ວິທະຍຸກະຈາຍສຽງຫວຽດນາມລາຍງານວ່າ: ງານວາງສະແດງ “ຮອງຮອຍ ໂຮ່ຈິມິນ ຢູ່ ຈີນ” ໄດ້ເປີດຂຶ້ນໃນວັນທີ 11 ພະຈິກ ຜ່ານມາຢູ່ ຫໍພິພິທະພັນ ໂຮ່ຈິມິນທີ່ນະຄອນຫຼວງຮ່າໂນ້ຍ. ເຂົ້າຮ່ວມພິທີເປີດງານວາງສະແດງມີທ່ານ ລາຍຊວັນມົນ ຮອງຫົວໜ້າຄະນະປະຈຳຄະນະໂຄສະນາສຶກສາສູນກາງ, ທ່ານ ຮວ່າງດ້າວເກືອງ ຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວ; ທ່ານ ເຄື້ອອວຍ ເອກອັກຄະລັດຖະທູດ ຜູ້ມີອຳນາດເຕັມແຫ່ງ ສປຈີນ ປະຈຳ ຫວຽດນາມ. ທ່ານ ເກນນາດີ ສເຕປາໂນວິກ ເບຊເດດໂກ ເອກອັກຄະລັດຖະທູດ ຜູ້ມີອຳນາດເຕັມແຫ່ງ ຣັດເຊຍ ປະຈຳ ຫວຽດນາມ. ງານວາງສະແດງຈັດໂດຍຫໍພິພິທະພັນໂຮ່ຈິມິນ, ກົມຮັກສາສຳເນົາເອກະສານຫ້ອງວ່າການສູນກາງພັກສົມທົບກັນຈັດຂຶ້ນເນື່ອງໃນໂອກາດສະເຫຼີມສະຫຼອງ 100 ປີແຫ່ງວັນ ຫງວຽນອ້າຍກວັກ - ໂຮ່ຈິມິນ ໄປຮອດຈີນ ເພື່ອຊອກຫາເສັ້ນທາງກູ້ຊາດຄັ້ງທຳອິດ (11 ພະຈິກ 1924 – 11 ພະຈິກ 2024), ກ້າວໄປເຖິງ 75 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ຈີນ (18 ມັງກອນ 1950 – 18 ມັງກອນ 2025).

ທ່ານ ປ.ອ ຫວູແມັ້ງຮ່າ ຜູ້ອຳນວຍການຫໍພິພິທະພັນໂຮ່ຈິມິນ ໃຫ້ຮູ້ວ່າ: ປະທານໂຮ່ຈິມິນ - ການນຳຜູ້ຍິ່ງໃຫຍ່ຂອງປະຊາຊົນຫວຽດນາມ, ເພື່ອນມິດສະໜິດສະໜົມຂອງປະຊາຊົນຈີນ. ເພິ່ນໄດ້ອຸທິດຕະຫຼອດຊີວິດຂອງຕົນໃຫ້ແກ່ພາລະກິດປົດປ່ອຍຊາດຂອງປະຊາຊົນ ຫວຽດນາມ, ສູ້ຊົນຢ່າງບໍ່ຮູ້ອິດບໍ່ຮູ້ເມື່ອຍເພື່ອສັນຕິພາບ, ຄວາມກ້າວໜ້າໃນທົ່ວໂລກ, ອອກເຫື່ອເທແຮງເພີ່ມພູນຄູນສ້າງ ແລະ ພັດທະນານ້ຳໃຈມິດຕະພາບລະຫວ່າງສອງພັກ, ປະຊາຊົນສອງປະເທດ ຫວຽດນາມ - ຈີນ.

ງານວາງສະແດງໄດ້ຈັດຂຶ້ນຢູ່ຫໍພິພິທະພັນໂຮ່ຈິມິນໃນລະຫວ່າງວັນທີ 11 ພະຈິກ 2024 ຈົດຮອດທ້າຍເດືອນເມສາປີ 2025 ຈຶ່ງປິດລົງ.