ການ​ເກັບກູ້ຜົນຜະລິດ​​ລະດູຝົນປະຈຳ​ປີ 2024 ຂອງຊາວກະສິກອນເມືອງພຽງ ແຂວງໄຊຍະບູລີ ຊຶ່ງເລີມແຕ່ຕົ້ນເດືອນຕຸລາເປັນຕົ້ນມາຮອດປັດຈຸບັນແມ່ນສຳເລັດແລ້ວ 20 ກວ່າສ່ວນຮ້ອຍຂອງແຜນການ. ປີ 2024 ທົ່ວເມືອງມີເນື້ອທີ່ນາແຜນການຜະລິດທັງໝົດ​ 6,880 ກວ່າເຮັກຕາ, ​ປະຕິບັດໄດ້ 100% ຂອງເນື້ອທີ່ແຜນການ 6,880 ກວ່າເຮັກຕາ. ໃນນີ້, ເນື້ອທີ່ນາທົ່ວໄປ 6,740 ກວ່າເຮັກຕາ ແລະ ນາກະເສດສຸມ 140 ກວ່າເຮັກຕາ ເທົ່າກັບ 144%, ຂອງເນື້ອທີ່ແຜນການ. ໃນນີ້ ນາຢອດເມັດ 80 ກວ່າເຮັກຕາ, ນາວ່ານ 50 ກວ່າເຮັກຕາ ແລະ ດໍາດວ້ຍເຄື່ອງຈັກ 5.5 ເຮັກຕາ. ແນວພັນເຂົ້າທີປູກໃນປີນີ້ສ່ວນຫຼາຍແມ່ນ ເຂົ້າຖີ່ນແກ້ວ, ທ່າດອກຄໍາ 8, ທ່າສະໂນ 11, ຫອມມະລິ105, ຫອມທົ່ງ, ຈ້າວກາງ ກຂ 15, ເຊບັ້ງໄຟ 2-4, ເມືອງພຽງ 2, ທ່າດອກຄໍາ 17. ມາຮອດປັດຈຸບັນໄດ້ເກັບກຽ່ວແລ້ວ 1,370 ກວ່າເຮັກຕາ ເທົ່າກັບ 20% ຂອງເນື້ອທີ່ແຜນການ ແລະ ເນື້ອທີການຜະລິດເຂົ້ານາປີໄດ້ຖືກຜົນກະທົບຈາກໄພນໍ້າຖ້ວມຈໍານວນ 240 ກວ່າເຮັກຕາ ມີ 14 ບ້ານ, ມີ 587 ຄອບຄົວ.

ອັນທີ່ພົ້ນເດັ່ນຢູ່ເມືອງພຽງໃນການຜະລິດ ແລະ ການກໍ່ສ້າງພື້ນຖານໂຄງລາງຊົນລະປະທານຄື: ການປູກເຂົ້ານາ 3 ຮອບວຽນໄດ້ທົດລອງມາໄດ້ 2 ປີຄື: ຢູ່ບ້ານນາໂສມ ແລະ ບ້ານສົມສະຫວັນ ສໍາເລັດແລ້ວ 20 ກວ່າເຮັກຕາມີ 33 ຄອບຄົວ ແລະ ການກໍ່ສ້າງພື້ນຖານໂຄງລາງຊົນລະປະທານໃນການກໍ່ສ້າງອ່າງໂຕ່ງແບບຢືນຢົງ ແລະ ແຜນການຜະລິດປູກເຂົ້າ 3 ຮອບວຽນແມ່ນໄດ້ສຶບຕໍ່ຂະຫຍາຍອີກ 50 ເຮັກຕາຢູ່ 10 ບ້ານ ເຂດຊົນລະປະທານນໍ້າຕານ, ນໍ້າພຽງ1 ແລະ ນໍ້າພຽງ 2. ສຳລັບເນື້ອທີ່ເຂົ້າໄຮ່ແຜນການທັງໝົດທົ່ວ​ເມືອງ 600 ເຮັກຕາ, ປະຕິບັດໄດ້ຕົວ​ຈີ​ງ 540 ກວ່າເຮັກຕາ ເທົ່າກັບ 93.41% ຂອງແຜນການ (ສາເຫດທີ່ເຮັດໃຫ້ເນື້ອທີປູກເຂົ້າໄຮ່ລຸດລົງ ແລະ ບໍ່ໄດ້ຕາມແຜນການ ແມ່ນຍ້ອນປະຊາຊົນຫັນມາປູກພືດເປັນສິນຄ້າຫຼາຍຂຶ້ນ) ແລະ ໄດ້ເກັບກຽ່ວແລ້ວ 180 ກວ່າເຮັກຕາ ເທົ່າກັບ 35%. ການ​ປູກ​ພືດ​ລະດູຝົນ ມີເນື້ອທີ່ແຜນການທົ່ວ​ເມືອງ 17,910 ເຮັກຕາ, ​ມາຮອດປັດຈຸບັນເກັບກູ້ຜົນ​ຜະລິດ 7,680 ກວ່າເຮັກຕາ ເທົ່າກັບ 32%. ໃນ​ນີ້, ພືດສະບຽງອາຫານ ມີເນື້ອທີ່ປະຕິບັດ 520.05 ເຮັກຕາ ເທົ່າກັບ 140.55% ຂອງເນື້ອທີແຜນການ 370 ເຮັກຕາ, ມາຮອດປັດຈຸບັນນີ້ສາມາດເກັບກູ້ແລ້ວ 310 ກວ່າເຮັກຕາ ເທົ່າກັບ 60%. ພືດເປັນສິ້ນຄ້າ ມີເນື້ອທີ່ປະຕິບັດ 23,500 ກວ່າເຮັກຕາ ເທົ່າກັບ 136% ຂອງເນື້ອທີແຜນການ 17,300 ເຮັກຕາ. ໃນນີ້ ມັນຕົ້ນ 15,960 ກວ່າເຮັກຕາ, ສາລີແຂງ 2,300.45 ເຮັກຕາ, ໝາກເດືອຍ 2,650 ເຮັກຕາ, ໝາກງາ 325.20 ເຮັກຕາ ແລະ ພືດອື່ນໆ 2,270.45 ເຮັກຕາ, ມາຮອດປັດຈຸບັນ ສາມາດເກັບກູ້ແລ້ວ 7,373.35 ເຮັກຕາ, ເທົ່າກັບ 31.37%.

