ້າວິທະຍາສາດໃຫ້ມີສິ່ງໃໝ່ໆພົ້ນເດັ່ນຫຼາຍຂຶ້ນ ແລະ ໃຫ້ເປັນທີ່ປະຈັກຕາທັງເປັນທີ່ຍອມຮັບທັງພາຍໃນ ແລະ ສາກົນ;3.ໃຫ້ບັນດາຄະນະນໍາທຸກຂັ້ນໃນສະຖາບັນການສຶກສາ, ມຊ ກໍຄືກະຊວງ ສສກ ເອົາໃຈໃສ່ຊຸກຍູ້ ແລະ ລະດົມແນວຄິດສ້າງນັກຮຽນ, ນັກສຶກສາເພື່ອໃຫ້ກາຍເປັນນັກວິທະຍາສາດທີ່ມີແນວຄິດຮັກຊາດຮັກການຄົ້ນຄວ້າ ແລະ ກາຍເປັນນັກວິທະຍາສາດໜຸ່ມນ້ອຍທີ່ຫ້າວຫັນ, ມີນໍ້າໃຈເສຍສະຫຼະ, ມີຄວາມສາມັກຄີ, ມິດຕະພາບ ແລະ ມີຫົວຄິດປະດິດສ້າງອັນທັນສະໄໝ;4.ໃຫ້ພະຍາຍາມນໍາໃຊ້ວິທະຍາສາດເຂົ້າຮັບໃຊ້ວຽກງານຕົວຈິງໃນການດໍາລົງຊີວິດຂອງປະຊາຊົນກໍຄືການພັດທະນາເສດຖະກິດ-ສັງຄົມຢ່າງເປັນຮູບປະທຳ.

ຂ່າວ-ພາບ: ວັນເພັງ+ພູວັນ