ຂ່າວຕ່າງປະເທດລາຍງານ ໃນວັນທີ 11 ພະຈິກ ຜ່ານມາວ່າ: ສິງກະໂປກຽມໃຊ້ມາດຕະການທີ່ອາດເປັນການຮຸກຮານສິດສ່ວນບຸກຄົນ. ໂດຍມີຈຸດປະສົງເພື່ອປ້ອງກັນບໍ່ໃຫ້ຕົກເປັນເຫຍື່ອຂອງມິດສາຊີບທີ່ເພີ່ມຫຼາຍຂຶ້ນແລະເຮັດໃຫ້ຊາວສິງກະໂປຕ້ອງສູນເສຍເງິນຈໍານວນຫຼວງຫຼາຍໃຫ້ກັບມິດສາຊີບໃນແຕ່ລະປີ.
ຂ່າວລະບຸວ່າ: ຮ່າງກົດໝາຍວ່າດ້ວຍການຄຸ້ມຄອງຈາກການຫຼອກລວງ (Protection from Scams Bill) ທີ່ສະເໜີຕໍ່ລັດຖະສະພາໃນວັນທີ 11 ພະຈິກ ຜ່ານມາ ອາດເຮັດໃຫ້ສິງກະໂປເປັນປະເທດທຳອິດໃນໂລກທີ່ອະນຸຍາດໃຫ້ຕຳຫຼວດສາມາດເຂົ້າຄວບຄຸມບັນຊີທະນາຄານຂອງຜູ້ທີ່ຕົກເປັນເຫຍື່ອຈາກການຫຼອກລວງ ແຕ່ບໍ່ຍອມເຊື່ອວ່າຕົນເອງກຳລັງຖືກຫຼອກລວງ ເຖິງແມ່ນວ່າຈະມີຫຼັກຖານທີ່ຊັດເຈນ ກໍຕາມ.
ຮ່າງກົດໝາຍດັ່ງກ່າວຈະມອບສິດໃຫ້ຕຳຫຼວດສາມາດອອກຄຳສັ່ງຈຳກັດການເຮັດທຸລະກຳທາງການເງິນເຊັ່ນ: ການໂອນເງິນ, ການໃຊ້ຕູ້ ATM ແລະການເຂົ້າເຖິງວົງເງິນສິນເຊື່ອ ຊຶ່ງຈະສົ່ງຜົນກະທົບຕໍ່ບຸກຄົນໃນການເຮັດທຸລະກໍາຜ່ານບັນຊີທະນາຄານຂອງຕົນເອງ, ທັງດຳເນີນການຢູ່ເຄົາເຕີທະນາຄານຫຼືຜ່ານການບໍລິການຊຳລະເງິນຍອດນິຍົມເຊັ່ນ:PayNow
ຖ້າຫາກຮ່າງກົດໝາຍສະບັບນີ້ມີຜົນບັງຄັບໃຊ້ ເຈົ້າໜ້າທີ່ຕຳຫຼວດຈະມີອຳນາດອອກຄຳສັ່ງ RO ຖ້າຫາກວ່າເຫຍື່ອມີທ່າອ່ຽງທີ່ຈະໂອນເງິນໃຫ້ມິດສາຊີບຫຼື ພິຈາລະນາແລ້ວເຫັນວ່າຈຳເປັນຕໍ່ການປົກປ້ອງຜູ້ເຄາະຮ້າຍ.
ລາຍງານລະບຸວ່າ: ໃນເຄິ່ງປີທຳອິດຂອງປີນີ້, ຊາວສິງກະໂປເສຍເງິນໃຫ້ກັບມິດສາ ຊີບ ສູງເຖິງ 385,6 ລ້ານໂດລາ ຊຶ່ງເປັນສະຖິຕິໃໝ່ຈາກຄະດີຫຼອກລວງທັງໝົດ 26,587 ກໍລະນີທີ່ມີການລາຍງານຕໍ່ຕຳຫຼວດ.
