ໃນວັນທີ 7 ພະຈິກຜ່ານມາ ທີ່ນະຄອນຫຼວງວຽງຈັນ ສປປ ລາວ, ກະຊວງການເງິນ ແລະ ທະນາຄານແຫ່ງ ສປປ ລາວ, ໄດ້ສຳເລັດການເປັນເຈົ້າພາບ ແລະ ປະທານຮ່ວມກັບ ສ.ເກົາຫຼີ, ຈັດກອງປະຊຸມເຈົ້າໜ້າທີ່ອາວຸໂສຄະນະເຮັດວຽກອາຊຽນ+3 ຄັ້ງທີ 4 ສົກປີ 2024, ໂດຍຕາງໜ້າໃຫ້ກະຊວງການເງິນແມ່ນ ທ່ານ ວົງຄໍາແຫງ ວົງທະຈັກ ຫົວໜ້າກົມການເງິນຕ່າງປະເທດ, ທະນາຄານແຫ່ງ ສປປ ລາວ ແມ່ນທ່ານ ນາງ ມາລີນີ ຊາວັນນາ ຮັກສາການຫົວໜ້າກົມຮ່ວມມືສາກົນ ຮ່ວມກັບ ທ່ານ ໂຊຮີ ກວັກ ຫົວໜ້າພະແນກຮ່ວມມືການເງິນສາກົນກະຊວງເສດຖະກິດ-ການເງິນ ແລະ ທ່ານຊູຮຸນຢຸນ ຮອງຫົວໜ້າກົມຮ່ວມມືການເງິນຈາກທະນາຄານກາງ ສ.ເກົາຫຼີ ພ້ອມດ້ວຍຄະນະຜູ້ແທນກອງປະຊຸມຈາກບັນດາປະເທດສະມາຊິກອາຊຽນ+3, ກອງເລຂາອາຊຽນ, ອົງການຕິດຕາມເສດຖະກິດມະຫາພາກອາຊຽນ+3, ທະນາຄານພັດທະນາອາຊີ, ກອງທຶນການເງິນສາກົນ, ທະນາຄານໂລກ,ບໍລິສັດ SEADRIF ເຂົ້າຮ່ວມ.

ໃນໂອກາດນີ້, ທ່ານ ວົງຄໍາແຫງ ວົງທະຈັກ ແລະ ທ່ານ ໂຊຮີ ກວັກ ໄດ້ໃກ່າວເປີດກອງປະຊຸມ ແລະ ຕ້ອນຮັບບັນດາຜູ້ຕາງໜ້າຈາກສະມາຊິກ ASEAN+3 ແລະ ໄດ້ເນັ້ນເຖິງຄວາມສໍາຄັນຂອງການຮ່ວມມືໃນພາກພື້ນອາຊຽນ, ພ້ອມທັງໄດ້ຍົກໃຫ້ເຫັນເຖິງຜົນສໍາເລັດຂອງກອງປະຊຸມສຸດຍອດອາຊຽນຄັ້ງທີ 44 ແລະ 45 ທີ່ຈັດຂຶ້ນຢູ່ ສປປ ລາວ, ຊຶ່ງວຽກງານການພັດທະນາດ້ານການເງິນອາຊຽນ+3 ກໍໄດ້ນໍາເຂົ້າໄປລາຍງານໃນກອງປະຊຸມດັ່ງກ່າວ.

ກອງປະຊຸມເຈົ້າໜ້າທີ່ອາວຸໂສຄະນະເຮັດວຽກຄັ້ງທີ 4 ນີ້, ຈຸດປະສົງ ແລະ ເປົ້າໝາຍເພື່ອສືບຕໍ່ປຶກສາຫາລືບັນດາວຽກງານການຮ່ວມມືດ້ານການເງິນອາຊຽນ+3, ໂດຍຄາດວ່າຈະສາມາດສະຫຼຸບແລະ ຮັບຮອງຄວາມຄືບໜ້າບັນດາໜ້າວຽກຕ່າງໆເພື່ອກະກຽມເອົາເຂົ້າລາຍງານໃນກອງປະຊຸມ ຮອງລັດຖະມົນຕີ ແລະ ຮອງຜູ້ວ່າການທະນາຄານກາງອາຊຽນ+3, ທີ່ຈະໄດ້ຈັດຂຶ້ນໃນລະຫວ່າງວັນທີ 17-18 ທັນວາ 2024 ນີ້, ທີ່ສ. ເກົາຫຼີ.

