ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 11 ພະຈິກ ຜ່ານມາຢູ່ນະຄອນຫຼວງບາກູປະເທດອາແຊກໄບຊານ ໄດ້ເປີດກອງປະຊຸມສຸດຍອດ ຄັ້ງທີ 29 ລະຫວ່າງບັນດາຝ່າຍເຂົ້າຮ່ວມສົນທິສັນຍາແມ່ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP 29), ໂດຍມີການເຂົ້າຮ່ວມຂອງຜູ້ແທນ 80.000 ຄົນ ທີ່ມາຈາກເກືອບ 200 ປະເທດ. ກອງປະຊຸມໄດ້ດຳເນີນເປັນເວລາ 2 ອາທິດແລະ ໄດ້ຮັບການຄາດຫວັງວ່າຈະສ້າງບາດລ້ຽວກ່ຽວກັບການກະທຳດ້ານດິນຟ້າອາກາດ ໃນສະພາບການໂລກພວມນັບມື້ນັບຮ້ອນຂຶ້ນ ແລະ ໄພພິບັດທາງດ້ານດິນຟ້າອາກາດນັບມື້ນັບເພີ່ມຂຶ້ນໃນທົ່ວໂລກ.

ຂ່າວລະບຸວ່າ: ກອງປະຊຸມ COP29 ໃນປີນີ້ ໄດ້ເອີ້ນວ່າ “COP ການເງິນດິນຟ້າອາກາດ”, ຍ້ອນວ່າໜຶ່ງໃນບັນດາເປົ້າໝາຍຫຼັກຂອງກອງປະຊຸມແມ່ນເປັນເອກະພາບຈຳນວນເງິນທີ່ຕ້ອງນຳໃຊ້ໃນທຸກປີ ເພື່ອຊ່ວຍບັນດາປະເທດພວມພັດທະນາຮັບມືກັບບັນຫາທີ່ກ່ຽວຂ້ອງເຖິງການປ່ຽນແປງຂອງດິນຟ້າອາກາດ ຊຶ່ງໄດ້ຮັບການຄາດຄະເນວ່າແມ່ນໜຶ່ງໃນບັນຫາເຄັ່ງຮ້ອນທີ່ສຸດ ແລະ ໂຕ້ຖຽງກັນຫຼາຍທີ່ສຸດຢູ່ COP29. ບັນດາປະເທດຈະຮັບຮອງເອົາເປົ້າໝາຍດ້ານການເງິນໃໝ່ເພື່ອແນໃສ່ປ່ຽນແປງຄຳໝັ້ນສັນຍາສະຫງວນເງິນຈຳນວນ 100 ຕຶື້ໂດລາ/ປີ ໃຫ້ແກ່ປະເທດພວມພັດທະນາທີ່ຈະໝົດກຳນົດເວລາໃນທ້າຍປີນີ້ ແລະ ແມ່ນຄັ້ງທຳອິດພາຍຫຼັງ 15 ປີ ທີ່ບັນດາປະເທດຈະພ້ອມກັນຕີລາຄາຄືນໃໝ່ຈຳນວນເງິນກໍຄືຮູບແບບການເງິນ ຊຶ່ງບັນດາປະເທດພວມພັດທະນາໄດ້ຮັບເພື່ອໃຊ້ຈ່າຍໃນການຮັບມືກັບການປ່ຽນແປງດິນຟ້າອາກາດ.