ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມລະດົມການມີສ່ວນຮ່ວມໃນການສໍາຫຼວດພົນລະເມືອງແລະທີ່ຢູ່ອາໄສທົ່ວປະເທດ ຄັ້ງທີV ປີ 2025 ໃນວັນທີ 8 ພະຈິກນີ້ທີ່ໂຮງແຮມແລນມາກ ນະຄອນຫຼວງວຽງຈັນ.
ເປັນກຽດໃນກອງປະຊຸມ ພ້ອມທັງເປັນປະທານ ຂອງທ່ານ ນາງ ພອນສະຫຼີ ສຸກສະຫວັດ ຫົວໜ້າສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ, ທ່ານ Kambiz Kabiri ຜູ້ປະສານງານດ້ານນະໂຍບາຍ ແລະ ສຳມະໂນຄົວອົງການສະຫະປະຊາຊາດກອງທຶນສໍາລັບປະຊາກອນ (UNFPA), ບັນດາທ່ານເອກອັກຄະລັດຖະທູດ, ທູຕານຸທູດ, ບັນດາທ່ານຜູ້ຕາງໜ້າຈາກອົງການຈັດຕັ້ງສາກົນ, ພາກເອກກະຊົນ, ແຂກຖືກເຊີນ ແລະ ບັນດາກະຊວງທີ່ກ່ຽວຂ້ອງ.
ທ່ານ ນາງ ພອນສະຫຼີ ສຸກສະຫວັດໄດ້ກ່າວວ່າ: ຈຸດປະສົງຕົ້ນຕໍ ຂອງກອງປະຊຸມຄັ້ງນີ້ແມ່ນເພື່ອຮັບຟັງລາຍງານຄວາມຄືບໜ້າໃນການກະກຽມການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແລະ ນໍາສະເໜີກ່ຽວກັບວິທີການຈັດຕັ້ງປະຕິບັດ ແລະ ການນໍາໃຊ້ເຄື່ອງມືເຕັກໂນໂລຊີເຂົ້າໃນການສໍາຫຼວດຄັ້ງນີ້, ປຶກສາຫາລືກັບບັນດາຄູ່ຮ່ວມພັດທະນາກ່ຽວກັບຄວາມເປັນໄປໄດ້ໃນການປະກອບສ່ວນທາງດ້ານງົບປະມານ ແລະ ວິຊາການ ຊຶ່ງມາຮອດປັດຈຸບັນ ສປປ ລາວ ຍັງມີຄວາມຕ້ອງການໃນດ້ານທຶນຮອນ ເພື່ອປະກອບສ່ວນເຂົ້າໃນການຈັດຕັ້ງປະຕິບັດການສໍາຫຼວດໃຫ້ສໍາເລັດຕາມວັດຖຸປະສົງ ແລະ ລະດັບຄາດໝາຍທີ່ກຳນົດໄວ້.
ເມື່ອເວົ້າເຖິງພົນລະເມືອງ ສປປ ລາວ ຈະມີການຂະຫຍາຍຕົວຈາກ 7.4 ລ້ານຄົນໃນປັດຈຸບັນເປັນ 7.6 ລ້ານຄົນ ໃນປີ2025 ແລະ 8.1 ລ້ານຄົນໃນປີ 2030ຊຶ່ງຂໍ້ມູນດັ່ງກ່າວນີ້ຕ້ອງໄດ້ຮັບການຢືນຢັນຕື່ມຈາກການສໍາຫຼວດຄັ້ງນີ້.
