ໃນວັນທີ 5 ພະຈິກ ຜ່ານມາ ຢູ່ທີ່ຫ້ອງປະຊຸມຫ້ອງການແນວລາວສ້າງຊາດ ເມືອງສິງ ແຂວງຫຼວງນ້ຳທາ ໄດ້ຈັດຝືກອົບຮົມໃຫ້ບັນດາຫົວໜ່ວຍທຸລະກິດບໍລິການໂຮງແຮມ, ເຮືອນພັກ, ຮ້ານອາຫານ ແລະ ຮ້ານກີນດື່ມ ຢູ່ເມືອງສິງ ໂດຍເປັນປະທານຂອງທ່ານ ສີສຸພັນ ທຳປັນຍາ ຫົວໜ້າພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ແຂວງຫຼວງນ້ຳທາ, ມທ່ານ ສິງທອງ ສຸລິຍາ ຮອງຫົວໜ້າຫ້ອງການ ຖວທ ເມືອງສິງ ແລະ ຕົວແທນຫົວໜ່ວຍທຸລະກິດທົ່ວເມືອງສິງເຂົ້າຮ່ວມ.

ທ່ານ ນາງ ສົມມາລາ ຫຸມວິໄຊ ຮອງສູນຝືກອົບຮົມ ພະແນກ ຖວທ ແຂວງ ໄດ້ສະເໜີພາກທິດສະດີການຝືກອົບຮົມການບໍລິການເຮືອນພັກ, ການບໍລິການອາຫານ ແລະ ເຄື່ອງດື່ມເພື່ອໃຫ້ການບໍລິການມີຄຸນນະພາບ, ການເອົາໃຈໃສ່ລູກຄ້າ. ຈາກນັ້ນ, ຍັງໄດ້ປະຕິບັດຕົວຈິງກ່ຽວກັບການອະນາໄມ ແລະ ການປູຕຽງຫ້ອງນອນແຂກສຳລັບເຮືອນພັກ, ການຈັດໂຕະອາຫານ ແລະ ການເສີບອາຫານ ໃຫ້ກັບຫົວໜ່ວຍທຸລະກິດຕື່ມອີກ. ຈາກນັ້ນ, ກໍໄດ້ມອບໃບຢັ້ງຢືນຜ່ານການຝືກອົບຮົມໃຫ້ສໍາມະນາກອນ ຕື່ມອີກ.

ທ່ານ ສີສຸພັນ ທຳປັນຍາ ໄດ້ເນັ້ນໜັກບາງບັນຫາທີ່ສຳຄັນໃຫ້ແກ່ບັນດາຫົວໜ່ວຍທຸລະກິດບໍລິການໂຮງແຮມ, ເຮືອນພັກ, ຮ້ານອາຫານ ແລະ ຮ້ານກີນດື່ມ ຢູ່ພາຍໃນເມືອງສິງໃຫ້ເຫັນຄວາມສຳຄັນໃນການບໍລິການລູກຄ້າກໍຄືແຂກພາຍໃນ ແລະ ຕ່າງປະເທດ ໃຫ້ທຸລະກິດຂອງຕົນເອງໄດ້ຮັບຜົນດີຂຶ້ນໄປເທື່ອລະກ້າວ.