ກອງປະຊຸມຄັ້ງນີ້, ເປັນກອງປະຊຸມທ້າຍປີຂອງການເປັນປະທານຮ່ວມລະຫວ່າງ ສປປ ລາວ ແລະ ສ. ເກົາຫຼີ ໃນການຄົ້ນຄວ້າ ແລະ ຮັບຮອງບັນດາແຜນວຽກການຮ່ວມມືດ້ານການເງິນອາຊຽນ+3 ປະຈໍາປີ 2024 ແລະ ສືບຕໍ່ປຶກສາຫາລືບັນຫາຄົງຄ້າງ, ລວມທັງບັນດາຂໍ້ລິເລີ່ມການຮ່ວມມືໃໝ່ໆ...ເພື່ອການເພີ່ມທະວີສ້າງຄວາມເຂັ້ມແຂງໃຫ້ແກ່ວຽກງານການຮ່ວມມືດ້ານການເງິນອາຊຽນ+3.

ຄຽງຄູ່ກັນນັ້ນ, ກອງປະຊຸມຍັງຈະໄດ້ສືບຕໍ່ປຶກສາຫາລືການປັບປຸງສັນຍາ CMIM ແລະ ການຮັບຮອງຜົນການທົດລອງການກູ້ຢືມພາຍໃຕ້ສັນຍາ CMIM ຄັ້ງທີ 15. ກອງປະຊຸມຍັງໄດ້ຄົ້ນຄວ້າການສ້າງຄວາມເຂັ້ມແຂງໃຫ້ແກ່ອົງການຕິດຕາມເສດຖະກິດມະຫາພາກອາຊຽນ+3 ໂດຍສະເພາະແມ່ນການຮັບຮອງແຜນການຈັດຕັ້ງປະຕິບັດໄລຍະກາງ 2025-2027, ການຮັບຮອງແຜນການຈັດຕັ້ງປະຕິບັດງົບປະມານປະຈໍາປີ 2025, ຄົ້ນຄວ້າ ແລະ ປຶກສາຫາລືບັນດາວຽກງານບໍລິຫານ, ການສ້າງຍຸດທະສາດ, ການປັບປຸງຮ່າງຄູ່ມືຮັບໃຊ້ໃຫ້ແກ່ວຽກງານການຮ່ວມມືດ້ານການເງິນອາຊຽນ+3 ແລະ ວຽກປິ່ນອ້ອມຕ່າງໆຂອງ AMRO; ການແລກປ່ຽນ ແລະ ປຶກສາຫາລືບັນດາຄວາມຄືບໜ້າຂອງວຽກງານຂໍ້ລິເລີ່ມການພັດທະນາຕະຫຼາດພັນທະບັດອາຊີ, ເພື່ອຊຸກຍູ້ການອອກພັນທະບັດສະກຸນເງິນທ້ອງຖິ່ນພາຍໃນພາກພື້ນ, ລວມທັງ ຂໍ້ລິເລີ່ມວຽກງານການສະໜອງທຶນໄພພິບັດທາງທຳມະຊາດ ຊຶ່ງເປັນວຽກໜຶ່ງທີ່ສຳຄັນທີ່ຄົ້ນຄວ້າກົນໄກທາງດ້ານການເງິນ, ຄົ້ນຄວ້າດ້ານນະໂຍບາຍເພື່ອສະໜັບສະໜູນໃຫ້ແກ່ວຽກງານປ້ອງກັນໄພພິບັດທາງທຳມະຊາດຂອງພາກພື້ນອາຊຽນ+3.

ນອກຈາກນັ້ນ, ຍັງມີກອງປະຊຸມສໍາມະນາປິນອ້ອມຈັດຂຶ້ນໃນໄລຍະດຽວກັນເປັນ ຕົ້ນ: ກອງປະຊຸມສໍາມະນາກ່ຽວກັບການສະໜອງທຶນສໍາລັບວຽກງານໄພພິບັດທາງທໍາມະຊາດ ແລະ ການແລກປ່ຽນດ້ານວິຊາການລະຫວ່າງອາຊຽນ + 3 ແລະ IMF ທີ່ປະເທດສະມາຊິກຈະໄດ້ແລກປ່ຽນ,ຄົ້ນຄ້ວາ, ປຶກສາຫາລືເພື່ອສັງລວມ, ສະຫຼຸບວຽກງານ ແລະ ກະກຽມນໍາໄປລາຍງານໃນກອງປະຊຸມຮອງລັດຖະມົນຕີ ແລະ ຮອງຜູ້ວ່າທະນາຄານກາງອາຊຽນ+3.

(ແຫຼ່ງຂ່າວ: ກະຊວງການເງິນ)