ສຳລັບແຜນການຜະລິດພືດລະດູແລ້ງປີ 2025 ຕາມ​ແຜນ​ການ​ຜະ​ລິດເນື້ອທີ່​ປູກ​ພືດລະດູແລ້ງທັງໝົດ 2,050 ເຮັກຕາ. ໃນນີ້ ເນື້ອທີ່ປູກເຂົ້ານາແຊງ 870 ເຮັກຕາ, ແຜນການຈັດຕັ້ງປະຕິບັດນາແຊງ 870 ເຮັກຕາ. ໃນນີ້, ນາດໍາທົ່ວໄປ 800 ເຮັກຕາ ແລະ ນາກະເສດສຸມ 70 ເຮັກຕາ (ນາຢອດ 40 ເຮັກຕາ ແລະ ນາຫວ່ານ 20 ເຮັກຕາ, ນາດໍາກົນຈັກ 10 ເຮັກຕາ) ຄາດຄະເນສະມັດຕະພາບ 5 ໂຕນ/ເຮັກຕາ, ຜົນຜະລິດ 4,350 ໂຕນ. ສຳ​ລັບ​ການ​ປູກ​ພືດ​ໃນ​ລະ​ດູ​ແລ້ງໄດ້​ມີ​ການ​ສົມ​ທົບ​ກັບ​ຜູ້​ປະ​ກອບ​ການ​ພາ​ຍໃນ ແລະ ຕ່າງ​ປະ​ເທດ ລົງ​ທືນ​ສົ່ງ​ເສີມ​ການ​ປູກ​ຖົ່ວ​ເຫຼືອງ ແລະ ໝາກ​ໂມ; ສຳ​ລັບ​ປູກ​ຖົ່ວ​ເຫຼືອງ​ມີ 3 ບໍລິ​ສັດ, ເນື້ອ​ທີ່​ແຜນ​ການ ທັງ​ໝົດ 900 ເຮັກ​ຕາ. ສ່ວນ​ການ​ສົ່ງ​ເສີມ​ປູກ​ພືດ​ອື່ນໆ ຕາມ​ປະ​ເພ​ນີ​ທີ່​ຊາວ​ນາ​ເຄີຍ​ປູກ​ມາ​ໃນ​ແຕ່​ລະ​ປີ 580 ເຮັກຕາ​ເຊັ່ນ: ສາ​ລີ​ຫວານ 180 ເຮັກຕາ, ໝາກ​ແຕງ 50 ເຮັກຕາ, ພືດ​​ພັກອື່ນໆ 350 ເຮັກຕາ.

(ຂ່າວ: ແສງສຸດາ ກິ່ງສະຫວັດ)