ຂ່າວຕ່າງປະເທດລາຍງານ ໃນທ້າຍອາທິດຜ່ານມາ, ລັດຖະບານ​ຍີ່ປຸ່ນ​ລະບຸ​ວ່າ:ຈຳນວນ​ຄົນເຈັບ​ໄຂ້ຫວັດ​ໃຫຍ່​ຢູ່​ຍີ່ປຸ່ນ​ໄດ້​ກ້າວ​ເຂົ້າ​ສູ່​ໄລຍະ​ການແຜ່​ລະບາດ​ໃນ​ທົ່ວ​ປະ​ເທດແລະຈໍານວນຄົນເຈັບຍັງສືບຕໍ່ເພີ່ມຂຶ້ນ.

ກະຊວງ​ສາທາລະນະ​ສຸກ​ຍີ່ປຸ່ນ​ລາຍ​ງານ​ວ່າ: ສະຖາບັນການແພດ ປະມານ 5,000ແຫ່ງ ໃນປະເທດໄດ້ລາຍງານພົບຄົນເຈັບໄຂ້ຫວັດໃຫຍ່ທັງໝົດ 5,127 ກໍລະນີໃນວັນທີ 3 ພະຈິກ ຜ່ານມາ ຊຶ່ງເພີ່ມຂຶ້ນເຖິງ829 ກໍລະນີຈາກອາທິດກ່ອນໜ້າ.

ຈຳນວນຄົນເຈັບທີ່ພົບໂດຍສະເລ່ຍໃນສະຖາບັນການແພດໜຶ່ງແຫ່ງ ມີ1,04 ກໍລະນີຊຶ່ງສູງເກີນຂອບເຂດການປະກາດເລີ່ມຕົ້ນຂອງລະດູການລະບາດໄຂ້ຫວັດໃຫຍ່ໃນທົ່ວປະເທດ, ກະຊວງສາທາລະນະສຸກ ຍີ່ປຸ່ນຈຶ່ງໄດ້ປະກາດເຂົ້າສູ່ໄລຍະການລະບາດຢ່າງເປັນທາງການໃນວັນທີ 8 ພະຈິກ ຜ່ານມາ.

ເມື່ອຈັດແບ່ງຕາມພາກພື້ນ ພົບວ່າ: ໂອກິນາວາ ມີອັດຕາການເກີດໄຂ້ຫວັດໃຫຍ່ສູງທີ່ສຸດ. ໂດຍມີຈຳນວນຄົນເຈັບທັງໝົດ 10.64 ຄົນຕໍ່ໂຮງໝໍໜຶ່ງແຫ່ງ. ຮອງລົງມາແມ່ນຊິຊູໂອກະ ມີ 2.09 ກໍລະນີ, ຊິບະ 2 ກໍລະນີ, ໂອອິຕະ 1.66ກໍລະນີ ແລະ ຟຸກຸອິ 1.62 ກໍລະນີ.

ເຈົ້າ​ໜ້າ​ທີ່​ສາ​ທາ​ລະ​ນະ​ສຸກ​ຂອງ​ຍີ່​ປຸ່ນ ຮຽກ​ຮ້ອງ​ໃຫ້​ປະ​ຊາ​ຊົນ​ປະ​ຕິ​ບັດ​ມາດ​ຕະ​ການ​ປ້ອງ​ກັນ​ຂັ້ນ​ພື້ນ​ຖານເຊັ່ນ: ​​ລ້າງ​ມື​ເປັນ​ປະ​ຈຳ, ໃສ່ໜ້າກາກອະນາໄມຢ່າງຖືກວິທີ ແລະພິຈາລະນາເຂົ້າສັກວັກຊິນ ໂດຍສະເພາະກຸ່ມຄົນທີ່ມີຄວາມສ່ຽງສູງ.