ຈາກຂໍ້ມູນໃນການລາຍງານຫຼ້າສຸດ ໃນວັນທີ 15 ກັນຍາ ຜ່ານມາ ທີ່ກອງປະຊຸມພົບປະລະຫວ່າງນາຍົກລັດຖະມົນຕີ ແລະ ຜູ້ປະກອບການຂະແໜງກະສິກຳ ແລະ ປ່າໄມ້ ຄັ້ງທີ 1 ຈັດຂຶ້ນຢູ່ນະຄອນຫຼວງວຽງຈັນ; ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ກ່າວວ່າ: ໂຮງງານປຸງແຕ່ງກະສິກຳ ແລະ ປ່າໄມ້ ມີທັງໝົດ 5.290 ແຫ່ງ ແຕ່ກໍຍັງບໍ່ຕອບສະໜອງໄດ້ ກັບຄວາມຮຽກຮ້ອງຕ້ອງການໃນຕົວຈິງ ໂດຍສະເພາະການຜະລິດຝຸ່ນຊີວະພາບ ແລະ ຫົວອາຫານສັດ.

ທ່ານລັດຖະມົນຕີ ກະຊວງກະສິກຳ ແລະ ປ່າໄມ້ ກ່າວວ່າ: ໂຮງງານປຸ່ງແຕ່ງກະສິກຳ ແລະ ປ່າໄມ້ ພາຍຫຼັງມອບ-ຮັບ ຈາກກະຊວງອຸດສາຫະກຳ ແລະ ການຄ້າ ມີທັງໝົດ 5.290 ແຫ່ງ ປະກອບມີ: ໂຮງສີເຂົ້າ 3.516 ແຫ່ງ, ໂຮງງານຜະລິດນໍ້າຕານ 5 ແຫ່ງ, ໂຮງງານຜະລິດແປ້ງມັນຕົ້ນ 19 ແຫ່ງ, ໂຮງຊອຍມັນຕົ້ນ ແລະ ລານຕາກມັນຕົ້ນ 291 ແຫ່ງ, ໂຮງງານຜະລິດຝຸ່ນ 118 ແຫ່ງ, ໂຮງງານປຸງແຕ່ງໄມ້ 947 ແຫ່ງ, ໂຮງງານຂ້າສັດ 387 ແຫ່ງ ແລະ ໂຮງງານຫົວອາຫານສັດ 7 ແຫ່ງ.

ສຳລັບການຊຸກຍູ້ສົ່ງເສີ່ມໂຮງງານຜະລິດຝຸ່ນຊີວະພາບ ທັງໝົດ 118 ແຫ່ງນັ້ນ ແມ່ນສາມາດຜະລິດໄດ້ 99.670 ໂຕນ ແລະ ກຸ່ມຊາວກະສິກອນຜະລິດເພື່ອນໍາໃຊ້ເອງ ທັງໝົດໄດ້ປະມານ 700.000 ໂຕນ ຊຶ່ງລວມທັງໝົດ ສາມາດສະໜອງໄດ້ 799.670 ໂຕນ, ທຽບໃສ່ຄວາມຕ້ອງການ 2 ລ້ານໂຕນ ແມ່ນໄດ້ພຽງ 40%.

ນອກນີ້, ການຊຸກຍູ້ສົ່ງເສີມ ໂຮງງານຫົວອາຫານສັດ 7 ແຫ່ງ ແມ່ນສາມາດຜະລິດອາຫານສັດໄດ້ 353.995 ໂຕນ ຊຶ່ງສາມາດສະໜອງຕໍ່ຄວາມຕ້ອງການພາຍໃນໄດ້ພຽງ 60%.

(ຂ່າວ: ສຸກສະຫວັນ)