ສະພາ ປະຊາຊົນແຂວງສາລະວັນ ໄດ້ລົງເຄື່ອນໄຫວ ຕິດຕາມ, ກວດກາການຈັດຕັ້ງປະຕິບັດບັນດາຄາດໝາຍຕ່າງໆ ແລະ ມະຕິຂອງສະພາປະຊາຊົນແຂວງ ໃນຂົງເຂດວຽກງານວັດທະນະທໍາ-ສັງຄົມ ຢູ່ເມືອງຕະໂອ້ຍ, ຊຶ່ງນໍາໂດຍທ່ານ ຂັນໄຊ ຣັດຖະເຮົ້າ ຄະນະປະຈໍາພັກແຂວງ ສະມາຊິກສະພາແຫ່ງຊາດ ຮອງປະທານ ສະພາປະຊາຊົນແຂວງສາລະວັນ ພ້ອມດ້ວຍຄະນະ ໂດຍການຕ້ອນຮັບຂອງທ່ານ ບຸນເນື້ອ ຫຼອງຄໍາໄຕ ກໍາມະການພັກແຂວງ ເລຂາພັກ ເຈົ້າເມືອງຕະໂອ້ຍ ຫົວໜ້າສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງທີ 14 ເມືອງຕະໂອ້ຍ ພ້ອມດ້ວຍຄະນະ ທີ່ຫ້ອງປະຊຸມຊັ້ນ II ຂອງຫ້ອງວ່າການປົກຄອງເມືອງ ໃນວັນທີ 6 ພະຈິກ ຜ່ານມາ.

ທ່ານ ບຸນເນື້ອ ຫຼອງຄໍາໄຕ ໄດ້ລາຍງານ ການນໍາພາ - ຊີ້ນໍາ ແລະ ການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ຂອງເມືອງຕະໂອ້ຍ ໃນໄລຍະ 9 ເດືອນຕົ້ນ ແລະ ທິດທາງແຜນການນໍາພາລວມ, ແຜນພັດທະນາເສດຖະກິດ - ສັງຄົມ 3 ເດືອນທ້າຍ ປີ 2024 ໂດຍຫຍໍ້ວ່າ: ຕະຫຼອດໄລຍະ 9 ເດືອນມານີ້ ຄະນະພັກ - ອົງການປົກຄອງເມືອງໄດ້ຖືເອົາວຽກງານການສຶກສາອົບຮົມການເມືອງ - ແນວຄິດເປັນກົກ ແລະ ສອດຫ້ອຍໄປກັບທຸກຂົງເຂດວຽກງານ ອັນໄດ້ເຮັດໃຫ້ແນວທາງນະໂຍບາຍຂອງພັກ, ລະບຽບກົດໝາຍ, ແຜນພັດທະນາເສດຖະກິດ - ສັງຄົມຂອງລັດ ໃນແຕ່ລະໄລຍະລົງໄປເຖິງຮາກຖານປະຊາຊົນ. ໂດຍສະເພາະໄດ້ນໍາເອົາບັນດາມະຕິ, ຄໍາສັ່ງ, ແຈ້ງການຂໍ້ກໍານົດຕ່າງໆຂອງແຂວງ ແລະ ເມືອງລົງສູ່ຮາກຖານບ້ານ ອັນໄດ້ເຮັດໃຫ້ເຂົາເຈົ້າມີຄວາມຮັບຮູ້ ແລະ ມີຄວາມເຊື່ອໝັ້ນຕໍ່ການນໍາພາຂອງພັກ.

ໃນໄລຍະ 9 ເດືອນຕົ້ນປີ 2024 ເມືອງຕະໂອ້ຍສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 2,355 ຕື້ກີບ ທຽບໃສ່ແຜນປີ ປະຕິບັດໄດ້ 99,02% ແລະ ປະຕິບັດລາຍຈ່າຍ ທັງໝົດ 2,730 ຕື້ກີບ, ທຽບໃສ່ແຜນປີ ປະຕິບັດໄດ້ 70,68%; ທົ່ວເມືອງໄດ້ປະກາດບ້ານສາທາລະນະສຸກແບບຢ່າງ 56 ບ້ານ ກວມເອົາ 100%, ປະກາດບ້ານຢຸດຕິການຖ່າຍຊະຊາຍ ແລະ ອັດຕາການຊົມໃຊ້ນໍ້າສະອາດ ກວມເອົາ 98,21%; ບ້ານພັດທະນາທາງດ້ານແຮງງານ ສະຫວັດດີການ - ສັງຄົມ ຈໍານວນ 2 ບ້ານ, ບ້ານວັດທະນະທໍາ 30 ບ້ານ, ພ້ອມດຽວກັນນີ້ ບັນດາຜູ້ເຂົ້າຮ່ວມຍັງໄດ້ປະກອບຄໍາຄິດເຫັນ ແລະ ຊີ້ແຈ້ງ ໃນຂົງເຂດວຽກງານວັດທະນະທໍາ - ສັງຄົມທົ່ວເມືອງ ດ້ານດີ, ດ້ານອ່ອນ ແລະ ຄົງຄ້າງໄລຍະຜ່ານມາທີ່ຍັງບໍ່ທັນບັນລຸຕາມລະດັບຄາດໝາຍທີ່ຈະຕ້ອງໄດ້ແກ້ໄຂໃນຕໍ່ໜ້າ.

(ຂ່າວ: ກິລິຍາ)