ເປົ້າໝາຍຂອງການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແມ່ນ ຈົດນັບທຸກຄົນທີ່ດຳລົງຊີວິດຢູ່ ສປປ ລາວ ແລະ ມີໜ້າຢູ່ເປັນປະຈຳ 6 ເດືອນຂຶ້ນໄປ (De Jure) ແລະ ເກັບກຳຂໍ້ມູນທາງດ້ານເສດຖະກິດ-ສັງຄົມຂອງບຸກຄົນ ແລະ ຄົວເຮືອນໃຫ້ຄົບຖ້ວນ, ຖືກຕ້ອງ ແລະ ຊັດເຈນ; ຊຶ່ງຜ່ານການສໍາຫຼວດໃນ 4 ຄັ້ງ: ຄັ້ງທີ 1 ແມ່ນໄດ້ຈັດຕັ້ງປະຕິບັດ ໃນປີ 1985, ຄັ້ງທີ II ໃນປີ 1995, ຄັ້ງທີ III ໃນປີ 2005 ແລະ ຄັ້ງທີ IV ປີ 2015 ເປັນການສໍາຫຼວດທີ່ກວມເອົາເນື້ອໃນຂ້ອນຂ້າງຫຼາຍເພື່ອສາມາດສະໜອງຂໍ້ມູນທີ່ສໍາຄັນ ກ່ຽວກັບການຂະຫຍາຍຕົວຂອງພົນລະເມືອງ, ຄຸນລັກສະນະ ຂອງພົນລະເມືອງ, ໂຄງປະກອບທາງດ້ານເພດ, ໝວດອາຍຸ, ສະພາບການເກີດ, ການເສຍຊີວິດ, ການຍົກຍ້າຍ, ຄຸນລັກສະນະຂອງທີ່ຢູ່ອາໄສ, ການປະກອບອາຊີບ ແລະ ການເຂົ້າເຖິງການບໍລິການຕ່າງໆ ຂອງປະຊາຊົນບັນດາເຜົ່າໃນຂອບເຂດທົ່ວປະເທດ. ເຖິງວ່າອັດຕາການເພີ່ມຂອງພົນລະເມືອງມີທ່າອ່ຽງຫຼຸດລົງ ແຕ່ພົນລະເມືອງກໍຍັງມີການເພີ່ມຂຶ້ນແບບຄົງທີ່.
ການສໍາຫຼວດພົນລະເມືອງ ແລະ ທີ່ຢູ່ອາໄສຄັ້ງນີ້ ແມ່ນຈະເປັນແຫຼ່ງຂໍ້ມູນທີ່ສໍາຄັນໃນການຕີລາຄາສະພາບການດໍາລົງຊີວິດທາງດ້ານສັງຄົມ ແລະ ເສດຖະກິດສ່ວນໜຶ່ງໃນ 10 ປີທີ່ຜ່ານມາ ເພື່ອຮັບໃຊ້ໃຫ້ແກ່ການຕິດຕາມ ແລະ ປະເມີນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ການກະກຽມສ້າງແຜນພັດທະນາ ເສດຖະກິດ-ສັງຄົມແຫ່ງຊາດ ຄັ້ງທີ X ທັງເປັນການສ້າງບົດລາຍງານແຫ່ງຊາດແບບສະໝັກໃຈ (VNR) ຂອງລັດຖະບານ, ລວມທັງການຕິດຕາມເປົ້າໝາຍການພັດທະນາແບບຍືນຍົງ ແລະ ວິໄສທັດຮອດປີ 2030,
ສະນັ້ນ, ອີງໃສ່ຄວາມຈໍາເປັນດັ່ງກ່າວ ເຫັນວ່າຄວາມຕ້ອງການງົບປະມານທັງໝົດ ສໍາລັບການສໍາຫຼວດ ແມ່ນ 450 ຕື້ກີບ ຫຼືປະມານ 23,7 ລ້ານໂດລາ. ຕໍ່ກັບຄວາມຕ້ອງການດັ່ງກ່າວລັດຖະບານເຫັນໄດ້ຄວາມສໍາຄັນ ຕັດສິນໃຈ ເພີ່ມງົບປະມານເບື້ອງລັດຂຶ້ນ ຈາກ 5,4 ລ້ານໂດລາ ເປັນ 8,2 ລ້ານໂດລາ ກວມປະມານ 45% ຂອງງົບປະມານທີ່ສາມາດ ລະດົມໄດ້ທັງໝົດ ໃນປັດຈຸບັນ. ເຖິງຢ່າງໃດກໍຕາມ, ທຽບໃສ່ຄວາມຕ້ອງການທັງໝົດ ເຫັນວ່າ ງົບປະມານຍັງບໍ່ທັນພຽງພໍ ຕ້ອງໄດ້ລະດົມຕື່ມ ຈໍານວນ 5,2 ລ້ານໂດລາ. ຍ້ອນແນວນັ້ນ ການສໍາຫຼວດ ຄັ້ງ V ນີ້ມີຄວາມສໍາຄັນຫຼາຍ ເພາະຈະເປັນພື້ນຖານໃຫ້ແກ່ການຕີລາຄາຜົນສໍາເລັດ ແລະ ວາງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ຄັ້ງທີ X ກໍຄື ການບັນລຸການຫຼຸດພົ້ນຈາກປະເທດດ້ອຍພັດທະນາ ແລະ ເປົ້າໝາຍພັດທະນາແບບຍືນຍົງ 2030.
(ຂ່າວ: ແສງຈັນ)
