ຂ່າວສານຊີອາໄອລາຍງານ ໃນທ້າຍອາທິດຜ່ານມາ, ອົງການພາສີຈີນເປີດເຜີຍຂໍ້ມູນໃຫ້ຮູ້ວ່າ: ໃນ 10 ເດືອນປີ 2024 ນີ້, ຈີນມີມູນຄ່າການຄ້າສິນຄ້າຂາເຂົ້າ-ຂາອອກເຖິງ 36,020 ຕື້ຢວນ, ເພີ່ມຂຶ້ນ 5,2% ເມື່ອທຽບໃສ່ໄລຍະດຽວກັນຂອງປີກາຍ, ການຄ້າກັບຕ່າງປະເທດໄດ້ເຕີບໂຕຢ່າງໝັ້ນທ່ຽງ.

ຂ່າວລະບຸວ່າ: ອີງຕາມໂຕເລກສະຖິຕິຂອງດ່ານພາສີຈີນສະແດງໃຫ້ເຫັນວ່າໃນ 10 ເດືອນປີ 2024, ຈີນມີມູນຄ່າການຄ້າຂາເຂົ້າ-ຂາອອກກັບປະເທດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ເຖິງ 16,940 ຕື້ຢວນ, ເພີ່ມຂຶ້ນ 6,2%. ໃນນັ້ນ, ມູນຄ່າການຄ້າຂາເຂົ້າ-ຂາອອກກັບອາຊຽນມີເຖິງ 5,670 ຕື້ຢວນ, ເພີ່ມຂຶ້ນ 8,8%, ກວມ15,7% ຂອງມູນຄ່າການຄ້າຂາເຂົ້າ-ຂາອອກຂອງຈີນໃນໄລຍະດຽວກັນ, ອາຊຽນໄດ້ສືບຕໍ່ຮັກສາຖານະເປັນຄູ່ການຄ້າອັນດັບ 1 ຂອງຈີນ.